擔正《法證先鋒IV》 37歲李施嬅4.0變靚
撰文：東方新地｜圖片：新傳媒圖片庫、李施嬅IG
李施嬅 肌膚繃緊
03年參選香港小姐入行的李施嬅，今年被安排在「第46屆香港小姐」選舉 決賽中擔任評判，要同新一屆佳麗同場出鏡鬥靚，37歲的她卻能逆齡生長，相比當年22歲參選時仍然零皺紋，當晚出鏡時肌膚繃緊眼肚消失愈變愈靚，同新婚陳凱琳、田蕊妮坐埋一齊，就有網民表示差啲認唔到佢。
晒海外獎爆喊
出道15年，李施嬅一路有法力變靚，在無綫亦有過唔少代表作，《寒山潛龍》、《樓奴》、《大太監》都有不俗表現，但偏偏在無綫台慶頒獎禮同獎項無緣，眼見好姊妹胡杏兒胡定欣先後升呢做視后，一直耿耿於懷。上年在《胡說八道真情假期》節目上，提到攞獎就一度感觸落淚，原來當時她剛憑微電影《Once More》在海外攞咗兩個女演員獎，拿住獎項同好姊妹分享時，她就爆喊表示演技終於獲得肯定，令她對自己有番信心，嚇到一班姊妹即時安慰佢；早前有消息指她計劃明年約滿無綫唔再續約，據知情者透露：「入咗行咁多年，每年台慶頒獎禮都係陪坐，連一個女配角獎都未攞過，Selena其實都好心灰，成日都呻話到底自己係咪真係唔得！」
取替楊怡
不過，近日李施嬅再次被監製梅小青賞識，在10月開拍的《法證先鋒IV》擔正做女一，同男主角譚俊彥繼《天命》後再次合作，但唔講唔知，原來呢個機會亦得來不易。據知情者透露：「《法證》系列可以話係收視保證，以前好多藝人都係拍呢套劇紅咗，所以Selena知道小青姐會用佢，不知幾開心，不過，其實小青姐籌拍初期女一人選係楊怡，不過阿怡想休息趕生B推咗，反而益咗Selena！」執到好籌有機拍TVB重頭劇，難怪李施嬅要落力變靚！
李施嬅 4.0變靚 進化史
03年原始版
03年參選香港小姐獲「最上鏡小姐」及「才藝小姐」兩獎，不過睇番當年李施嬅個樣同依家的確相差頗大，矇豬眼，無鼻樑，身材亦唔多突出。
14年進化版
14年拍《樓奴》演出被讚，而且樣子甜美。
16年變靚版
前年出席活動，李施嬅輪廓愈見鮮明，睇落仲有啲似好姊妹胡定欣。
18年再進化 忽然緊緻！
日前有份擔任今年港姐評判的李施 嬅，雖然風頭不及新婚陳凱琳及一班新任港姐，但面容忽然緊致脹卜卜，睇落比當年22歲參選時更標緻，睇嚟呢位師姐應該可以教吓班佳麗有乜方法可以愈變愈靚。
