【深宮計】公主上位 無綫力捧 37歲劉心悠做阿佘接班人
據悉，小青姐出馬邀拍劇、樂小姐爭簽做邵氏自己人，都係因為貪心悠BB純過蒸餾水、形象好到加零一， 一心要用同一條方程式打造心悠變佘詩曼接班人！
劉心悠 十三年零緋聞
港姐出身、拍劇起家，佘詩曼捱足廿年電視台奠定視后及花旦位置後，即離巢轉攻影壇；當家花旦接連出走、後起小花又未成氣候，電視台積極尋找外援接班人是常識吧！拍足一年、耗巨資兼金牌監製梅小青回巢監製重頭劇《宮心計2深宮計》就一反無綫傳統，大量起用外援擔當要角，畀足視迷新鮮感之餘，一班電視「新」人亦都不負重望演出稱職又搶眼，尤其係形象pure又true、入屋話咁易的心悠BB。
05年入行即以電影為主，當年以新人姿態出演《阿嫂》第一女主角時，心悠已經因為純情又有仙氣矚目港台影圈；打響頭炮不難，難在入行十三年都零緋聞零醜聞貫徹始終，純品形象深入民心。據知情人士透露，11年拍完內地劇《步步驚心》紅遍華人圈，事業心重心悠已經認為拍劇過足戲癮食過翻尋味：「心悠想挑戰自己講廣東話拍香港電視劇，其實TVB早喺12年都已經搵佢傾合作，不過真係電影期霸晒無時間，結果一推再推。前年小青姐回巢籌備《深宮計》最早嗰批演員就係聯絡心悠，《深宮計》未出街，樂小姐都已經搵定心悠再傾合作。心悠啱啱簽咗邵氏、《深宮計》出街元玥個角色又真係拍得住當年劉三好個，嚟緊TVB大把計劃捧硬心悠！」有樣有氣質和有演技觀眾緣，劉心悠做佘詩曼接班人，冇人有異議！
一日走兩場
跑完上場屈就在保母車上換衫，再為無綫錄影特備宣傳活動，形象討好、角色又度身訂造，所以「元玥」一現身，真係三歲到八十歲都愛她，立即被市民重重圍住。
第一次拍無綫劇，一如高層同小青姐所願角色討好極速入屋，心悠近日亦都盡責為劇集宣傳，日前連代言餅店亦食住《深宮計》勢為產品搞活動。
人氣爆棚心悠嚟到，連老牌餅店代言人曾志偉都要淪為間場、畀心悠做壓軸，品牌高層大合照時一樣只掛住同心悠咬耳仔。
餅印上位之路
後宮劇七國咁亂勾心鬥角人人鬥歹毒，惟有心悠飾演的元玥出污泥而不染、心地善良堅毅不屈，角色完全是當年《宮心計》劉三好翻版，仲要一樣由平民宮女捱到上位，更時來運轉做埋公主！
監製至愛
據悉小青姐12年離巢北上時已經一心想和心悠合作，等到16年回巢籌拍《深宮計》，又係親自出馬游說心悠。
交遊廣闊小青姐個人微博帳戶一年來以心悠出鏡率最高，可見心悠幾得金牌監製歡心。
有人緣
小花拍劇是非、緋聞實有一樣中，不過心悠就唔止監製錫，同劇其他演員亦關係極佳，繼續保持零是非零緋聞紀錄。
夠勤力
入行多年個個同心悠合作過的導演監製都對她讚不絕口，事實上為套戲勤練廣東話又閉關練劍，心悠工作態度亦十三年如一日冇得彈！
劉心悠3字尾索過後生女！保養有術 全靠⋯⋯
劉心悠在《深宮計》堅持用廣東話拍劇，努力值得欣賞。劇中心悠飾演宮婢元玥，為尋找胞姊而入宮，期間更助若芊 (黃心穎飾) 脫罪，因此若芊獲釋後對元玥心懷感激，二人姊妹情更篤。
不少網友話37歲嘅劉心悠拼埋29歲黃心穎身邊，一啲都冇輸蝕！
元玥之後更為玲瓏公主，仲會同蕭正楠飾演嘅龍武軍隊長何離有感情線！
湯水很重要 做女仔唔可以懶
Keep得咁好，心悠話阿媽嘅愛心老火湯功不可沒，另外仲要多運動、勤保養：「有句說話係『做女仔唔可以懶』，我好認同㗎！女仔唔識補會好易老，不過我就識點樣令自己保持年輕，例如做瑜伽、跑馬拉松，因為可以令新陳代謝好啲，至於皮膚方面，我都好注重，仲好勤力𠻹，由卸粧、敷Mask，由內到外去保養。」
保養肌膚 三管齊下
心悠指保養肌膚一定要由內到外：「飲食、運動、睡眠，要三方面一齊做，特別係我成日拍戲，好多時都休息唔夠，就好易有細紋、鬆弛等等嘅肌膚衰老問題。」
卸妝的重要性
心悠又提醒大家徹底卸妝好重要：「我知道好多女仔會花好多時間嚟化妝，但卸妝就馬馬虎虎，我甚至見過朋友只係用濕紙巾抹面就當卸咗妝！其實如果唔徹底卸妝，最後會令皮膚變差，點化妝都唔好睇！」
出道14年
在台灣出生的劉心悠﹐原名劉平凡，04年出道，首個公開活動係出席皮鞋品牌，唔經唔覺已經出道了14年，但歲月催人似乎在她身上未有發生！
初出道拍《阿嫂》
睇番04年佢處女拍電影《阿嫂》，夥拍同經理人公司嘅師姐林嘉欣、羅仲謙，心悠獲提名金像獎「最佳新演員」獎。
05年時24歲嘅心悠BB皮膚白滑笑容甜美，又pure又true。
素顏見得人
心悠BB經常素顏及淡妝示人，但人靚加上皮膚好，依然見得人，真係令不少女生羨慕！
馬拉松常客
心悠12年來堅持練跑，幾乎每年都會參加渣打馬拉松，已是資深跑者，佢仲勤練瑜伽，努力keep住健美身形。
2015年心悠同周柏豪拍電影《小姐誘心》，著上水手服上演制服誘惑，令觀眾留下深刻印象。
一直蛻變中
現已37歲的劉心悠說自己一直在蛻變中，只係步伐比較慢：「我覺得好多事，要到達某個人生境界先做得到，好似性感、裸露，依家我仲未接受到，但二十年前我唔能夠接受嘅露背、高踭鞋，依家我已經著得好舒服！」
心悠保養得宜，而且入行多年都零緋聞，難怪多年來護膚品牌一直搵佢任代言人啦！見到佢真係要講句「我要健康，我要消脂」～
