熊黛林放低對孖女微胖出巡 大長腿逼爆牛仔褲！
婚後兩年順利懷孕，仲一生就係打孖上，38歲熊黛林自爆剛剛度過人生最滿足生日，因為有六個月大寶貝孖女 Kaylor同Lyvia陪住切蛋糕!身為百億新抱，兩個女又仲細，產後瞓身餵緊人奶剛剛叫停嘅 Lynn 仍未全面復工，只有限度出席零星活動還人情債。Lynn日前放低對孖女出城購物，面圓圓、肚脹脹，昔日大長腿都逼爆牛仔褲， 唔怪得之 Lynn話自己未修身，連磅都唔敢上!
撰文：東方新地｜圖片：東方新地
熊黛林首次公開露面
產後六個月，熊黛林一直未有全面復出跡象，電影同綜藝節目一概推得就推，只需扮靚靚到一到場的公關活動亦幾乎絕跡，直至上周四(11日)才首次公開露面還人情債出席洋酒活動。
剛抱住孖女過完生日的熊黛林心情靚爆，公開話要恭喜舊愛城城成功追仔，又自爆生日正日前同老公遊埠慶祝:「舊年十一月 之後都冇同老公去過旅行，生日前同佢去咗幾日新加坡，生日凌晨至返香港，不過幾日唔見兩個女已經好掛住，終於明白朋友講嗰啲唔捨得出門嘅心情!」
做媽媽後首次攬住孖女過生日，上周熊黛林 38歲牛一，開心分享Kaylor同Lyvia正面 照，兩個粉紅寶貝一個似爸爸一個媽媽， 肥肥白白又精靈!
停工湊女兼湊狗
去年陀住家產百億郭家孫女，熊黛林已經迅速停工安胎，生完半年，雖然話就話要為復工減肥停餵人奶，不過橫睇掂睇，超模身材已經成過去式，Lynn 修身工程明顯放慢腳步，皆因湊住孖女仲有兩隻寶貝北京狗生活已經好充實，百億新抱根本唔急復工搵銀。
熊黛林微胖出巡
Lynn 產後深居簡出，日前本刊難得見到她放低兩個囡囡由司機接載出外購物。Lynn接受訪問時話過陀孖B增磅50磅，半年後減咗一半都未有，連磅都唔敢上，當日她果然打扮隨意、不施脂粉一身幸福肥無所遁形，小肚微脹仲以為二人世界遊完新加坡又要報喜!重點係身形未到最完美，但心情前所未有咁滿 足，Lynn行路都忍唔住甜笑，仲唔係諗住個好老公同對孖女?
延伸閱讀：
熊黛林同5個月大萌爆B女講早晨
早前，熊黛林上載一段B女Kaylor嘅短片喺個人社交網，並留言：「Good morning！Kaylor！（Kaylor早晨！）」片中見到Kaylor望住鏡頭，對眼勁大之餘，仲眼仔睩睩咁，堅係可愛到暈！
之後，著住粉紅色BB衫嘅Kaylor仲要展露笑容，真係睇到唔少人個心都溶哂！
而且，揸機人媽咪仲喺片中用三種語言同Kaylor講早晨，期間囡囡表現得非常開心，不時大笑！認真可愛到爆燈！
有片睇！
網民激讚B女
好多網友睇到呢段Kaylor嘅萌爆短片，都留言話Kaylor對眼好大，好可愛，亦有網友指Kaylor似媽咪！唔知大家覺得Kaylor似老竇定媽咪多啲呢？
因為今次Lynn只係上載咗Kaylor嘅得意短片，有網民於是就留言問另一個B女Lyvia喺邊，照咁睇嚟大家要耐心等等啦！
熊黛林孖女照
名模熊黛林今年4月為老公郭可頌誕下雙胞胎女兒Kaylor和Lyvia，而在今個月初Lynn為孖女舉辦百日宴，其後在社交網上載與老公各抱一個B的一家四口全家福，讓孖女樣貌首次曝光，但當時未睇得清楚！
孖女着上一樣的白T恤配粉紅色兔子圖案裙，另外戴上粉紅色頭飾，每人更攬住一隻粉紅兔公仔，相當可愛！孖女明顯唔似樣，更有不少網民表示：「一個像爸爸一個媽媽」、「感覺左邊像爸爸，右邊像媽媽」難怪Lynn也留言說：「Mini Ken and Mini Lynn！」
熊黛林 為孖女搞百日宴
百日宴的會場布置以粉紅色為主，場內仲掛滿粉紅色氣球，好有公主feel，而Lynn話孖女已經改咗英文名，分別叫做Kaylor同Lyvia，各同父母英文名嘅頭一個字一樣！
Lynn透露幸好奶奶和家人都經常來幫忙照顧，所以未算太辛苦，她說：「過咗100日已經好好多，最開始的時候都真的無覺好瞓，隔2個鐘就要起身餵奶，反而瘦咗！」講到老公有冇幫忙做湊仔公，她說：「老公都有幫忙，但佢工作比較忙，所以我覺得佢都係努力工作，我就負責處理家庭事。」
孖女一個似阿爸，一個似阿媽，真係好Cute呀！
「啫時」姑媽都有去
郭可頌嘅家姐郭可盈和姐夫林文龍、囡囡天若都有出席，郭可盈在其微博留言說：「一對各有特色的可愛小孖女👶🏻👶🏻，㊗️妳們健康開心！姑媽錫錫😘😘 。」
現場以粉紅同粉藍色布置，沿住樓梯掛滿粉藍同粉紅氣球，至於回禮禮物，以粉紅、粉藍色手袋形盒子裝住樽裝糖果，好有心思。
琦琦表示送上好意頭的數字大利是畀Lynn一對孖女，佢大讚孖女好靚好可愛，又叫Lynn追多個，但Lynn就話好辛苦，唔打算再追！
Lynn早前佢孖住老公一齊跑步，見佢素顏自拍都冇走樣！
幾次出街跑步，都撞正跑到半路落大雨，等停雨繼續跑，真係風雨無阻佢修身嘅決心！
