爭取紅館開個唱 陳柏宇 拒除衫騷肌 ：好似做鴨咁！
photo：新傳媒資料庫
陳柏宇 唔係好進取個唱拒騷肌
Jason新歌〈 霸氣情歌 〉，由老友林奕匡及黃偉文(Wyman)分別作曲填詞，Jason透露二人相識多時但卻首次合作，一切都是緣分：「其實半年前佢嚟睇我演唱會，完場我同佢影咗張相，乘機以send番張相畀佢做藉口，攞咗佢電話，問佢可唔可以幫我寫詞。緣份嚟，我本身唔係好進取嘅人，以前對於自己去爭取一啲嘢嘅心態同依家有好大唔同，以前容易啲鑽牛角尖，唔想咁厚臉皮喎、唔想?喎，依家冇咗呢種心態、件事諗得正面咗，就肯踏出嗰步。」有網民覺得Jason事業上經歷過好幾次低潮，佢並唔認同：「我從來都唔當事業嘅成績係一個準則，我從來都冇覺得外界畀我嘅評分係低就叫做低潮，又或者曝光率冇咁高嘅時候又叫做低潮，外界對我嘅睇法、畀我嘅成績，我一向唔係擺喺重點，我覺得自己喺工作嘅過程嘅得着、做得開唔開心行先。」
陳柏宇 對攞獎淡然
去年年尾，唔少人睇好Jason攞叱咤男歌手，結果由吳業坤得獎，未知當事人心情如何？Jason淡然說：「冇乜特別感受，我對呢件事嘅睇法反而多過感受，本身我係咪向獎看嘅人呢？又唔係嘅，民意好、唔民意又好，我覺得支持自己嘅人係咪真心支持自己最重要！好似開騷咁，好多人會以紅館為目標，但如果要揀，我寧願揀喺一個細嘅地方開一個我好滿意嘅騷，好過臨急臨忙、未ready嘅時候，去紅館開個騷，而係完全享受唔到、亦都做到一坨屎咁。」
個唱拒除衫 騷肌：「似做鴨！」
談到紅館開騷，Jason其實一直有計劃，只是未去到可以公布的時候，因講求天時地利。問到如果在紅館開騷，會唔會除衫 騷肌 ？Jason說：「希望唔會囉，我都唔想除衫，除衫好似做鴨，賣唱啫！」至於電影方面，Jason似乎比較少參與，Jason說：「其實有興趣嘅，但始終好似一路都冇機會去做，踏足唔到嗰個圈，呢一刻又唔係鍾意電影多過唱歌，所以如果有戲拍咪拍，冇我咪繼續唱歌。唱歌我都好enjoy，又快、靚、正！」
老婆唔起眼 生B要夾星座
談到當初如何認識太太符曉薇？Jason冧爆說：「拍戲！拍《喜愛夜蒲》，起初第一眼見佢其實唔係Love at first sight、唔起眼㗎！係因為之後我哋一齊玩啤牌，透過玩啤牌嘅過程，認識佢個人，先至開始有好感，慢慢開始發展。(喜歡佢啲咩？幾時認定佢係你太太？) 冇特定一刻認定，係一路相處累積番嚟，我喜歡佢嘅性格，率直、個人真，有可愛嘅時候，有嬲嘅時候，好簡單嘅形容，但兩個人相處之間嘅火花係最重要，再加上我哋嘅磨合係好。生育大計又點？儘快㗎！好得意，佢好想個BB係某一啲星座，所以要夾下啲月份去嘗試造人。」
太太唔恨名牌
至於婚後太太會唔會繼續工作，Jason直言：「希望做啦，我都唔希望一個人去承擔住經濟壓力，我希望我可以多啲時間同小朋友同埋屋企人相處，我唔想因為要養頭家，所以成日都工作、工作⋯⋯」Jason更透露太太從唔奢求要榮華富貴、買咩名牌，只是想多啲去旅行。
Jason點睇「J神」
回顧當初，很多人對陳柏宇留下印象是他當年在商場騷唱《你瞞我瞞》疑有生理反應，「當其時我都唔會肯定係唔係，如果有，我感受唔到囉，我覺得唔係嘅，邏輯上覺得唔係，冇理由又升又跌㗎嘛！」
