當奴遇襲內幕 的哥追女神不果 疑報仇洩憤
廣告
昨晚42歲商台DJ當奴(唐劍康)、27歲DJ Colin同28歲商台同事Jacky，到九龍城一茶餐廳晚飯時，突然遇襲，三人均受傷需送院。據知今次遇襲事件，懷疑跟一名瘋狂男fans有關！事後DJ Colin表示，出發時已發現途中被一男子跟蹤，Colin更指出，認得該男子就係一直癡戀DJ麻利嘅瘋狂fans，本身做的士司機，除了經常去商台等麻利收工，更曾跟蹤麻利及其他商台DJ！因此，懷疑今次遇襲內幕，因的哥追女神不果，疑報仇洩憤！不過，原來商台女神麻利勁多優點，難怪令的士哥着迷！
由於的哥行為過晒火，全台亦得知此事後，為了麻利安全，其他同事都好心陪伴麻利亞出入，以防萬一！據知，Colin曾為同事出頭，勸喻該名的哥唔好再跟蹤麻利，懷疑有人因此懷恨在心，跟蹤至九龍城茶餐廳向Colin施襲，當奴便無辜捲入事件而慘被扑傷頭！
Jacky
幸冇大礙
當奴好友兼拍檔少爺占亦趕到醫院探望，得知當奴傷勢並冇大礙，終放下心頭大石！之後，頭部及左手包紮繃帶嘅當奴會見傳媒，問到之前有否受的哥騷擾，當奴說：「冇！就係冇我份，被騷擾嗰位唔係我，我只係聽聞過，咁我哋叫被(瘋狂聽眾)騷擾到嗰班同事小心啲，點知自己今次就瀨嘢喇！」
再被行兇者施襲時有否講過原因，當奴表示：「冇呀！使乜原因，咩都冇講，我都唔識佢嘅，(但你又知佢係騷擾同事嗰位聽眾？)見到佢揸的士，因為知個狂迷係揸的士！」
女神麻利真身
被的哥癡戀嘅DJ麻利，原名鄧慧妍(Maria Tang)，現為商台叱咤903節目主持人，另負責管理my903 forum。曾就讀嘉諾撒聖心小學下午校、嘉諾撒聖心書院，於中學會考取得28分，後升讀中文大學新聞與傳播學院，絕對係高材生。2009年出道至今，曾主持《萬世巨星》、《叱咤叱叱吒》、《麻利有隻小綿羊》等節目，現時逢周一至五，跟Do姐鄭裕玲及余迪偉主持《口水多過浪花》，周日solo主持《Mali Mali Home》。
