生日P送吻 湯洛雯認與羅天宇發展中

湯洛雯羅天宇《愛．回家》擦出愛火

湯洛雯首次演出的劇集《愛・回家》，當中佢飾演思思一角深受觀眾歡迎，清純鄰家女孩形象相信大家都仲記得。而靚湯亦因為此劇與飾演馬子仁的羅天宇傳出緋聞。雖然二人並冇正式承認，並一直聲稱了解中，但大家早已認定佢哋係一對！

堅稱「了解中」

靚湯與羅天宇一直了解中，期間多次被被傳媒拍到佢哋睇戲約會。雖然羅天宇有個外號叫「女神殺手」，但「靚湯」看來沒有介意，更力撐羅天宇好仔！事關有報道指，羅天宇已經見過女方家長，而「靚湯」大讚羅天宇專一好仔，看來二人發展十分穩定

湯洛雯吻賀壽星仔羅天宇

剛過去的10月1日係羅天宇30歲生日，男人三十而立當然要好好慶祝，邀請多位圈中好友如陳瀅、劉佩玥及何廣沛等在其紅磡寓所開P。其中靚湯以女主人身分企正壽星仔身旁影相，連靚湯妹妹Cassandre亦有現身，可見兩家人關係融洽。而重點係，慶祝到興起之際，靚湯為捧著蛋糕的羅天宇送上深情一吻，冧爆一幕被拍下在網上流傳，男粉絲們真係心碎了！

湯洛雯認與羅天宇發展中

昨日靚湯出席《big big channel 失驚無神賀中秋》活動，被問到與羅天宇開P時咀嘴，係咪正式公開戀情？靚湯表示「冇話公唔公開嘅」，因為早幾日已同大家講係發展中，而當日開P咁開心，所以就俾個Kiss對方，靚湯仲話其實好尷尬！

另外靚湯又強調兩人係啱啱開始發展，未去到談婚適嫁、見家長的階段，所以兩人都希望保持低調，等更穩定後、有結婚念頭後先公開。不過佢哋現時未有呢個打算，都係以工作為先！

全文完