【港姐2018】大台街訪候選佳麗 網民瘋狂恥笑：最無腦港姐！
原文：對白Cap圖王 ｜ 圖片：See See TVB Facebook、TVB Facebook
大台Facebook專頁街訪候選港姐
早前大台拍咗條港姐街訪，Part 1 就請嚟1號蘭倚婷、4號鄧美欣、9號工藤佑采、11號李明芙同19號楊帆玩街訪，問咗好幾條問題。最好笑係佢哋有啲答案好無喱頭，真係十萬個黑人問號都搞佢哋唔掂。
小編就精選咗幾round，一齊睇下班候選港姐點答啦！
Round 1:
知唔知今年港姐口號係咩？
工藤佑采係最醒嗰個，起碼記得開頭嗰句「Be the best」，之後主持講個正確答案叫佢讀多次，佢將「rest」讀做「red」，認真不得了。
蘭倚婷仲好笑，問佢句英文口號叫咩，佢個表情心諗「唔係吓嘩，問我英文，我唔識喎！」
不過身為候選港姐，連口號都唔記得…真係幫你唔到。
結果Round 1冇人嬴！
Round 2:
電視台見到好多前輩，見到汪明荃叫Liza姐，見到鄭裕玲叫Dodo姐，咁薛家燕點嗌佢？
薛家燕就緊係皆大歡喜嘅「嘻呀嘻呀」啦！
呢個仲堅，Sky燕叫…家燕姐姐，家姐媽媽囉，個重點係「Sky燕」，「Sky」啊！
嗱！呢個就醒呢，識得叫家燕姐，遲啲留係大台一定大把世界，邊到似楊帆亂答。
結果Round 2蘭倚婷同鄧美欣嬴！
Round 3:
唐詩「床前明月光」，下一句係咩？
按現今嘅教育界標準嚟講，其實呢首算係「幼兒」唐詩系列嚟，好似係⋯⋯
答案1：床前明月光，疑下地上心？？？我諗你識嘅，讀得唔正姐係咪？我實信你㗎！
答案2：床前明月光，地圖思故享？算啦！唔好搞大佢，不如返去讀好啲中英文先啦！
好！正確答案係「床前明月光，疑是地上霜」啊！最醒係你兩個啦！
結果Round 3 鄧美欣同李明芙嬴！
Round 4:
獎門人點叫呀？
工藤佑采一句「獎門人點會嗌呀」，肥仔黎我都唔知話你叻好定唔叻好，不過之後冇啦啦喺度「hey」，大佬啊！「hey」係家燕姐嚟㗎！
呢兩個就搞唔掂啦…
最醒又係你兩個啦！連嬴兩round！
結果Round 4 鄧美欣同李明芙嬴！
最終回：「牛唔飲水，下一句係咩？」
答案1：牛唔飲水，我想要飲水？
答案2：牛唔飲水，無低頭？定係牛唔飲水，唔飲水我低頭？
答案3：牛唔飲水，呀媽叫你去飲湯，之後去做功課？
好！正確答案係「牛唔飲水，點撳得牛頭低」！
結果Round 5 工藤佑采同李明芙嬴！
最終由11號李明芙勝出，不過今屆港姐係就係好樣咗，不過唔係好夠智慧咁囉⋯⋯
重溫以上佳麗喺Big Big Channel嘅才藝表演：
1號佳麗 – 蘭倚婷
1號佳麗蘭倚婷用「1999之急口令」做才藝表演。
有就網民好奇：「其實，佢係咪對才藝有咩誤解，做得好既先叫才藝喎，佢依加叫獻醜喎！」
4號佳麗 – 鄧美欣
4號佳麗鄧美欣最「食腦」，一於擺幾個甫士當才藝！
9號佳麗 – 工藤佑采
9號工藤佑采跳舞原本都安全嘅，但唔知點解要「自摸」！網民都忍唔住講句：「好低質！」
11號佳麗 – 李明芙
11號佳麗李明芙嘅表演慘被網民指「集漏口同1999於一身」，點解？
香港小姐係選「美貌」與「智慧」並重，如果口齒咁唔清晰，又何必用急口令做表演呢？正所謂「獻醜不如藏拙」嘛！真係無你「芙」啊～
19號佳麗 – 楊帆
19號佳麗楊帆有唔少支持者，佢唱〈My Destiny〉幾好聽又幾有感情，不錯！
