激罕談風流史 慨歎霆鋒步後塵 謝賢 ：「孤獨老人嘅創傷」
廣告
謝賢 (四哥)在奇妙電視節目《天下第一Friend》，接受主持鄭紹康訪問，期間談及一生中五個重要嘅女人，嘉玲、蕭芳芳、甄珍、狄波拉同現任女友CoCo，激罕大談情史！同時四哥亦慨嘆兒子謝霆鋒步自己後塵，同張柏芝離婚收場，哽咽話：「呢個係我孤獨老人嘅創傷，每次諗起都難免落淚！」
Text－Arika Photo－新傳媒媒體庫
謝賢狄波拉離婚後相擁轉圈
四哥 謝賢 在《天下第一Friend》接受主持鄭紹康訪問，逐一講佢同五位生命中最重要女人嘅故事。講得最多一定係第二任老婆拉姑狄波拉。拉姑同四哥生咗一對仔女霆鋒同婷婷，二人婚姻維持咗25年，但最後都係離婚。佢哋再見仍然係好朋友，感情上亦各自各精采。四哥分享二人離婚簽紙當日，離開律師樓後，兩個人喺街上擁抱，「因為我哋太開心！」四哥笑稱當時抱住拉姑轉咗三個圈，在場雙方律師都呆咗。
延伸閱讀：
無綫棒打美女與野獸 李佳芯為愛抗命
想破G.E.M.紀錄 Celine 年尾紅館騷受阻
謝賢 慨歎霆鋒步後塵
自嘲係「不知所謂」嘅爸爸，四哥感激拉姑擔起管教霆同婷婷嘅責任。被問到自己同拉姑離場收場，對霆鋒有冇影響，四哥覺得影響不大，離婚前有問仔女意見，而霆鋒好瀟灑，好贊成父母做番朋友。不過，四哥對於霆鋒同張柏芝一樣離婚感到可惜，估唔到自己個仔行同一條路，更一度眼泛淚光。佢好感激柏芝生咗兩個乖孫Lucas同Quintus，亦話自己好鐘意依個新抱。
四哥第一任女友嘉玲係一名息影女星，佢直認當年自己太貪玩又無錢，後來有錢就出去玩，最後嘉玲選擇嫁去泰國。之後，四哥讚第二任女友蕭芳芳係乖女、係好女仔，表示最後係自己主動要求離開蕭芳芳。四哥開玩笑話：「我唔好害人啦，我覺得自己做咗件好偉大嘅事！」
之後到四哥第一任老婆甄珍，二人結婚一年就分開，四哥瀟灑咁話：「簽咗離婚紙，我揸車上山頂喊咗15分鐘，然後我同自己講『過咗去啦，唔好再諗』，然後就放低咗！」而第五個女人、現任女友CoCo細四哥49年。這對爺孫戀已經拍咗12年，感情好穩定，但四哥話無打算結婚，兩次離婚，已經唔信名分。四哥亦自嘲自己「80後」(80多歲)，更祝福對方若遇到更好的人，Coco應該離開佢。四哥咁多年後，好似終於定性。
