【深宮計】周秀娜性感出浴 馬明中胡定欣奸計
廣告
《宮心計2 深宮計》仲有十集就大結局，深宮明爭暗鬥愈來愈狠毒，無人可以獨善其身！其中王皇后(胡定欣飾) 愈來愈奸，千方百計加害鄭純熙(周秀娜飾)，今次仲會拉埋任三恕(馬國明飾) 落水，想將二人除掉！另外今集重點當然就係娜姐香豔出浴鏡頭啦！
撰文：東方新地｜圖片：微博、劇照、網上截圖｜資料來源 :TVB
《深宮計》純熙任三恕係咩關係？
《深宮計》早前曾提及過，純熙(周秀娜飾) 同任三恕(馬國明飾) 其實係舊相識，事緣純熙一直係個崇拜英雄的人，任三恕喺佢年少時救過自己一次，所以自此銘記於心。話雖如此，但兩人在劇中一直形象正派，有不倫之戀的機會相信唔大？
周秀娜性感出浴
接下來劇情講到純熙去到皇后新建的「紫蘭湯」藥浴調理身體，亮點當然就係娜姐的出浴場面，雖然唔係露好多肉，娜姐亦沒有刻意賣弄性感，不過騷吓腿騷吓香肩，出水芙蓉好吸睛！
拍攝時凍到傻
娜姐之前都有喺微博上載拍攝期間的相片，雖然成個畫面好靚又香豔，但拍呢戲時其實係冬天，凍到傻！
馬明中胡定欣奸計
之後重點來了，喺純熙好享受咁浸浴、任三恕又正在宮中巡邏之時，突然有位宮女邊跑邊大叫「紫蘭湯」中有刺客，於是任三恕立即衝入內追查刺客！
孤男寡女 共處一室
點知入到去竟然咩事都冇發生，皇后就與淑太妃(韓馬利飾) 好似計好時間咁出場在現場，見到女方衣衫不整，而且只有任三恕與純熙獨處一室，當然會懷疑兩人暗結私情，大興問罪之師！
說好的「宮女」呢？
整件案最大的疑點就係該個大叫有刺客的「宮女」，不過一直未能搵到此人，所以苦無證據證明純熙和任三恕的清白。就算李隆基(馬浚偉飾) 明言相信二人，提出延後審理，太平公主(陳煒飾)出現阻攔，誓將兩人治罪！
心悠心穎幫拖
但呢個時候，元玥(劉心悠飾) 突然帶同被鎖上手扣的若芊(黃心穎飾) 出現在殿上，並指若芊就係當晚高呼有刺客的宮女！其實心水清的觀眾，都應該知道成件事背後又係奸爆皇后安排！到底元玥同若芊可唔可以成功救到純熙同任三恕呢？
