【深宮計】有餡閃嫁富豪 宮女李美慧晒億元遊艇
的而且確曾文豪對李美慧呵護備至，結婚前夕，專登為老婆開遊艇派對製造浪漫驚喜，當日李美慧和老公同大班親友上船舉行婚前派對，李美慧大晒老公億元超級遊艇，陀住五個月肚的她，全程表現興奮，粗身大細出海，李美慧著住平底鞋，更由多人護住上船，盡顯富泰闊太派頭。
撰文：東方新地｜圖片：新傳媒圖片庫、李美慧IG
李美慧 宮女變闊太
近日在劇集《宮心計2深宮計》飾演「太平公主」陳煒親信宮女一角的李美慧，隨著劇集熱播，亦閃嫁富豪飛上枝頭變鳳凰，令唔少女人趨之若鶩。
上周日(6月3日)李美慧同富豪曾文豪於淺水灣舉行華麗婚禮，正式成為曾太的她，因為06年選港姐入行，拍過唔少劇集，當日就有唔少TVB藝人同事到賀，男家親友亦個個非富則貴，富商李民橋夫婦以及許晉亨等都有到場祝賀一對新人，場面熱鬧。
早融入曾家
雖然拍拖半年就閃婚，但李美慧早已融入曾家，與曾文豪前妻所生的三個女兒曾昭怡、曾昭亮及曾昭令，和老公的孫仔孫女都相處融洽，當日曾家上下到齊分享喜悅，就連曾文豪前妻亦有到場。據知情者透露：「其實ViVi係拍完《深宮計》先喺朋友介紹下認識Peter(曾文豪)，咪睇佢哋年齡相差咁遠，佢兩個一啲代溝都冇，性格好夾，Peter好錫ViVi，拍拖冇耐已經同佢求婚，ViVi性格溫柔又善解人意，完全冇『港女』性格，就算依家做咗闊太，婚禮又收到咁多珠寶首飾，佢都仲係崇尚清雅，唔會戴到成身鑽飾金器咁出嚟！Peter就係鍾意佢夠賢淑，覺得呢啲老婆好難得。」
出海游水
陀住五個月B出嫁，雙喜臨門的李美慧在婚禮上就坦言婚禮前一晚瞓唔著。「我希望令到自己攰啲，婚禮前一日出海游水，返到屋企攤上床成晚完全冇瞓過，直到依家都未瞓過，唔知係緊張定興奮，嚟到現場以為好多嘢想講，拎住咪又講唔出，好在有老公。」新婚的她三句唔埋就將老公掛在嘴邊，老公曾文豪非常受落：「我好多嘢想講，但怕overrun！」知道老婆仲有戲癮，婚後亦支持她繼續拍劇，曾搶住話：「佢鍾意做咪做！」令李美慧忍唔住撒嬌：「老公真係好好呀！」幸福喜悅之情掩也掩不住。
事實上，被老公錫到燶的她，婚禮前夕，就得老公曾文豪安排驚喜遊艇派對慶祝，與大班親友一齊出海狂歡玩足一日，Party更在億元豪華遊艇舉行。上周六(2日)早上李美慧先到尖沙咀試婚紗，試了大半小時，之後由老公專車接載到銅鑼灣利園，會合老公曾文豪後，同大班親友一齊吃過午飯，就浩浩蕩蕩乘車出發到西貢早禾坑碼頭，上船出海開始派對狂歡。
七月法國婚宴
當日所見，已經陀B五個月的李美慧，雖然手腳仍然纖幼又冇水腫，但一襲貼身紅色裙已經明顯現肚，腹中BB已經有番咁上下份量。
成功娶得美人歸，曾文豪為畀老婆一次難忘婚禮，除了在香港淺水灣豪宅舉行婚禮，請來律師在場進行註冊儀式，讓雙方親友一同證婚，4月曾文豪更同李美慧到了不丹影婚紗相，兩名女兒亦有同行，享受新婚甜蜜浪漫之餘，一 家人更趁機共聚享受溫馨，李美慧早已同曾家上下打成一 片，接著七月一對新人還會到法國尼斯舉行大型婚宴，到時將會宴請過百親友飛當地出席聯歡。而幸福人妻李美慧八月便會停工養胎，準備迎接曾家金叵羅。
四間主客房
城中富豪鍾意晒遊艇，可以話係個人身份象徵，李美慧同老公曾文豪日前出海開P的豪華遊艇Mangusta 105，是意大利遊艇製造商Overmarine旗下Megayacht系列的一款超級遊艇，船身長達103英尺，船闊22.63英尺，遊艇搭載有兩台2400馬力發動機，駕駛船艙寬敞舒適，下層更設有主客4個房間，中層亦有闊落的休閒活動區和用餐區，船尾甲板除了能夠享受到日光浴外，還提供豐富的水上娛樂玩具，令你猶如置身水上世界。遊艇市值約一億港元。
李美慧 感動爆喊
在較早前的《深宮計》活動中，馬浚偉代表劇組向李美慧送上鮮花恭賀佢即將結婚，仲送上全部演員簽名賀卡，令李美慧即場感動爆喊，馬浚偉更表示：「美慧係個好女仔，喺橫店拍嘢撞見流浪狗，佢會捉佢哋去睇醫生、沖涼，之後又返去睇小狗！」但當一班演員開始玩遊戲時，馬浚偉忽然爆響口：「你粗身大細呀！小心啲！」洩露李美慧雙喜臨門！
問到李美慧係咪有喜，佢就話：「唔講得住！」至於婚後係咪要等生完B休息一年先再做嘢？佢話會睇自己到時嘅身體狀況先決定。
繼女曾昭儀環保轉贈BB衫
而李美慧嘅未來繼女曾昭儀早前出席活動，就直認早知李美慧有喜，亦有心理準備再做家姐，育有一女嘅佢直言會同繼母分享湊女經，以及建議對方食維他命增強營養，更表示：「到時我都會畀啲小朋友衫BB著，床方面都會借畀佢哋，環保啲，唔好浪費！」
李美慧 細未婚夫25歲
31歲嘅李美慧正式嫁畀大佢25年、已故百億富豪曾紀華二房長子曾文豪做闊太，喺淺水灣酒店搞結婚派對後，7月會到法國尼斯再擺酒。
李美慧同老公4月仲去咗不丹、喜馬拉雅山影婚照㖭。李美慧透露同老公係朋友介紹認識，拍咗半年拖左右就決定訂終身。
李美慧同曾文豪嘅細女曾昭亮同年，曾文豪大女曾昭怡比佢更大一年，睇佢啲相就知一早融入家中，而兩個繼女亦有陪同一齊去不丹影婚照，相信都好接受呢個繼母！
李美慧 曾演多套電視劇
現年31歲的李美慧，真名李斯庭，於2006年曾參選港姐，可惜三甲不入。其後加入無綫藝員訓練班，曾做過遊戲節目《一擲千金》的千金小姐，又擔任TVB8主持《娛樂最前綫》，曾參演過多套電視劇，但最為人認識的是於《少年四大名捕》中飾演馬國明的妹妹、《宮心計》等。
大讚男方夠成熟
李美慧被問到男方有何吸引之處時，她就指對方是個成熟型暖男，對她及其屋企人亦很好。當時被問到會否生小朋友，她則說：「都會努力造人，男女冇所謂，因為佢都已經有仔女。」
婚後繼續工作
而婚後會否繼續拍劇？她說：「都會客串吓拍劇，同埋做有關動物嘅義工，又會想搞生意但未計劃，到時老公一定會幫手，不過我都會諗清楚先，唔想蝕佢本。」
