編輯：東方新地 ｜原文：Sunday kiss｜圖片：Instagram、Facebook

盛品儒陪產 報漏B囡資料

前亞視高層盛品儒(James)太太蔡一鳳(Michelle)日前誕下龍鳳胎，James接受傳媒訪問時表示人生新嘅一頁開始，覺得好開心，但榮升做爸爸都有壓力，所以會努力做好呢個角色！問到幫bb剪臍帶感受？佢形容：「我覺得有啲似剪腸粉咁……不過硬啲，好特別，好有成功感。」

不過起初他向外只提了BB仔嘅資料，未有提及自己重有一個B囡。事後他又解釋：「仔真係得一個喎！」咁你又啱嘅，但唔少網民就話佢重男輕女。

陳曉東 緊張到失憶

歌手陳曉東入產房已經有一次經驗，但第二次入產房依然騰雞！太太王妤嫻誕細女陳芷怡時，出門口又忘記了穿鞋，而原本計劃帶相機入產房，最後相機無帶之餘，都只好用手機影相。真係笑料百出！

陳柏宇老婆穿羊水無拎走佬袋

歌手陳柏宇（Jason）於個人社交網宣布與老婆符曉薇（Leanne）嘅愛情結晶品囡囡Abigail出世！當時老婆穿羊水，陳柏宇繼續瞓唔理自己，Leanne唯有自己打畀醫生求助，醫生聞言即叫佢入院，然後：「我入房拍醒條粉蛋，出門口嘅時候我仲同佢講，攞埋個走佬袋出去，點知佢同我講話唔使，佢話唔似有啲乜，人哋拍戲嗰啲唔係咁，如果真係要生嘅先返嚟攞，最弊嘅係我竟然聽佢講。」

陳柏宇陪產扮醫生

安全到達醫院之後，去到醫院姑娘檢查完確實係穿羊水，即刻call醫生返嚟接生。Jason當時仲以為老婆未省得，好得戚咁同姑娘開玩笑：「條粉蛋仲同姑娘講，乜同拍戲咁大分別嘅，乜穿羊水咁平淡，姑娘同佢講嗰啲係做戲。之後入到手術室門口，條粉蛋換完套藍色手術室衫出黎，好正經同我同姑娘講，你好我係今日嘅醫生，呢個時候麻醉科醫生行過嚟，同我哋介紹自己，點知條粉蛋好厚面皮咁講，原來你係醫生，我以為我自己係醫生，啲醫生護士喺度好開心咁樣笑，仲同我講你先生好搞笑，我問番佢哋搞事定搞笑丫，之後我就推入手術室。」令Leanne哭笑不得。