碧咸傳︳48歲「萬人迷」碧咸人生好睇過電視劇 出軌事蹟被重提惹爭議
《碧咸傳》重提19年前出軌事件 「舊愛」出位言論再度翻起
當年碧咸因轉投皇家馬德里球會關係，要獨自一人搬往西班牙生活，但由於不善於西班牙語，因而聘來「有樣有身材」的助手Rebecca Loos，不料二人在「朝見口，晚見面」的情況下發生感情，女助手Rebecca Loos更於偷食消息傳出後接受電視受訪，直認二人關係維持4個月，更爆碧咸趁老婆與兩名兒子留在英國時與她發生4次愛愛行為，又指碧咸傾情荷里活女星茱莉亞羅拔絲（Julia Roberts），並於愛愛過程中角色扮演名作《風月俏佳人》中的李察基爾年輕富豪角色，並用遊戲來增添刺激。而在《碧咸傳》中，Victoria亦直截了當認了當時是人生最痛苦的事，二人講得眼紅紅。
網民找出Rebecca Loos 19年後照片 湧入Instagram鬧爆
節目出街後引來極大迴響，Rebeacca亦因此而再度成為熱話，Instagam被大批網民湧入大罵「破壞碧咸婚姻的小三」。據Rebecca的個人簡介，她現時為瑜伽及冥想導師，同時為兼職醫療助理，不時都會分享自己做瑜伽的心得，同時也會貼上與兒子的合照，早年與老公結婚後移居挪威，一家生活美滿寫意且低調，與19年前的高調風格判若兩人。不過網民照樣「唔放過」，在其帖文下留言狂鬧，指「滾開」、「你害他們（Beckham和Victoria）20年都走不出這陰影」、「拜託你為你令人作嘔的行為負點責任」、「你曾破壞別人家庭，不明白為何你仍如是光明正大地生活」、「你應該感到羞恥，別人好好的硬要介入生活才高興」、「祝你老公同樣有小三」、「19年前後的樣子變化這麼多，殘到爆，壞心腸難怪醜得這麼快」、「完全同以前兩個樣，樣都變晒，好彩碧咸一家夠堅定」。
Rebecca終作出回應
面對住一連串的攻擊，Rebecca都終於不再啞忍，親回應網民留言，指「Thank you. Am taking in the nasty comments with as much humour as I can (謝謝大家，我會盡可能幽默地接受這些評論」，而亦有大批網民支持Rebecca，指事已過去，現時重提不知有何價值，更指「點解個個都只鬧Rebecca而無人鬧碧咸？一隻手掌拍唔響，佢出嚟拍節目同老婆講到好傷心咁就無人發覺其實佢都錯？一面倒只罵Rebecca係咩道理」、「每個人都有犯錯的機會，如果當時二人確實相愛過，其實唔應該用『錯』嚟形容」、「加油，每次有呢D事發生，人類總係怪罪於女性身上，無人會話個男人錯」、「現時大家都各有各生活，不用為以往而執著，面對當時全球大明星，人人都會有貪心一面，可能比著第2個女粉絲，都會咁做」。
碧咸傳︳1. 碧咸真係好靚仔簡直完美
《碧咸傳》被稱最大賣點就係：碧咸真係好靚仔！「萬人迷」碧咸靚仔就唔係咩新聞，但今次紀錄片好似每一個鏡頭都影到碧咸零死角咁，同埋紀錄咗唔少碧咸以前後生靚仔樣、唔同時期的碧咸等，令網民勁讚：「完全搵唔到佢一個唔型嘅鏡頭囉」、「佢植髮做得好靚」、「睇呢套碧咸傳，講了幾多次… 佢好靚仔、佢好靚仔、佢好靚仔、點解可以咁靚仔」、「碧咸咩髮型都carry 到」、「好睇，99%係因為主角靚仔，換其他人可能冇咁吸引」、「中年冇走樣仲愈嚟愈型」、「實在好少男人會咁鍾意整潔」、「簡直完美」。
碧咸多圖：
碧咸傳︳2.老婆Victoria好累事vs 好完美
《碧咸傳》又點少得碧咸老婆Victoria！該紀錄片詳述2人相識到相愛的點點滴滴，仲講咗好多2公婆鮮為人知的事，例如碧咸出軌、Victoria點解成日對啲記者黑口黑面，又點支持佢老公等。雖然唔少人睇完都大讚Victoria好老婆，對佢改觀，不過都有唔少觀眾睇完都係覺得Victoria係累咗碧咸：「嗰時啲傳媒成日報道佢地啲負面嘢，原來都係老作多，難怪佢老婆成日都黑口黑面，佢哋兩公婆人前人後承受咗幾多嘢，旁人真係唔會理解到，而家睇完就明白多少少」、「咁多年後睇番轉頭就覺得佢老婆好撐佢，但當時嘅球迷真係唔會咁睇，只會係佢比條女帶壞」、「本來唔鍾意Victoria，睇完對佢改觀咗！對住狗仔隊唔黑面都幾難！」、「不論係碧咸事業上，定係同Victoria 婚姻上面對既壓力，2人一齊走過荊棘，高低起伏 ，都好唔容易，好值得睇同學習！佢地2個都好tough!」、「Victoria同佢爸媽嘅支持都係碧咸企得番起身嘅原因」、「睇完都係好憎佢老婆」、「睇到好多位就係佢老婆淨係諗自己，碧咸永遠都就佢」，不過有網民就認為Victoria之所以有唔好的一面都同碧咸出軌有關：「我諗婚外情都有關係，個心有條刺。」
碧咸傳︳3.人生比電影故事更戲劇張力 抗壓性好勁
《碧咸傳》最多人評價就係估唔到碧咸傳除咗碧咸好睇之外，就係碧咸的人生都咁誇張咁好睇！好多人唔知以為「萬人迷」碧咸一直都順風順水，娶咗個有錢老婆，完美家庭。但其實碧咸曾經成為過英國全國公敵，一沉百踩仲要被唾棄，經歷過高山低谷。成個人生都充滿住戲劇元素，網民指呢套紀錄片根本唔駛點鋪排同剪輯，就咁講返碧咸成個人生已經好睇過好多電影：「而家睇返，先知碧咸以前有幾硬淨，嗰陣佢都只不過係個廿零歲嘅𡃁仔啫，換著好多後生仔，淨係俾女飛都夠佢哋死好多次，佢就俾成個國家嘅人吐晒口水指住鬧都仲頂得順撐得過，真係唔到你唔服。抵佢發呀」、「靚仔、有實力、內心質素強大」、「好多 Netflix 拍嘅紀錄片都好睇」、「佢內心強大到非人程度」、「個導演係 Fisher Stevens，攞過Oscar Documentary，經過佢剪輯故事發展、切入角度以及音樂安排，呢套Documentary 先會連唔睇波、唔知果段歷史既人（包括我）都覺得好好睇。所以呢套記錄片好睇，唔止係因為DB本身精彩人生，兩公婆好直率同坦白，導演既功力更加功不可抹」、「無乜幾個人既人生有碧咸咁有娛樂性～有高有低」、「有幾下我都喊左，包括佢一夜俾人賣走，佢話打極電話費爺都唔接呢幕，同埋佢一幕話佢內心仲係愛費爺，但鏡頭一轉，費爺話唔可以同球員有感情，一熱一冷，好體會到碧咸那種傷感」、「見證碧咸嘅足球生涯點開始到完結，佢係最低潮嘅時候都沉着面對，好鍾意睇啲舊隊友對佢嘅愛護，佢絕對值得擁有到而家都仲咁多人鍾意佢」。
