洪永城被爆婚訊好口密女友梁諾妍回應時爆響口…

洪永城多謝大家祝福

洪永城對被爆求婚成功一事，答得小心謹慎，初指沒有求婚，但被問到結婚計劃時，洪永城直言有計劃，表示多謝大家的祝福，有進一步消息會跟大家分享。而女友梁諾妍答得大方，直言只要大家心靈相通，預告會隨時閃婚，更指二人都很愛小動物，所以兩口子當家中的老狗Coco如子女般照顧，不時一家三口家庭樂。

洪永城放棄唐詩詠因梁諾妍決定封盤

洪永城與梁諾妍（Inez）拍拖兩年，這次的戀愛旅程令洪永城愛到跌入漩渦，甚至願意做老襯從此被困，對洪永城來說絕對是一個前所未有的經歷。36歲的洪永城，以往對感情事吊兒郎當，入行已被封媾女王，12年與任職金融界的圈外女友Emily拍拖四年，卻有傳因為背女友在外媾女而分手。到13年與唐詩詠撻著，外界一直都不看好，二人性格南轅北轍，洪永城更被指花弗性格難改，最後亦未能長揸「最不能錯過的女友」。相比起與唐詩詠拍拖的偷偷摸摸，洪永城與Inez愛得光明正大，Inez更有本事驅使洪永城永遠封盤，全因她是個百分百「最不可多得的女友」。

18年底，與唐詩詠甩拖後單身年半的洪永城，公開與模特兒兼長跑教練梁諾妍（Inez）拍拖，二人一撻即著感情一日千里。

洪永城變御用狗奴兩人一狗甜蜜拍拖

洪永城去年底終於氹到Inez同居試婚過二人世界，為增添小情趣他們領養了一隻已十歲的牧羊狗，雖然是男仔卻名叫Coco，估不到愛犬卻成為他們之間的第三者，因為Coco好黐洪永城，令Inez不時呷醋。Inez愛狗如命，領養初期仆心仆命照顧有腳患的Coco，現時Coco行得走得，Inez與洪永城不分晝夜，一有空就拍拖放狗。日前洪永城與Inez拖住Coco先到寓所附近的茶檔醫肚，難得搵到個願意踎街邊食麵的貼地女友，當家小生洪永城變成御用狗奴，每次Coco大小二便後都出手善後，充分反映出他將來會是個稱職的好爸爸。無腳雀仔肯改變自己落地，需要莫大的勇氣，睇嚟洪永城已經諗清諗楚，要同佢個森林講拜拜喇！

Inez愛心爆棚，去年與洪永城一起領養了一隻已十歲的牧羊狗Coco，二人當隻狗仔咁湊，日前一家三口外出，本來由Inez拖住Coco，點知突然扭計唔肯行，要轉手畀阿爸洪永城拖先行。

洪永城與 Inez幫襯油塘寓所附近的茶檔，二人唔介意要坐出街，洪永城仲拖住愛犬行去小雜貨店八卦周圍睇。

同居試婚愈試愈熱隨時奉子成婚

Inez條件優厚，畢業於加拿大多倫多大學的她樣子討好身材健美，擁修長美腿是全職模特兒，近年為ViuTV及開電視主持節目，難得入行以來都零緋聞，默默做好自己的工作，而且為人非常上進，除了考取了跑步教練牌及健身教練牌之外，還在中環開設自己的健身中心。與Inez拍拖初期，洪永城住在西貢匡湖居，日夜趕劇要見女友一面實在不易，去年底月租油塘豪宅同居試婚，愈試愈熱，愈熱愈試，早前被問及結婚計劃，洪永城直言：「我好ready，都差唔多年紀，都要做爸爸。（隨時奉子成婚？）女友好喜歡小朋友同小動物，如果發生了，我會處理，係會朝著呢個方向嘅。」另一方面，Inez亦開晒口恨披嫁衣，「我隨時ready，唔要佬都得㗎，但要先努力工作為小朋友儲教育基金，哈哈！」

食飽飽拖狗散步，Coco沿途放低幾兩黃金又周圍小便，洪永城跟手善後清理現場，做個負責任的狗主。

洪永城早已榮升業主在觀塘置業，不過要等明年才收樓，為了與Inez築愛巢，他在油塘的豪宅租了個細單位，這日拍完拖放完狗，二人一狗齊返歸。

拍拖N次對結婚從來隻字不提的洪永城都話ready，可見他與女友早已在結婚方面有共識。據知情者透露：「Tony（洪永城）以前確係衰花心未定性，Inez令佢明白兩個人一齊點先係最舒服，以前佢同唐詩詠女好宅男好動，根本就唔work。Inez份人好單純，經常發放正能量，佢嘅開朗樂天令Tony日日都活得開心，而且Inez係個獨立自主嘅女仔，Tony忙拍劇忙工作，佢會自己打發時間，唔會黐身同問長問短，之前Tony畀人話鹹豬嘴朱晨麗，Inez好信任Tony完全冇過問，男人就係咁犯賤，咁樣Tony反而更加緊張女友；另外，Inez有一種好強嘅感染力，可能佢由細都好運動，健康生活亦放第一位，Tony同咗佢一齊亦開始注重生活同飲食上嘅健康。Tony講得啱，Inez嘅優點真係數唔晒，人美心善有愛心形容佢一啲都唔過分，對於Tony嚟講真係執到寶，所以佢好珍惜呢段關係，佢試過開口求婚，Inez亦初步應承咗，打風都打唔甩㗎喇！Tony諗住等機會補做形式上嘅嘢，令Inez有個美好嘅回憶。」早前洪永城表示袁偉豪趁跑步向張寶兒求婚有參考價值，他說：「若我在馬拉松的終點求婚也不錯！」漏晒口風。