【一人一票】一見到呢啲畫面即刻眼濕濕 網民盤點10大沉重電影畫面
撰文：占士│圖片來源：電影截圖、Youtube
一見到呢啲畫面即刻眼濕濕
網民盤點10大沉重電影畫面
每個人對於好電影嘅準則都未必一樣，不過有啲電影就獲得巴打們一致肯定，大讚呢啲電影嘅沉重畫面令人非常難忘，就算隔咗好多年再睇返，都忍唔住想喊咁話呀。
1.《再見螢火蟲》
講到最沉重嘅電影畫面，不得不提嘅有《再見螢火蟲》。相信當年有睇過呢套經典動畫嘅人都會被感動到眼濕濕，而導演高畑勳之所以能夠寫到一個如此打動人心嘅故事，原來同佢自身經歷都有關。據知高畑勳細個時曾經歷空襲，而《再見螢火蟲》嘅空襲場面正正就係導演小時候嘅經歷，好彩導演能夠死裡逃生，如果唔係大家都欣賞唔到呢個咁經典嘅電影。
2. 《搏擊會》（《Fight Club》）
一班00後嘅年輕人可能未睇過呢部1999年上映嘅美國血腥黑色喜劇電影《搏擊會》，呢部電影唔止劇情充滿張力，最後故事一個神轉折更加令呢部電影被捧上神枱！雖然隔咗接近20年，但一班巴打再次重溫呢一幕都仍然覺得好激動！
3. 《狂野時速》系列（《Fast and the Furious》franchise）
《狂野時速》唔止係動作戲拍得好睇，連當中講手足情嘅文戲一樣令人為之動容，尤其係由Paul Walker扮演嘅Brian O’Conner呢一幕，真係個個影迷睇到都覺得好沉重呀！
4. 《西遊記大結局之仙履奇緣》
作為最經典嘅港產片之一，《西遊記大結局之仙履奇緣》當然有唔少場面都被人大讚！唔止係笑位㗎，當中有唔少感情戲都令大家睇到心有戚戚焉，尤其係最後由周星馳扮演嘅孫悟空見返已經轉世嘅紫霞時，附身喺同自己好似樣嘅男仔身上，實現自己五百年前承諾嘅呢一幕！
仲有網民將呢部電影嘅經典橋段剪埋一齊，加埋呢首〈一生所愛〉，都感動到唔少巴打。
5.《鐵達尼號》（《Titanic》）
「You jump, I jump.」呢句你跳我又跳就係《鐵達尼號》嘅經典對白，當年仲俾唔少人拎嚟講笑，但最好笑嘅可能都係電影尾聲，由Kate Winslet扮演嘅Rose同Leonardo DiCaprio扮演嘅Jack喺遊輪沉沒後難捨難離嘅一幕，因為塊木板明明夠兩個人上……
6.《哈利波特－死神的聖物2》（Harry Potter and the Deathly Hallows – Part 2）
《哈利波特》系列拍咗咁多集，至《哈利波特－死神的聖物2》終於去到尾聲，班粉絲都覺得好唔捨得。而令班影迷更加心痛嘅，就係呢個一開頭似係大反派，但原來係個大好人嘅石內卜之死。
7.《反斗奇兵3》（《Toy Story 3》）
胡迪同巴斯光年唔單止係陪住男主角安迪長大，亦係唔少80、90後嘅童年回憶。去到《反斗奇兵3》安迪亦終於長大，將陪伴多年嘅玩具一隻一隻咁送俾小女孩Bonnie，最後安迪遲疑咗吓先將去胡迪送俾對方。胡迪目送安迪架車開走嘅呢幕，就成為唔少巴打絲打嘅經典。
8. 《盧根》（《Logan》）
相信有留意開超級英雄電影嘅一定都有睇《盧根》，電影未正式上映前，扮演狼人嘅Hugh Jackman已經宣布呢次會係佢最後一次飾演呢個經典超級英雄時，班影迷已經紛紛猜測狼人會唔會喺電影中離世。雖然大家一早做好哂心理準備，但到真係睇到呢一幕時，都真係好沉重呀。
9.《心跳500天》（《(500) Days of Summer》）
要拍一部經典電影未必要吓吓都要幾千億成本咁，好似《心跳500天》呢啲看似簡單嘅愛情片一樣可以成為經典。冇三角戀、冇大灑狗血，樸實嘅愛情故事令一班巴打都投入到，呢一幕連人樣都冇影到，只係簡單嘅拖手仔，同樣係大家心目中公認嘅經典畫面。
10.《29+1》
你冇睇錯呀，呢套《29+1》都有網民公認嘅沉重場面，當中鄭欣宜話：「不如我們……做愛吧！」嘅呢一幕令到一班巴打都覺得好沉重， 不過呢種沉重同上述嘅沉重有咩唔同呢？大家不妨細心諗吓。
