甄子丹天價人民幣片酬曝光回應內地藝人逃稅風波

天價片酬高達1億元人民幣唔怕加稅

早前有傳甄子丹嘅拍戲片酬高達1億元人民幣，被問及近日有指內地方面將大輻增加拍戲稅項，非常正氣嘅丹爺就話呢啲政策都係針對唔用心拍戲或錢銀用途不正當嘅人，自己就好公開透明嘅！

講起自己嘅高價片酬，甄子丹就話一向同四大公司合作，包括黃百鳴、寰亞、英皇、王晶，每部戲都有不同製作費。丹爺就唔認同嗰啲話製作費俾晒演員片酬因此縮小製作嘅講法，最緊要都係取得平衡。

最近除咗打擊逃稅，內地電影方面都有抵制高價片酬嘅傳聞，甄子丹就直指，電影業就同其他行業一樣，都係多勞多得啫！吸金力十足嘅丹爺就話最緊要唔犯法，交該交的稅。

電影《大師兄》係王晶與甄子丹合作嘅作品，仲係丹爺自己嘅超級子彈有限公司嘅首部製作，佢自己梗係瞓哂身啦，一人身兼出品人、監製、主演！但係呢套作品竟然唔係動作片，而係貨真價實嘅校園教育片？！

甄子丹坦言，拍攝校園片令唔少投資方都擔心，怕製作唔夠商業會蝕啦！仲要係電影公司嘅頭炮作品，睇嚟都有啲票房壓力喎！

台灣女星陳喬恩亦係電影中嘅另一位主演：

其實之前電影《大師兄》仲好威咁成為加拿大蒙特利爾奇幻國際電影節嘅閉幕電影，同時入選一個重要賽項「CHEVAL NOIR COMPETITION」競賽，最後電影上映現場座無虛席！

甄子丹都好老實咁講，其實知道發行商都偏好自己拍動作戲，但拍攝教育類嘅電影一直係佢嘅夢想，想好好運用自己嘅影響力，藉著輕鬆嘅校園片傳遞正面信息。

今次甄子丹講明係抱著冒險心態，而可以說服唔同投資方去支持拍攝，實屬不易。

電影更大膽起用唔少新人嚟飾演學生，話係為咗可以演出學生純真、真誠嘅感覺！

首映會當晚更有唔少圈中人到場支持，有啲仲著上校服添啊！包括楊婉儀一家、呂良偉、方力申、黃百鳴、丁子高、琦琦、雷莊𠒇、張秀文、伍樂怡、林嘉華等。

雷莊𠒇與詠春師傅結伴到場，話過會去荷里活發展嘅佢，表示今次返香港會逗留一個月，之後會返加拿大，未知係咪同月尾港姐競選有關呢？

關鍵詞