【流氓大亨重播】 劉嘉玲澄清冇激嬲Do姐 踢爆遲到大王另有其人！
廣告
繼《大時代》、《我本善良》後，無綫又喺深夜時段重播另一神劇《流氓大亨》，呢套由萬梓良（萬子）、Do姐鄭裕玲、劉嘉玲、吳啟華、周海媚等主演嘅經典劇，除劇情深入民心外，鏡頭以外嘅是非亦成為一眾視迷八卦嘅焦點，有傳當年仲係新人嘅劉嘉玲，因喺拍攝期間遲到而激嬲咗Do姐，不過兩人已否認，並且爆出真兇係另有其人！
撰文：東方新地
圖片：互聯網、Instagram、東星
劉嘉玲食死貓
神劇《流氓大亨》重播，女主角Do姐近日邀請咗惜日拍檔劉嘉玲上佢嘅電台節目做訪問，二人提到當年拍攝時點滴，坦言當年自己仲係新人嘅劉嘉玲，承認因為劇本太多有時未背熟就埋位，被Do姐發現佢未做足功課就入廠，即被Do姐質問：「你究竟知唔知今場拍咩？」雖然被窒，但劉嘉玲話冇怨過Do姐，仲感激對方嘅教導。對於一直有傳當年劉嘉玲因喺拍攝期間遲到而激嬲Do姐，二人當場否認，仲爆出遲到原兇查實係周海媚！Do姐話當年仲係新人嘅周海媚，遲到成兩個鐘，出名守時嘅Do姐當然嬲爆，於是等海味到場後，Do姐就話要去飲茶，最終要海味等番佢兩個鐘。
《流氓大亨》經典場面
《流氓大亨》有唔少經典場面，最爆一幕當然係大結局時萬梓良對劇中昏迷嘅Do姐表白足足7分鐘，之後激動大叫「so what」非常震撼。肉緊嘅萬子邊喊邊講對白，尤其嗰行鼻涕最令人深刻，連星爺周星馳喺電影《喜劇之王》中都有重演呢幕！
萬子堅打吳啟華
另有一幕講述萬子出手打吳啟華，為求逼真，萬子事前並冇同吳啟華商量會真打，極度投入嘅萬子仲即席加插拎起個垃圾桶擲向對方，被真打嘅吳啟華事後堅嬲，最終萬子自掏腰包送古董表畀吳啟華賠罪。
延伸閱讀：
