無綫斟拍劇 吳美珩 專心湊仔拒復出
photo：新傳媒資料庫、無綫電視截圖
吳美珩 專心湊仔拒復出
吳美珩係96年華姐亞軍，出道不久即受力捧，有份演出處境劇《真情》、《刑事偵緝檔案III》，98年喺經典劇《天地豪情》中演羅嘉良嘅前女友甘鳳欣，雖然演出經驗不多，但劇中與撈家有唔少感情戲份，自然嘅演出亦都令觀眾留下深刻的印象。此後 吳美珩 演出不斷，如《大澳的天空》、《刑事偵緝檔案IV》、《烈火雄心》、《碧血劍》、《九五至尊》、《下一站彩虹》、《鳳舞香羅》等。01年吳美珩同「撈家」羅嘉良於《街市的童話》再度合作，演「嚴美珠」一角，之後喺《太極》、《人間蒸發》《女人唔易做》、《愛情全保》更擔正做女一。
專心湊仔 淡出幕前
07年《妙手仁心III》出街之時，其實 吳美珩 已經大住肚，首次承認早於01年已經同美藉台商王華麟成婚。同年為丈夫誕下大女Maegan後即告別娛樂圈，11年再生多個囝囝湊成一個好字，10年來專心相夫教子享受50億人妻闊太生活。除咗捕住電視機睇重播，要再睹吳美人風采，去名店或者一對寶貝女就讀嘅漢基國際學校仲大機會！
女神又是慈母
雖然經典重播、仙氣 吳美珩 再成娛樂版及網民焦點，不過虛名嘅嘢一啲無影響闊太日常。連日來依舊買餸、湊仔女為樂，早前就被本刊發現44歲的 吳美珩 陪住6歲囝囝回校參加角色扮演活動。同其他慈母一樣， 吳美珩 望着戴上自製高帽的囝囝一臉關愛、舉起手機不斷拍照，期間有其他家長要求合照，亦都笑笑口有求必應。
高層出馬請唔郁
之不過想佢出山難度爆燈，據知十年嚟其實不斷有監製游說 吳美珩 復出，之前金牌監製李添勝親自出馬，度身訂造《呂后傳》劇本、更話明拍攝時間會盡量遷就縮斷騰出家庭時間，可惜既沒有戲癮亦不志在，吳美珩始終不為所動，之後再搵名單之內嘅佘詩曼又因頸傷舊患為由推咗，結果直至李添勝榮休，《呂后傳》始終因為搵唔到擔得大旗人選不了了之。
復出幕前零希望
較早前《妙手仁心III》重播反應好，無綫高層又再出手出口，不過 吳美珩 仍不為所動，知情者透露：「唔單止無綫搵 吳美珩 ，好多品牌event都接觸過，不過佢都推咗，話要湊仔。」一個 吳美珩 一個黎姿都只可以成為網民同觀眾的集體回憶﹗
