王浩信孖囡囡打羽毛球陳自瑤繼續晒獨照

陳自瑤王浩信最後大龍鳳

能共患難與富貴，並非人人都做得到，王浩信與陳自瑤(YoYo)近年多次傳婚變，空穴來風未必無因。YoYo婚前一直受無綫力捧，與王浩信結婚生女後，她甘願做個平凡花旦，睇住老公由三線攀上視帝之位，但夫婦之間距離卻愈來愈遠。為了王浩信的形象與發展機會，YoYo對老公在外的緋聞一直逆來順受，每次有負面新聞，她都願意企出來做大龍鳳，事實卻是有苦自己知。

為個女啞忍

今次二人再傳婚變，不少圈中人都不感意外，據知陳自瑤一直好想挽救段婚姻，自己幾唔開心都好，都陪Vincent出嚟硬撐，結果老公順利拎埋視帝，但關係就未見好轉。Vincent 表面上話想同YoYo 生多個又承諾帶佢去旅行，全部都係得個講字。YoYo為咗個女好唔忍心，亦畀咗好多次機會Vincent，可能聚少離多，佢終於諗通再勉強落去都係冇結果，所以一返香港就同Vincent講清楚，仲叫佢即刻搬走。

陳自瑤痛心控訴

六年半婚姻，只有陳自瑤單方面努力向前行，結果徒勞無功，上月底YoYo情傷爆煲，選擇在社交網連番出文作出絕望控訴，先說：「多麼忙不重要，忙甚麼才重要！一次重要的抉擇勝過千百次的努力！今天的生活是由三、五年前選擇決定的，而三、五年後的生活是由今天決定的。」而之後另一篇「圓規論」則講到「你為甚麼不能圓夢？因為心不定，腳不動。」所有言論似是衝著王浩信而來，暗示夫婦關係已不復再。

YoYo否認同王浩信離婚

與王浩信傳出離婚消息後，YoYo早前出席馬鞍山一個活動，親身為事件解畫，YoYo一口氣提出三點澄清：「一直首先，冇提出過離婚；第二，我冇趕老公出門口；第三，我小朋友依然同我哋住一齊，好多各方面新聞，覺得唔係事實，亦覺得好笑。」

堅信王浩信會買樓贈自己

王浩信去年5月話打算買樓氹老婆陳自瑤，目標瞄準豪宅地段淺水灣，當時王浩信回應話距離目標尚有距離。一年後他榮升視帝，又話會代囡囡送禮物俾太太，就係獨立屋！但上月24日，王浩信以3306.6萬，購入清水灣傲瀧11座高層B單位，實用面積1,837呎，呎價1.8萬元。但呢個單位送畀媽媽，陳自瑤冇份，更有傳買樓一事太太全不知情。亦有傳王浩信故意唔寫太太名，他日離婚時不會被分身家。

YoYo澄清：「絕對冇，我係知道，我想話俾大家知，作為子女，送禮物俾父母係應該嘅事，點解大家要咁樣大造文章？佢（王浩信）係應承我，但係未必係o依家。我好多謝佢送咁厚禮俾我，我係好開心，相信佢應承咗我嘢，係一定會做，只不過今次係作為仔女，首先要孝順咗父母先喇，係咪？我覺得好應該，好正常嘅事。」

冇分居但承認一個住樓上一個住樓下

問到係咪已分居？陳自瑤話：「冇分居，(樓上樓下住？)其實係冇呢件事，不過可能係佢有個office，佢依家除咗拍戲工作外，仲有一啲生意，所以搵咗個地方做office，當然喺屋企唔方便，可能因為一件咁樣嘅事，令到大家有咁樣揣測。」即係樓上樓下？「係呀，我知道今日會見大家，所以咪希望一次過講，唔再再逐回應。」Yoyo拒用「恩愛」形容同王浩信夫妻關係，話只係「老夫老妻」。

少在IG放閃

YoYo同王浩信早年不時晒恩愛合照，但近兩年少之又少，加上YoYo近月連發出充滿正能嘅post，包括上月30日呢句：「圓規為甚麼可以畫圓？因為腳在走，心不變。你為甚麼不能圓夢？因為心不定，腳不動。奇蹟，還有個名字叫努力！」「最大的放生是放過自己！」結果惹人猜疑！

YoYo解釋：「其實一直寫嘅係文章分享，如果針對文章嚟幻想另一啲嘢，copy前copy後嚟講，係斷章取義，我冇咁嘅意思。(會唔會考慮放多啲夫妻合照放閃？)其實我哋不嬲都少post嘅，加上呢排我又要拍劇啦。」

YoYo繼續晒獨照

出席活動後一日，YoYo又喺社交網晒靚相，呢次亦同過往一樣係單人照，佢留言道：「Holiday mood……Have a nice Sunday！」相中見到YoYo打扮非常夏日，草帽加黃色花花連身裙，轉身甜笑晒玉背，至今吸咗成一萬3千幾like呀！

之後YoYo再分享一張正面照，見到佢托住頭望鏡頭甜笑，仲有杯消暑凍飲，留言「The heart is beautiful and the world is beautiful」，心情繼續靚靚，又繼續發放正能量喎！

今次識做俾like

猶記得去年七月時王浩信與YoYo傳出現感情問題，當時YoYo喺IG上載與女兒的合照，但未見王浩信俾like或留言！後來王浩信接受訪問時開玩笑話：「好大鑊啊！無俾Like都係罪？」，然後澄清自己事後已經補Like，希望家人原諒佢無睇到。今次王浩信就識做啦，有like老婆張靚相！