狂踩女兒男友 三哥苗僑偉揀林峯做女婿

撰文：東方新地

大方回應緋聞

近年為邵氏拍好多劇嘅三哥苗僑偉，早前上無綫節目《娛樂三兄弟》接受衞志豪、區永權同6號陸浩明訪問，面對所有尖銳問題，三哥都暢所欲言，當中包括同三嫂戚美珍嘅愛情故事、同梅姐梅艷芳曾經傳過緋聞，以及五虎嘅秘聞等，佢都大方回應。

驚愛女被搶走

唯獨是講到愛女苗彤，三哥就好大反應，雖然囡囡已經三十歲，但三哥始終覺得個女拍拖就會畀人搶走，仲話諗起都皺晒眉頭，但又覺得個女係時間應該要搵個男朋友，做人老竇真係好矛盾。

日韓男友唔合格

三哥話老婆比較睇得開，三嫂戚美珍會同佢講：「你估你當年媾我我老竇好開心呀？」三哥同囡囡關係好親密，由細到大都好似朋友咁乜都講，至於囡囡嘅揀男友口味，三哥就話𢱑晒頭：「佢鍾意嗰啲類型我都擰晒頭，佢曾經有個男朋友係韓國仔嚟，眼仔曚曚嗰啲呢！我話你搵都唔好搵個韓仔吖大佬，點同老竇溝通呀？到佢散咗我開心到不得了。不過之後仲大鑊，佢搵咗個日本仔，掀起我嘅民族仇恨，真係冇眼睇，是但啦！」

因為文化差異同溝通唔到，三哥希望囡囡揀個同聲同氣，同佢溝通到嘅好女婿！不過女大女世界，老竇揀嘅阿女又未必鍾意，三位主持就即場要三哥喺馬國明、林峯、吳卓羲同黃宗澤四位當紅小生中，畀分揀選最啱心水女婿，三哥一睇四位候選人即話：「呢四位都唔合格嘅，因為我個女見到佢哋會叫uncle，四個佢都識。」如果我個女拖返嚟嗰個係黃宗澤，佢會鬧爆男方：「嘩！你個衰仔媾咗我個女…….」然後作狀揮拳。

畀林峯最多Like

就外表嚟睇，三哥畀馬明最高分，覺得佢夠晒高大；收入呢？佢話：「今時今日緊係林峯啦！過億片酬呀大佬！我都係睇報紙咋！起碼佢屋企都有家底嘛！」性格佢最Like係黃宗澤，因為佢份人輕鬆啲；家庭觀念呢就一定揀吳卓羲，三哥話佢搬咗好多次，但都係帶埋阿媽，肯定吳卓羲係孝順仔。而專一程度，三哥都係揀林峯，因為得佢一個結咗婚。至於生育能力，四個都年青力壯，三哥都唔知揀邊個最，不過最後都係畀Like林峯。

總結：三哥揀女婿，最好似林峯咁有家底同埋講廣東話，不過囡囡長期喺外國生活已經好西化，身邊朋友都係外國人多，應該好難達成三哥心願。