收身成功晒S形身材！熊黛林為孖女搞百日宴
撰文：東方新地｜圖片：新傳媒圖片庫、熊黛林IG、郭可盈微博、鄭紹康微博
熊黛林 為孖女搞百日宴
百日宴的會場布置以粉紅色為主，場內仲掛滿粉紅色氣球，好有公主feel，而Lynn話孖女已經改咗英文名，分別叫做Kaylor同Lyvia，各同父母英文名嘅頭一個字一樣！
Lynn透露幸好奶奶和家人都經常來幫忙照顧，所以未算太辛苦，她說：「過咗100日已經好好多，最開始的時候都真的無覺好瞓，隔2個鐘就要起身餵奶，反而瘦咗！」講到老公有冇幫忙做湊仔公，她說：「老公都有幫忙，但佢工作比較忙，所以我覺得佢都係努力工作，我就負責處理家庭事。」
「啫時」姑媽都有去
郭可頌嘅家姐郭可盈和姐夫林文龍、囡囡天若都有出席，郭可盈在其微博留言說：「一對各有特色的可愛小孖女👶🏻👶🏻，㊗️妳們健康開心！姑媽錫錫😘😘 。」
現場以粉紅同粉藍色布置，沿住樓梯掛滿粉藍同粉紅氣球，至於回禮禮物，以粉紅、粉藍色手袋形盒子裝住樽裝糖果，好有心思。
琦琦表示送上好意頭的數字大利是畀Lynn一對孖女，佢大讚孖女好靚好可愛，又叫Lynn追多個，但Lynn就話好辛苦，唔打算再追！
生咗孖女後，Lynn有女萬事足，她早前在其IG上載囡囡腳板照，搞笑話：「多功能小猪脚，可供食用、按摩、挖鼻孔！😂」
Lynn修身成功，全靠佢餵母乳同勤力做運動，早前佢孖住老公一齊跑步，見佢素顏自拍都冇走樣！
幾次出街跑步，都撞正跑到半路落大雨，等停雨繼續跑，真係風雨無阻佢修身嘅決心！
熊黛林 晒腳仔
熊黛林當年與郭富城分手後遇上另一位郭生(郭可頌)，命運從此改寫，郭可頌視她如珠如寶，拍拖兩年送名車送豪宅，最重要肯許下一生的承諾，送上三卡過百萬的鑽戒求婚，16年秘密簽紙註冊，二人努力製造愛情結晶品，去年Lynn幾經艱辛接受人工受孕，今年4月中誕下孖女，更大方地在社交網站發布抱女溫馨照，留言： 「終於等到你們了！」還有孖女兩對腳仔交疊，Lynn和老公兩隻手做出心心手勢包圍孖女腳仔的照片，畫面充滿愛。喜獲一對孖女的Lynn更說：「第一眼見到兩個囡囡時，又感動又開心，BB女5磅左右，眼仔好大好靚女， 老公開心到不得了。」
奶奶湯水侍候
家族擁百億資產的郭可頌生女打孖上當然開心，近年幫手打理家族生意的他，是個實務的富二代，難得其事業心與家庭觀念一樣重，自Lynn懷孕後，他一直細心照顧，擔心老婆陀孖B過分操勞及辛苦，入醫院剖腹更是寸步不離，Lynn返家坐月後，郭可頌忙湊女之餘，亦要兼顧工作。知情者透露：「郭可頌盡量分配好時間，陪多啲Lynn同幫手湊女，佢唔想Lynn太辛苦，一早請咗兩個陪月24小時貼身幫手，再加上有岳母喺度，佢都好放心，生完頭一個係最難捱，Lynn堅持要餵人奶，一餵就打孖上，所以搵咗個催乳師幫手，等Lynn人奶路可以順利啲。奶奶亦好緊張Lynn唔夠營養，日日吩咐工人煲多啲湯水，又買咗好多食材同名貴補品，等佢個傷口好啲就開始進補，依家陪月每日都燉冬蟲草畀Lynn，佢坐好月身體回復得快啲，追第二胎就事半功倍。」
性格溫馴的熊黛林深得郭家上下歡心，雖然未能一索得男，但她承諾會再追，而郭可頌亦絕對不會待薄老婆，只要Lynn開口想要甚麼，他都會滿足其要求。知情者透露：「一直以嚟都係郭可頌自發送禮氹Lynn，Lynn從來都唔會扭買嘢耍手段，依家女都幫佢生埋，真係要乜有乜，早幾個月郭可頌問過Lynn想要啲咩做獎勵，話買多層樓畀佢揸手，Lynn話唔急等遲啲生完先，咁郭可頌就話不如買層樓畀岳母，等佢喺香港有個屋企，又可以方便照顧兩個孫。」難得郭可頌咁識做，Lynn母女欣然接受。
