大忙人撈過界 盧覓雪 拍到放蚊

撰文：東方新地｜圖片：新傳媒圖片庫、盧覓雪FB

盧覓雪玩得起

撈得咁風生水氣，其中一個成功因素，絕對係因為盧覓雪玩得起、性格又平易近人，帶住女助手同大班crew喺中環拍嘢，雖然烈日當空流晒汗，不過見到大班人對住Michelle都笑得開懷，就知同佢開工夠晒開心，啲時間就自然特別易過。

Michelle之前成日話當年做記者最開心係job與job之間攝到位行街買嘢，當日畀佢攝到位睇衫竟然都放晒蚊，撈得掂忙過頭，最大犧牲之唔係唔夠瞓囉！

目前身在台中又去咗覓食四方，臨出發前，盧覓雪就拉隊現身中環拍嘢。

去到邊都帶住笑容、笑聲由街頭響到街尾，隔住條街都睇得出，一班工作人員跟住Michelle開工好開心。

盧覓雪以前話過做記者妹時，最開心係跑新聞中場有得攝位行街，呢日都畀佢攝到位等埋位時睇吓衫先。

不過今時今日係大忙人仲撈過界賣曲奇，所以一路睇衫一路都放蚊。

盧覓雪 孖辮小甜甜

盧覓雪演過唔少醜角，但原來佢都好貪靚，早排記者見佢唔使開工，約埋朋友到天后食飯，跟住又行去銅鑼灣I.T.睇衫掃貨，身上着住件花花連身裙，仲紮住對cutie小孖辮，好似小甜甜一樣，十足青春少女look，當堂後生十幾年！