爆新劇改名《福爾摩師奶》因由 傳遷就內地市場而改？！

撰文：東方新地｜圖片：新傅媒、劇照

《福爾摩師奶》首播

今晚，新劇《福爾摩師奶》就會接棒《荷》播出，故事以英國妓女連環殺手「開膛手傑克」（Jack the Ripper）為藍本，背景設定喺香港開埠初期。

今次劇集以陳松伶、陳煒及黃智賢三位領軍，講述首位華人爵士夫人祖迪費查（陳松伶飾），因洋人老公失勢兼失蹤，落難到品流複雜嘅油麻地，不幸捲入連環妓女殺手「開膛手傑克」案件中，更被指為疑兇而展開嘅一個故事！

追看3大原因：

｜題材有追看性

今次《福》以懸疑推理為主題，過往TVB出產嘅推理劇都係收視嘅保證，例如：《法證先鋒》系列、《鑑證實錄》系列等。

加上，劇集未出街前，監製方駿釗更豪言：「包保觀眾估唔到！」，相信劇中唔少細節都會有所關連，唔少觀眾都應該會睇得投入之餘，仲會想不斷追看！

｜王牌監製加持

《福》嘅監製方駿釗正係近年幾套劇集嘅收視保證，方駿釗對上嘅3套作品：、《一屋老友記》、《降魔的》及《跳躍生命線》收視及口碑都唔錯，而《跳》更於上年榮獲最佳劇集一獎，可見劇集品質應有保證。

｜全tvb自家製作

近年，TVB都播出唔少中港合拍劇及內地劇，如《延禧攻略》、《守護神之保險調查》等。要睇到一套百分百喺自家製嘅電視劇好似難上加難，但好在之前播出嘅《大帥哥》就自家製得嚟亦冇令觀眾失望。

而今次呢套《福》同樣嚟自TVB親自出品，雖然未知有冇品質保證，不過以自家劇嚟講都叫係令人有所期待嘅，不竟有陳松伶、黃智賢和陳煒等好戲之人坐陣！

劇名娘味濃

雖然有部分網友指《福爾摩師奶》呢個名聽落怪怪地，似乎唔太切合本地觀眾嘅口味，仲有傳聞指呢個劇名係為咗遷就內地市場而改！

原來《福爾摩師奶》開戲時劇名係叫《危城First Lady》，而監製更否認傳聞所指，表示改名只係想加強喜劇感，想知套劇夠唔夠喜感，大家就一於今晚睇睇啦！

延伸閱讀：

《荷里活有個大老千》龍四文雄終極對決鬥法

話說污點證人阿北為保妻兒性命而於男廁用龍四師兄龐峰（秦沛飾）俾嘅刀片自行了斷，令龍四（鄭則仕飾）等人失去最有力指證文雄（湯鎮業飾）嘅大好機會！

當然，龍四又點會輕易因而放棄除去文雄嘅機會呀！所以佢就連同廉署等人再次重新佈處捉拿文雄嘅計劃，於是就集合小雨、加俊、舒奇、瑪利蓮等人合力演出一埸大龍鳳嘅騙局，以搵出文雄打算消滅多年來受賄嘅證據，即多年賄款！

結局篇（22/2）四哥中槍

龍四等人就正式出動，然而瑪利蓮為怕再出任何意外而冇機會表明心跡，於是就鼓起勇氣同龍四表白，點知對方就話一切完結後先會俾個答案瑪利蓮。

點知龐峰就睇穿龍四嘅計劃，於是就帶走文雄，而龍四就繼續隨機應變假裝打劫文雄，並引導文雄承認自己受賄，結果成功令廉署成功將文雄拘捕！不過，期間四哥不幸中槍倒地！

大結局（23/2） 四哥命懸一線

去到大結局嗰集，就講到四哥命懸一線，醫生都話龍四命不久矣之時，瑪利蓮向耶穌禱告，希望用自己終身幸福換取龍四條命！正當眾人都擔心不已時，最後四哥竟然憑驚人嘅意志力大難不死！

至於大壞蛋文雄就當然受到法律的制裁後，更被安排至有晒咁多年被文雄冤枉囚犯嘅大囚室，往後一生於獄中贖罪。

與此同時，文雄一事落案後廉署追輯龐峰，幸得四哥相助，最終龐峰解開多年認定龍四害死其親弟嘅心結。至於點回答瑪利蓮嘅求愛，龍四就自覺自己俾唔到安全感對方，而拋下一句「曾經滄海難為水」婉拒瑪利蓮。