【深宮計】御用皇帝唔憂做 李龍基手揸6層樓收租

二十年前李龍基已洞悉先機，在深圳買優質樓投資，並與第二任太太定居當地，現持有6層樓收租，做包租公的收入本已夠生活有凸，不過近月《深宮計》效應令李龍基人氣急升，登台爆騷有錢繼續搵。

李龍基坦言01年被無綫炒魷魚後也曾跌落谷底，但天無絕人之路，他勸勉年輕人要積穀防飢，遇上人生低潮都要積極向前，十七年後他再返無綫重拾皇位，不為名利，只求開心。

撰文：東方新地｜圖片：新傳媒圖片庫

李龍基：被炒魷意興闌珊

01年無綫因人事變動進行過一次大裁員，當年做過無數皇帝角色的李龍基也成犧牲品，要默然離開感到非常徬徨，此後他繼續四圍走埠登台，保持一定的曝光率，彷彿從未離開過電視圈，去年回歸無綫拍重頭劇《宮心計2深宮計》，再做唐睿宗李旦可謂駕輕就熟。

李龍基坦言當年是被迫離開電視圈，他說：「我當年係畀人炒魷㗎！呢段就係我嘅低潮期，當時我真係好down，不過公司話係商業決定我都冇辦法，離開後有好多圈內朋友都好關心我去向，王維基開台都搵咗我三次，不過我真係意興闌珊唔想再簽任何電視台，我有手有腳有技能，一定餓我唔死，咁我又繼續走埠登台，閒時又上吓啲綜藝節目。我份人唔記仇，做人應該學識放低，到小青姐再搵我返去拍《深宮計》，我就一口應承喇！咁多年嚟啲皇帝畀人做晒，我依家返嚟做番，拍攝過程真係好艱辛，不過套劇好成功有好大回響，依家行出街有好多人搵我影相又叫我皇上。」

兜兜轉轉，李龍基又回到無綫，他坦言拍完《深宮計》已元氣大傷，需要休息一段長時間，暫時不會再拍劇，「時不我與，依家已經唔後生，再拍劇都要睇辛唔辛苦，拍《宮心計2》第一日已經開19個鐘，之後平均工時都超過16個鐘，長時間唔夠瞓抵抗力弱，期間仲腰患發作痛到企唔到標冷汗，要去醫院打消炎止痛針。再加上我喺深圳住，每日來回時間要預5個鐘，遇上日接夜要通頂，都好辛苦。」

專攻優質樓

本刊記者日前直擊李龍基由深圳福田的寓所，搭地鐵去落馬洲過關來港工作，原來他已定居深圳近二十年，「廿幾年前同第二任太太結婚，之後就一直住喺深圳，嗰時仲開始投資買深圳樓，我咁多年keep住唱歌登台，試過十八個月內去咗六次美國、三次英國、三次澳洲同四次大馬，賺番嚟嘅錢就投資深圳樓，當年有好多朋友話我傻，覺得買深圳樓收租好冒險，但我好有冒險精神，只會買地段好嘅優質盤，亦證明咗我當年嘅決定好正確，嗰時我用100萬可以買到一個四百幾呎嘅優質屋苑單位，依家已經升咗好多倍，每個單位月租可以收七千幾蚊，回報率好高，託賴有能力買幾層樓畀老婆收租，等佢有啲細藝。」

出騷歌王變成深圳樓王，李龍基本來可以印印腳退休享清福，與第一任太太育有兩女一子的他，孫都有兩個，但他並未退下火線，登台騷亦接到手軟，「我啲仔女已經大晒，亦唔使我擔心，佢哋都好叻可以自立，而我嘅人生目標就最緊要開心，無論工作定生活，都會揀自己鍾意嘅嘢去做，安安樂樂唔需要為兩餐擔 憂，兩公婆自由自在，太太會跟住我周圍去登台，我哋已經去過環遊世界，去 過好多地方。總之有工作會努力工作，冇工作就努力去玩。」

據知《深宮計》出街後，李龍基又接了多場美加登台，下半年將會帶埋太太再遊美加。多年來深信做人夠積極夠勤力，好運自然來的李龍基，全靠當年獨具慧眼，不過現在中港兩地樓價都癲升，要上車談何容易呢？

深圳地膽周圍行

李龍基 帶妻環遊世界

李龍基與第二任太太結婚逾二十年，人前人後表現恩愛，平時與圈中人聚會，他都會帶同太太一齊出席。李龍基連走埠亦與太太同行，夫婦二人足跡遍布世界各地，羨煞旁人。

以朕自居

李龍基80年代加入無綫後拍過逾40套劇集，演活過無數皇帝，笑言就連東海龍王及閻羅王都做過的他，在社交網更不時以朕自居。

爆騷歌王

李龍基歌藝出眾，歌迷無數，四十年來登台出騷不絕，首本名曲包括〈巨星〉、〈佛山贊先生〉、〈男子漢〉、〈花艇小英 雄〉、〈怒劍鳴〉，〈路直路彎〉及〈人生曲〉等，爆騷歌王當之無愧。

除了去世界各地登台，不少私人公司及企業的周年晚會都愛請李龍基表演，識搞氣氛又識玩樂器，多才多藝難怪深受客戶歡迎。

李龍基與時並進，登台除了唱舊歌，亦會搞搞新意思畀觀眾驚喜。

入行40年

李龍基酒廊歌手出身，70年代參加無綫舉辦的「聲寶之夜」而被經理人發掘才全職做歌手，出道初期蓄「二撇雞」鬍鬚，形象略為粗獷，故有「斬柴佬」的綽號，早年曾為不少電視劇演唱主題曲。