秦沛想畀首期幫仔女上車 姜麗文拒絕：憑乜要Daddy入行70年嘅錢

撰文：東方新地｜ 圖片：新傳媒圖片、姜麗文IG

秦沛想幫仔女俾首期

秦沛不嬲都好錫一對子女，早前有傳秦沛見香港買樓不容易，提出幫一對子女付首期等佢哋上車，不過被二人拒絕！

拒用爸爸辛苦錢

Lesley回應傳媒時表示：「其實Dadd每年都話要買樓畀我哋，但我哋唔會用阿爸辛苦拍戲所賺嘅錢，我憑乜要Daddy入行70年嘅錢(秦沛3歲便入行)，爸爸嘅錢應該留嚟自己去享受吓，好似打高爾夫球、去旅行，或返加拿大陪吓媽咪，同最緊要佢身體健康！我哋都大個喇，我同哥哥都30幾歲，應該要靠自己生生性性咁儲錢買樓。」

問到幾時買樓？佢話目前樓價太貴，暫時唔買住，反而希望有日可以買層樓送畀爸爸，氹佢開心！

秦沛的父母嚴化及紅薇都是演員，一對子女姜文杰和姜麗文都加入娛樂圈，並成為圈中「星三代」，不過二人在「成功靠父幹」的年代，卻未有借助秦沛之名搵機會上位，反而選默默耕耘！

從小在加拿大長大的姜文杰和姜麗文同樣熱愛音樂，所以大學畢業後都入娛樂圈發展，入行初期以兄妹組合「Benji & Lesley」出唱片，不過做樂壇新人收入不高，食住行又要置裝化妝整頭，開支好大，秦沛這個廿四孝爸爸都好體貼，怕子女捱得辛苦，不時問二人「夠唔夠錢使？」，只是一對子女每每婉拒爸爸的好意！

據知，Benji不想別人以為他靠父親之名出位，初入行時，在外邊工作碰見秦沛冇叫他做爸爸，反而跟大家一樣叫他做Paul哥，不過話明係星三代，邊有得暪！當年Benji & Lesley加盟HKTV，滿心歡喜，仲有份參演人氣劇《導火新聞線》！

點知最後HKTV不獲發牌，二人去遊行靜坐，Paul也有同行表達支持！

姜麗文說：「依家嘅錢就放在交租，同埋自己嘅音樂上先！」

而姜文杰早前在熱爆中港台嘅網劇《反黑》，除了飾演「細華」一角，套劇嘅製作公司畀機會佢可以監製《反黑》主題曲《大丈夫》，仲有做《反黑》嘅電影配樂。

當年兒子想要入行，秦沛曾勸他三思，因為在娛樂圈工作好辛苦，但姜文杰說：「爺爺嫲嫲都係做呢行，爸爸、叔叔(姜大衛)都係圈中人。」一言九頂，秦沛話唔夠佢拗！

難得姜麗文都同爸爸感情超好，父女之間無所不談，連出街都孖住，早前本刊影到佢兩父女一齊去街，秦沛仲陪個女去食乳酪！

鄭俊弘 紅咗即飛姜麗文

講到最為人記得，當然是姜麗文和鄭俊弘的一段舊情！當年鄭俊弘(Fred)於01年參加新秀大賽入行，但一直寂寂無聞，直至12年參加無綫歌唱比賽《星夢傳奇》奪冠才人氣急升，姜麗文隨即於社交網留言「Proud of you」，因而被踢爆戀情，原來二人發展地下情長達6年！

戀情見光死

走紅咗嘅Fred事業有起色，突然要求分手，更有傳當時Lesley情緒崩潰︰「佢(Fred)紅咗先飛我！」

鄭俊弘未紅前，不時會同秦沛、女友姜麗文三人行，不過男方一紅唔認人立即提出分手！

去年，鄭俊弘背住未婚妻偷嗒何雁詩，秦沛出席金像獎活動，被追問點睇鄭的負面新聞、是否很開心？他笑說：「頭先、𠵱家、一陣間都好開心。呢兩日攰啲，因為剛喺外地返來，時差關係，有時夜晚瞓覺都會笑醒。」