【延禧攻略】瓔珞上位之路 吳謹言硬啃名製片
撰文：東方新地｜圖片：微博、劇照及截圖
吳謹言 用盡方法埋身
電影界有晶女郎、星女郎同謀女郎，女星但凡黐到金牌製片得獎導演，正如王晶、星爺同張藝謀，就等於泊到好碼頭、前途必定一片光明。同樣電視界都有「正女郎」，有「于媽」之稱的內地金牌製片人兼監製于正眼光獨到、擅長改編名著同歷史長劇，前有《美人心計》林心如、《神雕俠侶》陳妍希同《宮》楊冪，捧邊個紅邊個，去年簽得二線尾三線頭、北電本科畢業生吳謹言在手，果然紅人公式再次奏效，如今《延禧》同女主角吳謹言紅遍中港台，風頭無兩。
據悉早於《神鵰俠侶》籌拍時期，于正已經睇中尚未畢業、仲係北京電影學院學 生的吳謹言出演小龍女一角，不過舊東家唔放人，最後合作不成。其實未畢業，吳謹言已經憑獨有氣質同乖巧個性爭取不少大片演出機會，不過扮醜演村姑出演馮小剛《老炮兒》、一人分飾兩角同陳鍵鋒合作《烽火佳人》，雖然賺得經驗，不過片酬偏低、後續人氣亦不濟。為求突破去年與舊公司約滿，即反撲于正懷抱。據知情者透露：「吳謹言係醒目女，錯失咗做小龍女角色，佢知道要把握機會，佢都用咗好多方法埋于正身，好快就攝到位做頭寵！」雖然係內地最有影響力製片人，不過于正試過被瓊瑤告抄襲、試過同林心如拍完劇即反面，仲出晒名霸道專橫，兼且其貌不揚，雖然惡啃，最緊要都係有隻點石成金金手指，萬大事，上咗位先至講！
超抵價簽四劇
據悉吳謹言以超抵價轉投于正旗下經理人公司歡娛文化，繼《延禧》後已經連拍四套古裝巨製，仲套套都擔正，當中亦都包括臨時寫劇本、添食的六集《延禧攻略》番外篇，繼《延禧》後，吳謹言有排紅。
花旦搖籃
40歲的于正是內地名製片，編過唔少經典劇，當中唔少花旦拍佢劇而走紅。包括《環珠格格》年代紅到發紫的林心如，不過打後其事業停滯不前遠遠不如老拍檔趙薇，10年林心如主演于正電視劇《美人心計》再創事業高峰，不過合作完後即告不和，近年疑似已破冰。
由童星做到四小花旦，楊冪事業高峰一樣係靠于正帶起，先憑《美人心計》配角吸睛，再擔正于正《宮》，紅透兩岸。
有傳于正當年拍《神鵰俠侶》本來屬意吳謹言，結果都係為知名度改用陳妍希。雖然包包面的陳妍希版小龍女負評滿天飛，不過收視一樣高企、更促成陳妍希同男主角陳曉美滿婚姻。
執三攤
于正出名盲撐自己人，歷年套套劇都專捧旗下愛將，開拍《延禧》選角時，正是因為袁珊珊滿約、楊蓉拒拍，至令吳謹言成功坐正。
同場加映：演繹一代女神林徽因 吳謹言 獲讚激似呢位女星⋯⋯
憑《延禧攻略》爆紅嘅吳謹言，在本月20日開始在港上映嘅新片《無問西東》，客串民國才女林徽因一角，雖然戲分不多，但就獲網民激讚神似一位知名女星！
2010年出道嘅吳謹言，在2012年拍攝電影《無問西東》，但電影疑因涉及過多歷史敏感議題而被禁播，直至近日經過重新剪輯後才能順利上映。
吳謹言 六年冇走樣
雖然經過六年時間，但睇吳謹言片中造型，五官相差不大，仲好有才女氣質，同《延禧攻略》「魏瓔珞」一角相比，別有一番風味。
戲中飾演一代文壇女神「林徽因」嘅吳謹言，著上民國裝扮，妝容較清淡，但眼神堅定溫柔，面容顯得較圓潤，同正版「林徽因」一樣咁有氣質。
網民仲激讚吳謹言樣貌神似電影女主角章子怡，更期待二人將來會有機會再合作。
吳謹言擔正惹網民不滿因太靚被監製剃眉！
其實自《延禧攻略》播出後，擔正女主角的吳謹言一直備受外界爭議，事源有網民指吳謹言無論是演技抑或顏值，均輸給劇中其他女演員，仲話女主角似演反派角色，皆因其外貌生得夠刻薄。
但資深編劇及製片人于正就曾於訪問中，直言覺得吳謹言太漂亮，所以女主角自然是以她作首選！
吳謹言被監製剃眉
于正就表示由於女主角的性格較剛強，而且是個有想法及主見的女生，所以決定將吳謹言的眉剃去！而吳謹言亦為配合角色，要放棄平眉。
剃去原本天生的眉毛後，由本來的平眉轉為上揚的眉形，為的就是要看起來很有自信，以配合角色性格，唔知大家覺唔覺得吳謹言自信咗？
《延禧攻略》吳謹言擔正四大原因
至於于正對於吳謹言一直有讚冇彈，原來亦有4大原因可以作解釋的。
1. 長相不甜美
劇中女主角魏瓔珞從宮女做起，個性堅強，對於被欺負絕對不會默默忍讓，有膽量之餘，敢說又敢做，故于正不希望演員太甜美。
于正亦曾提到不希望女主角太豔光四射，因為甜美的外貌會削弱了瓔珞的性格。
剛好，吳謹言淡雅清麗的外貌正正乎合于正的想法，皆因她能演得一股帶有清麗的氣質。
2. 不為觀眾熟識
原來生面口，亦是吳謹言能成功突圍出演女主角的原因之一。因于正指瓔珞是一個從來沒有過的人設，她必須有一張觀眾沒有看過的臉，而吳謹言正乎合此要求。
吳謹言現時27歲，2009年考上北京電影學院後，2011年正式簽約公司入行，至今演過近20部電視劇及電影，但直到《延禧攻略》才真正第一次擔演女主角！
就算是內地的觀眾亦對她一直印象不深，難怪于正會揀選她做今次劇集的女主角。
3. 演技精湛
于正曾以「精緻靈動，嬌俏如你」來讚賞吳謹言的演技，縱然她之前多數只演配角，未曾擔正，但今次吳謹言就憑精湛演技，將魏瓔珞一角完美活靈活現。
吳謹言拍攝劇集時態度認真，難怪她能因劇集而聲名大噪！
4. 選角緣份
就最新于正所言，選中吳謹言擔正其實都係有命運嘅安排！
各花入各眼，吳謹言靚唔靚就唔知大家點睇，但佢已憑《延禧攻略》爆紅，相信吳謹言今後會有更多觀眾認識！