主攻港島樓
據地產界消息透露，郭可頌本來有意為岳母物色其現居位於天后廟道珊瑚閣的單位，但該物業的單位全部屬海景大單位，而且甚少放盤，最後Lynn母女心儀大坑徑的名門，「當日郭可頌帶埋熊黛林同佢媽咪去睇樓，當時熊黛林個肚已經好大，睇咗兩個兩房單位，入場費都成3千幾萬㗎，佢哋都好滿意，聽佢哋嘅對話係想近番依家住緊嗰度，想買唔想租，名門距離珊瑚閣十分鐘車程左右，而且有齊會所同配套，樓齡又新，啱晒佢哋要求。」之後地產經紀再介紹了幾個較舊的同區樓盤，不過都唔合熊母心水。
Lynn自小與父母感情深厚，早年獨自來港發展，其母一年只會來港一兩次探女，其父於13年去世後，她不時安排母親來港短住，若然Lynn要繼續追仔，熊母亦順理成章留港湊孫，郭可頌買層樓畀岳母亦好啱數。
百億資產繼承人
41歲的郭可頌家境富裕，在四姐弟中他排行最尾，有姐姐郭可盈、郭可欣和郭可思。父親郭達昌做塑膠廠起家，與妻子陳玉蓮共同擁有五間公司，包括寶昌製品廠有限公司、易通玩具製品廠有限公司、可可有限公司、郭氏兄弟製品廠有限公司及力達投資有限公司，09年更成立家品牌子「Passion」，生產塑膠CD架和儲存箱等，遠銷歐美。郭父在2011年病逝，遺下逾百億資產和億萬塑膠生意給四名子女，長女可欣一直幫忙打理家族生意，孻仔可頌和三家姐可詩則分別擁有自己的出口公司和汽車生意。
郭可頌除了要照顧Lynn與孖女外，仍要努力搵奶粉錢，上周五(4月27日)見他外出傾生意，雖然只是離開妻女幾小時，但他已歸心似箭，上車前接受本刊記者訪問，仍難掩首次為父的興奮之情，更透露會嘗試幫手湊女。有個肩膀有承擔又愛是全奉獻的老公，Lynn幫佢生多一隊足球隊都值得嘅，下一胎生對孖仔，咁就功德圓滿啦！
郭可頌：湊女係樂趣！
郭：郭可頌 記：本刊記者
記：恭喜晒！BB改咗名未呀？
郭：未呀！仲未！仲未有Idea住。
記：諗住畀人改定屋企人自己改？
郭：兩樣都會大家商討吓咁啦！
記：Lynn生孖女開唔開心呀？
郭：開心！多謝呀！
記：你有冇幫手湊BB呀？
郭：都有呀！
記：個感覺係點呀？
郭：好開心囉！
記：有冇幫手換片餵奶？
郭：都唔使我做，遲啲先算！
記：會唔會試吓去做？
郭：一定會！係樂趣嚟嘅！
20萬住院費
現時本港一共有11間私家醫院提供產科分娩服務，而香港有錢人生仔的熱點，都離不開跑馬地的養和醫院或舊山頂道的嘉諾撒醫院，但熊黛林4月剖腹生孖女，卻是在今年2月中才正式開設婦產科，位於黃竹坑的港怡醫院。
港怡醫院設施完善又新，而且環境清靜，據知期待孖女出生的郭可頌護妻備至，安排Lynn入住日租8,000元的豪華套房，更全程寸步不離陪產。Lynn開刀誕孖B的醫生費比單胎貴30%，再加上麻醉師、兒科醫生連住院等合共花了約20萬港元。
百萬坐月
依照中國傳統，女人產後三十至四十五天內，這段時期母體內的荷爾蒙及養分最需要補充，故此必須把握這個黃金時期，好好調養身體，回復產前或比產前更好的狀態。熊黛林生孖女要請兩個專業陪月員，新手媽媽要餵全人奶又要請催乳師上門，在奶奶與母親緊張照料下餐餐都要食得好夠營養，最大開支就是名貴的補品與藥材，百萬坐月費一定走唔甩。
