王灝兒分享與女神合照秘訣 兩招不被對方搶鏡！
撰文：東方新地｜圖片：王灝兒Instagram
王灝兒分享與女神合照秘訣
日前，JW喺友人嘅婚宴上遇到「網絡女神」倪晨曦，講到明人哋係女神，自然同框下會擔心被對方擔鏡！不過，JW就同大家分享兩招「如何與女神合照亦唔會顯得太樣衰」嘅方法！
兩招不被對方搶鏡
JW就上載咗兩張同Elva嘅合照，並留言：「圖1）超級三七面 圖2）企到勁遠，顯瘦」，認真搞笑！相信大家今次又學到嘢啦！
王灝兒吳業坤恭喜陳柏宇誕千金
日前，王灝兒(JW)就同吳業坤出席粵港澳大灣區青年節暨孔聖誕日活動，當提到二人好友陳柏宇（Jason）啱啱正式做人老竇，JW就大讚Jason成家都好Sweet，坤哥就話佢哋一家好Warm，並同時恭喜對方。
吳業坤人生清單
另一方面，坤哥講到自己終於有機會唱到劇集主題曲感到開心，指自己人生中嘅夢想清單入面，有好多希望做嘅事都做到，希望之後亦會繼續有更多機會做到想做嘅事。
之後，提到坤哥喺拍劇時「受寵」，佢就笑指嗰晚係佢拍最後，而且佢同啲化妝、整頭嘅姐姐都好熟，所以先會令人誤以為有男一嘅待遇。
王灝兒唔願撮合超蓮同坤哥
其後，有傳媒追問起早前JW爆坤哥「前度」係超蓮時，JW即刻對呢件事認錯，指其實佢同坤哥成日都會講啲無聊嘢同亂講嘢，嗰次只係想講EX夢中情人，不過可能大家聽到EX就敏感啲。
至於會唔會支持坤哥追好友超蓮，JW堅決話唔支持，更加冇咁嘅諗法，之後坤哥指係因為時間問題！不過，JW聽到之後就馬上話完全冇時間關係，係大家都唔係大家杯茶，更透露超蓮事後都有問佢發生咩事。
王灝兒爆宅男女神係吳業坤前度
噚日，王灝兒（JW）就喺個人社交網上載一段限時動態片，片中就tag咗吳業坤同好姊妹何超蓮。片中一開首，JW就即刻問坤哥：「你頭先話超蓮係你邊個話？你個Ex（前度）呀？」
聽完呢句，相信大家個心都已經離一離之餘，可能仲會以為自己聽錯！好在，坤哥就馬上嗌唔係，但眼神就好似有啲恍忽。
雖然坤哥否認JW所講嘅嘢，但JW就繼續爆料，話：「你頭先話係你個Ex喎！」不是吧！有冇人會信先？
JW講到真有其事咁，結果令到坤哥都馬上再次澄清：「係Ex夢中情人！」真相大白！如果唔係真係嚇親唔少網友！
吳業坤勁識氹女
其後，JW又點會咁輕易就放過坤哥呀？JW就繼續問對方係咪依家唔鍾意啦？吳業坤就話：「JW正啲！」嘩，咁識氹人開心，難怪令JW笑唔停，果然係個溝女王呀！
