《BB來了》演活刻薄惡奶奶 盧宛茵 惡足45年
撰文：東方新地 圖片 ：新傳媒圖片
《BB來了》演活刻薄惡奶奶 盧宛茵 惡足45年
飾演闊太的「麗貞」Madam Lo一出場就同朋友「唱」新抱，放暗箭，話Ali先斬後奏旅行結婚，唔擺酒令佢做奶奶十分無面！
飾演她奶奶的Madam Lo盧宛茵不時以「生仔就幫手俾首期」，利誘新抱生b，反令李佳芯十分反感。
Madam Lo視Ali如敵人，成日開口埋口話要調教新抱，仲唔聲唔聲換走晒Ali想買嘢湊B用品，真係好唔識尊重人！
因為性格刻薄難相處，間接令徐榮同前妻離婚，又令Ali同黎諾懿成日因為佢而嘈交！
兩個兒子婚姻先後出現問題，Madam Lo都歸究是自己一手做成，但Ali不同意，兩婆媳互吐心底話。Madam Lo承認錯誤，更敵視接近他們的女人。恬兒承諾無論將來如何，麗貞在她心目中都是最好的奶奶。
5歲影相咀藐藐
睇番Madam Lo入行45年，真係演過不少不同類型的角色！
呢張罕見嘅盧宛茵童年照，相中嘅Madam Lo五歲人仔，影相時咀藐藐想開口鬧人咁款，細細個就已經惡形惡相，注定大個專演惡人。
73年《朱門怨》潑辣二少奶爆紅
1973年盧宛茵喺無綫第二屆電視藝員訓練班畢業唔耐，就同吳浣儀畀挑選喺大型戲集《朱門怨》分別演二少奶同三少奶，當年兩個廿歲未夠就要演潑辣巴渣媳婦，結果一炮而紅，套劇紅到拍成話劇同電影版。
73年電視版《朱門怨》
74年電影版《朱門怨》
揸結他冇巴渣
呢張73年影嘅相，20歲嘅盧宛茵著到成個七彩蝦條姐姐咁彈木結他，個樣除咗一啲都唔巴渣，仲好有民歌手feel㖭。
mood爆沙龍相
盧宛茵呢張後生時好有mood嘅沙龍相，呢個回眸眼神夠銷魂，完全顛覆佢喺劇集中惡死能登、牙尖嘴利嘅一貫形象。
75年貂皮闊太
75年即將22歲嘅盧宛茵同師姐呂有慧登上某家庭雜誌封面，由於係兔年，Madam Lo要摸大賓尼兔公仔個頭嚟影，兩人著上名貴貂皮大衣同披肩，顯現闊太氣派。
77年跳槽麗的
盧宛茵77年跳槽麗的（亞洲電視前身），並即時亮相賀年節目，聯同右起：薛家燕、張寶之、張美璉同觀眾拜年，但佢似乎著錯衫，銀白色中式套裝盡顯佢圓潤身形外，新年流流白賴嘥唔多吉利。
75年露底倀雞腳
盧宛茵同吳浣儀憑劇集《朱門怨》爆紅，75年更參演電影《蠱惑佬尋春》做性感風騷女殺手，片中低胸或迷你裙套裝出動，一幕酒樓群揪場面，Madam Lo使出呢招大露底倀雞腳，對手掛住𥄫嘢中晒招，絕對係佢最性感演出。
90年《賭聖》經典砧板胸
周星馳《賭聖》絕對係盧宛茵電影代表作，片中係嫁唔出嘅賣剩蔗，一幕Madam Lo趁星爺令達哥「三叔上身」先天性失控，扯開衫領晒砧板胸色誘對方，惜白費心機，場面夠晒經典。
94年《豪門插班生》扮龔如心
盧宛茵87年重返無綫，喺呢套以嬉笑怒罵手法揭示上流社會眾生相嘅劇集嫁俾地產集團老闆梁家仁，不時以孖辮look示人，一睇就知佢扮華懋「小甜甜」龔如心，造型維肖維妙。
《缺宅男女》演慈母
盧宛茵除咗演惡外母惡奶奶拍案叫絕外，演慈母一樣咁掂，代表作有《戅夫成龍》米珠蓮同《阿旺新傳》丁秀蓮，而最出色一套係2012年《缺宅男女》演廿四孝慈母張美玲，28集猝死一幕令唔少觀眾感動落淚。
老版衛蘭
盧宛茵外表保養得宜，甚至經常被網民指跟衛蘭撞樣！
Madam Lo係置地常客，佢經常喺嗰度食tea，呢次就到置地嘅Harvey Nichols睇化妝品。
入到cafe，盧宛茵先行點菜，不過用老花鏡都睇唔清，要搵職員介紹菜單。
Madam Lo趁住唔使開工，身為置地常客嘅Madam Lo又單拖到置地入化妝品，睇真啲，佢呢日着住一件黑色連身裙襯上一對露趾膠拖，明顯經過悉心打扮！
