潮服店執笠 徐濠縈箝實少女康堤
撰文：東方新地｜圖片：新傳媒圖片、徐濠縈IG
徐濠縈 做全職阿媽
邊個話Eason嫂徐濠縈淨係識遊山玩水花錢買衫㗎？十四年來Eason走南闖北忙搵食，康堤順利入女拔又品學兼優，絕對係媽媽徐濠縈功勞。一年一度又開學，暑假最後一個周末，本刊就發現廿四孝媽媽親自帶住囡囡去眼鏡舖配眼鏡準備開學。買完眼鏡，兩母女隨意站在街邊雞啄唔斷，眨吓眼就快14歲的康堤已經高過媽媽，兩母女話題多多，好感情到兩姊妹一樣！
雖然陳家有女初長成，不過在Eason同阿徐心目中，康堤始終年紀細仲需要悉心照顧，日前Eason接受訪問，表示雖然自己在英國留學長大，不過就未捨得送康堤離家；至於阿徐，對女兒的學業生活到交友，一樣緊張管到實，知情者透露：「康堤愈 大，阿徐愈係覺得個女有個簡單正常童年最緊要，所以社交網絡一定唔會晒女正面相，偷拍個女彈琴都係得背影。康堤喺學校真係好受歡迎，唔關佢爸爸係邊個事，因為佢讀書叻、性格好、識彈琴唱歌早已係學校風頭躉、唔少師姐師妹都係佢fans。阿徐好緊張康堤交朋友，尤其呢個年紀好易受同輩影響，想佢作風低調啲又怕佢影響學業，所以近年花多咗時間箝實個女，下個月佢間舖執埋，佢就全副精神放番喺個女度，做全職阿媽。」康堤正值少女期，睇實啲都啱嘅！
同場加映：徐濠縈慘遭囡囡康堤嫌棄 話佢扮後生？
徐濠縈早前同囡囡康堤去完韓國旅行返港，阿徐除了表示今次係康堤首次去韓國外，仲話諗住同囡囡一齊學跳K-Pop，因為佢覺得如果可以同個女好似兩姊妹咁樣一齊跳，感覺會幾型，但可惜囡囡表示唔多想同媽咪跳。
徐濠縈被康堤話扮後生？
阿徐又話囡囡而家已經高過自己，平時又會拎佢啲靚波鞋著。但重點係每當阿徐著啲大tee或者著得young啲的時候，康堤就會彈句「媽咪你做乜扮後生？」，真係聽到個心都離一離呀，唔知阿徐心入面點諗呢？
徐濠縈 開心送吻
早前44歲生日的壽星女徐濠縈，獲Eason、偉仔同張震三大男神送祝福，開心到不停在派對上嘟咀派飛吻，仲舉埋V字手勢影相，而梁朝偉同Eason就鬥耍詠春，一大班人玩得勁開心！
徐濠縈著大露背買叉燒
早前徐濠縈於個人社交網上載自己單拖落街買燒味，原來係為慶祝老公陳奕迅（Eason）喺台灣金曲頒獎禮中，三度奪得歌王寶座兼贏埋年度專輯大獎。雖然只係出街買叉燒，但不嬲走喺潮流尖端嘅啊徐就著上一件大露背，唔講仲以為佢準備出席咩活動。
徐濠縈仲留言指：「斬料、斬料、斬大舊叉燒，賀賀佢，陳師奶，乖女。」但重點就完全落喺呢件大露背，皆因呢件衫只要有小小肥都會Carry唔到，但阿徐完全唔洗擔心呢個問題！
阿徐拎住一大袋叉燒戰利品時，仲要擺番個Pose影番張相，真係冇人潮得過佢！
拎住一大袋叉燒，啊徐唔少得行番個街頭Catwalk！
