溜冰場遇凳霸 陳浩民妻蔣麗莎火併港婦
撰文：東方新地｜圖片：新傳媒圖片庫、蔣麗莎微博
蔣麗莎 護女心切開火
蔣麗莎要照顧四個寶貝仔女兼打理成頭家，EQ出名有番咁上下，不過日前卻因「土地問題」火併港婦。上周三 (8月29日) 蔣麗莎一拖六 (四個仔女加兩個外傭) 去又一城溜冰場踩冰，期間細女要換鞋，一名港婦卻以背囊佔據坐位未有讓座，雙方發生口角，蔣麗莎護女心切，即時以手機拍片怒轟對方欠公德心。
蔣麗莎當日在社交網上載兩條在溜冰場拍攝的短片，片中見一名坐在長凳上的女子勞氣地說：「你想坐，OK，你講咪得囉！冇問題！」但她一直未有挪開其身後放在凳上的背囊，之後蔣麗莎怒斥說：「真係夠晒離譜！呢個位畀佢擺電腦，我依家抱緊小朋友呀！」另一段片中，有個男孩想坐下換鞋，蔣麗莎拍拍他提醒「坐過啲」：「佢話有好貴重嘅嘢喺裡面，呢張凳唔係畀人坐，係畀佢個袋擺電腦。」港婦聞言勞氣回應：「係佢自己盲咋嘛！所有小朋友想坐我都會讓佢⋯⋯」不過片中見她從來冇讓座，蔣麗莎再說：「所有小朋友Change Shoes (換鞋) 都喺呢度，你郁都唔郁。咁樣嘅香港人好犀利，完全冇公德心！」
與港婦駁火後，蔣麗莎帶住仔女同外傭到又一城的超級市場購物，遇上本刊記者後她不吐不快，坦言當時因為女兒扭傷要換鞋，她抱住囡囡想坐低卻遭對方一手推開，她才開始與對方理論，並謂如果是自己做得不對願意say sorry，但她堅持是對方冇公德心及態度差勁。身為四子之母，蔣麗莎捍衞子女是天經地義的事，雖然大動肝火好傷元氣，不過有四個活潑可愛的仔女錫番呵番，呢位超人媽咪好快又笑番！
拍片公審
蔣麗莎把兩條短片上載微博，並留言形容當時情況，片中見她與一名身穿黑色外套的金髮馬尾港婦互罵，對方不停話自己的背囊入面有很貴重的電腦，口口聲聲說會讓位，但從未有行動把背囊挪開。
蔣麗莎與港婦爭持不下，解釋當時抱住囡囡幫她換鞋，但對方堅持唔讓座，後來有個小男孩想坐低換鞋，忙住拍片的蔣麗莎不忘提醒小朋友，話張凳唔可以坐：「唔好坐呢度，嗰度有個袋，佢話有啲好貴重嘅嘢喺裡面。」
蔣麗莎最後仲指住個袋、再提醒小朋友話：「呢張凳唔係畀人哋坐，係畀佢個袋擺呢度嘅。」聽得出她當時真係好嬲。
玩轉超市
蔣麗莎呢頭同港婦嘈完，離開溜冰場即帶四個仔女去超市掃貨，雖然有兩位外傭姐姐隨行，但蔣麗莎全程自己照顧小朋友，一拖四唔易搞，不過陳氏寶貝都算聽話，冇話周圍走。
大女陳雅薷就最幫得手，除了會幫媽咪拎嘢外，仲會睇實最搗蛋的二弟陳璟逸。
老公陳浩民在國內拍劇搵錢養家，蔣麗莎就留港睇實頭家，每次出街都好大陣仗，始終兩個細女都係得兩、三歲，好彩帶住兩個得力外傭負責抱女，不過蔣麗莎仍要負責做埋司機揸車。
超人媽媽
32歲的蔣麗莎絕對是不可思議的媽媽，與陳浩民結婚七年，無論照顧老公定仔女都非常稱職，仲有時間復出幕前，超人媽媽當之無愧。
北上探班
趁住仔女仲放緊暑假，早前蔣麗莎一拖四山長水遠飛去橫店探正在拍古裝劇的陳浩民班，見到四個仔女，陳浩民幾辛苦都值得。
