王灝兒：「你頭先話係你個Ex！」 大爆宅男女神係吳業坤前度
撰文：東方新地｜圖片：Instagram
王灝兒爆宅男女神係吳業坤前度
噚日，王灝兒（JW）就喺個人社交網上載一段限時動態片，片中就tag咗吳業坤同好姊妹何超蓮。片中一開首，JW就即刻問坤哥：「你頭先話超蓮係你邊個話？你個Ex（前度）呀？」
聽完呢句，相信大家個心都已經離一離之餘，可能仲會以為自己聽錯！好在，坤哥就馬上嗌唔係，但眼神就好似有啲恍忽。
雖然坤哥否認JW所講嘅嘢，但JW就繼續爆料，話：「你頭先話係你個Ex喎！」不是吧！有冇人會信先？
JW講到真有其事咁，結果令到坤哥都馬上再次澄清：「係Ex夢中情人！」真相大白！如果唔係真係嚇親唔少網友！
吳業坤勁識氹女
其後，JW又點會咁輕易就放過坤哥呀？JW就繼續問對方係咪依家唔鍾意啦？吳業坤就話：「JW正啲！」嘩，咁識氹人開心，難怪令JW笑唔停，果然係個溝女王呀！
吳業坤同家燕姐都傳緋聞
話說逢女都冧、魚翁撒網式媾女，合作親都傳緋聞，無堅不的吳業坤早前再下一城，同67歲家燕姐去到台灣拍新年特備節目都竟然「撻得著」！
人人叫「家燕姐」，佢叫「阿燕」，人人對前輩恭恭敬敬，佢竟然夠膽死當家燕姐係𡃁妹咁撩，爭住食家燕姐口水尾、食完話可以間接接吻、仲冧到爆話「仲有餘溫」㖭！
即係咁，有觀眾都睇唔過眼坤哥對住長輩冇禮貌，不過冧女嘅嘢你哋就真係有排都未去到坤哥境界，重點係氹到佢口中的「家燕」、「阿燕」好開心！坤哥，你又得咗喇！
王梓軒和糖妹大爆坤哥有收集家燕姐唇印嘅癖好，例如家燕姐飲水後在保溫壼留下唇印，坤哥九秒九拎起手機影低。
爭住食口水尾，仲話同家燕姐間接kiss，坤哥呢啲係逢女撩天性定為節目效果真係要問番本人至知。
吳業坤想追家燕姐大女？
話說早前吳業坤到新城接受家燕姐訪問，當時家燕姐曾笑稱勸坤哥唔好成日口花花，咁唔知家燕姐會唔會向坤哥介紹女仔？坤哥呢個時候竟然搶答：「珊珊 (家燕姐大女石祐珊)吖嘛，我電話都攞埋啦！」
見慣大場面的家燕姐都當堂窒一窒，仲話感情事要慢慢來！
家燕姐咁樣回應…
家燕姐呢日出席節目《流行經典50年》錄影，被問到與吳業坤的緋聞，家燕姐笑稱根本係誤會，話坤哥只係口花花，並無實際行動。
咁坤哥係咪想追其大女石祐珊呢？家燕姐就解釋係珊珊擔心兩人的緋聞，所以send訊息叫坤哥唔好亂嚟！正因為咁坤哥先會有珊珊電話。
無論家燕姐又好、珊珊又好，坤哥都係收吓把口比較好，唔好亂嚟啦！
坤哥收入十級跳 秘密搬去貝沙灣
坤哥靠「毒男」形象上位，拍戲唱歌廣告登台都有佢份，收入增加，而當年佢喺台慶更加扮一隻棋而成為話題！坤哥入行初期住喺樂富屋邨，之後上年畀本刊影到佢搬到大圍私樓，估唔到今年十級跳，搬去南區豪宅貝沙灣，真係財來自有方！
公屋搬風水屋
坤哥本與家人同住樂富橫頭磡邨公屋多年，最近租住新居大圍恆豐花園，20年樓齡，單位採三房兩廳間隔，800多呎，另有工人房及士多房，仲有埋會所，月租兩萬算好抵住。
吳業坤 麥美恩「出火」放煙花
吳業坤、麥美恩、歐陽偉豪(Ben Sir)及季蘋蘋早前到台灣拍《Ben Sir睇樓團》節目，夜晚就去咗墾丁出火風景區玩，眾人喺觀景區內大玩俗稱「仙女棒」的煙花！
而季蘋蘋事後晒合照，坤哥、麥美恩還分別在IG及Big Big Channel上載玩煙花的片段，見到片中眾人拎住煙花玩得相當盡興，麥美恩更超興奮用煙火整心心嘅效果！
好多人去台灣墾丁，都一定會去位於屏東恆春附近的國家公園「出火特別景觀區」，由於恆春半島地底蘊含豐富天然氣，所以嗰度地面終年有火焰噴出地面，形成「出火」奇觀。為保遊人安全，當地豎立「禁止進入」的標語﹐不過好多遊客都無視「禁止燒烤、踏入火源區」等地警告標語，企喺禁區內玩煙火、烤雞蛋、整爆谷⋯墾管處長劉培東表示，在「出火」玩火，係違反國家公園嘅禁止事項，可被判3,000元新台幣（約818港元）。
其實2013年台灣電視台就新聞報道指4月份有香港遊客到出火風景區遊玩時，喺公園禁區內放煙花同燒爆谷，片中三人名遊客，原來係阿感黎國輝、曾參加《超級巨聲》的周志文和駱胤鳴。
駱胤鳴事受接受訪問話：「當時唔知呀（犯法），現場有好多人喺度玩，係當地導遊帶我哋買煙花同爆谷，再帶我哋去呢個地方玩。」只能夠講句：人類總是犯同樣的錯⋯
