《九五至尊》重播再見江華 網民：「江華唔扮劉華，仲係唔係江華？」
撰文：東方新地｜圖片：新傳媒圖片庫、江華微博
《九五至尊》皇帝江華、呂四娘張可頤穿越變平民
其實2003年的《九五至尊》原名叫做《朕到未來》，將《回到未來》的戲軌搬到《Back To The 清朝》，有說本劇原本由羅嘉良同張可頤主演，但羅嘉良無檔期，就由演出完《尋秦記》憑連晉 / 嫪毐頗受注目的江華飾演穿越時空的雍正帝：
《九五至尊》劇情：雍正帝淪落到要洗廁所
《九五至尊》是繼2001年首播的《尋秦記》後，另一套時空穿越劇集，內容講清朝皇帝雍正（江華飾）與「反清復明」的女俠呂四娘（張可頤飾）穿越時空流落現代香港所發生的事。網民常常將此劇與《尋秦記》，和後來同樣為時空穿越劇的《回到三國》（2012年）作比較，更感嘆新不如舊。
《九五至尊》劇情第一集就講「雍正皇帝」和「呂四娘 」捲入時空漩渦穿梭到2003年的香港，其中江華飾演穿越時空流落香港的「雍正皇帝」，時刻保持張開雙腿的皇帝坐姿，被認為相當有「霸氣」。
「江華、劉華」傻傻分不清！江華繼續劉華 反笠cap帽
劉華、江華定劉江華？傻傻分不清！有時真係唔怪得小編，係江華無論係演員定做保險，舉手投足都比劉華更劉華！話說轉行做保險都已經好多年，早排喺九龍城見到江華攞車，小編個心都係離一離：「唔通畀我野生捕獲劉華？」鬼咩？邊有55歲保險從業員出轉夜街會反笠頂cap帽、成身潮服至得㗎？
見到鏡頭，江華不慌不忙保持鎮定仲要好有台型，凌厲眼神睥完你、再伸手整個劉華式民間特首手勢打招呼。事實勝於雄辯，唔好再話江華鍾意扮劉華，江華根本就係劉華，OK？
第一眼見到有個反笠頂帽、全身黑色、輪廓分明嘅有型大叔，係唔係十足十劉華先？
望真啲，原來係前度師奶殺手現職保險的江華，畀人話似劉華講足30年，小編都唔識分，到底佢係扮，定係做緊自己。
雖然淡出娛樂圈，江華見到鏡頭依然淡定，仲整多個民間特首一樣嘅氣勢手勢，同小編打聲招呼先。
打完招呼上到車準備開車走，繼續劉華上身，勁chok，全套動作一氣呵成、登台一樣，就算係真劉華出場，小編都懷疑有冇做得咁流暢！
江華 劉華 世紀合照
已經轉行賣保險嘅江華年輕時風度翩翩，迷死唔少師奶，而且一直都畀人話同劉德華似樣。2015年江華曾經喺微博上載咗兩張同劉華嘅合照，講真兩位型男同以往都冇咩分別，都係一樣成熟有型，都仲係好似樣！
當然唔少得小編自家製嘅世紀合照！
江華 戴老花鏡
江華早年因為腰腿傷患淡出幕前，除咗開班教人做戲，近年仲忽然轉行做保險經紀，佢話做保險都係玩票性質，而且可以識多啲朋友，仲有唔少fans特登上門搵佢買保險！早前見佢約埋男友人一齊落又一城行街睇書，雖然江華鍾意扮劉華，成日畀人讚佢仲係美魔男，不過話晒都年過半百，呢日去到書店打書釘，江華就要戴上老花眼鏡先睇得清楚。
同場加映：李思捷都扮劉華！
李思捷憑扮嘢彈起，最叻扮四大天王， 早前佢去咗中環睇衫， 戴住副超，邊行邊插褲袋，上身紅色皮褸，下身牛仔褲再加對紅色波鞋，個look就激似劉德華喺《賭俠》入面嘅角色陳刀仔，李思捷喺電視上扮劉天王扮到似模似樣，喺現實生活都當自己係天王！
李思捷入到時裝店，睇鞋揀衫都繼續單手插袋，佢身上集合咗陳刀仔嘅紅色皮褸，仲有劉華當年戴hit咗嘅名牌頸鏈，係好型呀喺廿幾年前！
連條底底都襯番紅黑色！
劉德華前年爲電影《賭城風雲3》開工，都扮番當年嘅陳刀仔角色，紅色貼身皮褸點少得。
