同馮盈盈交惡變世仇 江嘉敏借林凱恩過橋轉轉黐李澤楷女友郭嘉文
娛樂圈人情紙咁薄，好妹姊話反面就反面，江嘉敏同馮盈盈就係近年嘅最佳例子，去完船P各執一詞，𢱑爛塊面都冇所謂，江嘉敏繼續唔收口，馮盈盈就好少少，唔想件事再發酵，不過之後就各行各路，好明顯冇friend做。
江嘉敏自貼四季酒店瘋狂Party照：「人越大真的越來越少笑得那麼開懷」
近日江嘉敏就自己分享咗同林凱恩賀生日的圖輯，仲寫長文多謝一班「新姐妹」，文中佢叫林做「小男友」：
因為很多因素，人越大真的越來越少笑得那麼開懷。☺️☺️
原本只是打算買一個生日蛋糕衝上小男友家，變成了幾位妃子密謀了一個小派對。然後當日小男友開心到不斷發出海豚的高音叫聲，我們成功了！
黐林凱恩有著數 讚對方「善良可愛的小女孩」
冇咗馮盈盈，江嘉敏身邊仲有好多有潛質嘅姊妹，喺《愛‧回家》飾演Bonnie上位嘅林凱恩就極速補位，成為江嘉敏頭號閨密。點解話林凱恩有潛質，咪就係因為佢同李澤楷女友郭嘉文friend過打band，之前仲畀本刊影到一齊返李家大宅，江嘉敏算過度過，點會唔知黐林凱恩有著數呢？
精心部局夾鄺潔楹上四季酒店埋堆
終於畀江嘉敏等到機會嚟喇！日前林凱恩28歲生日，江嘉敏夾埋鄺潔楹喺中環四季酒店包房為好姊妹慶生，佢哋事前仲聯絡完全唔識未見過面嘅郭嘉文，嚟個裡應外合，呃林凱恩上房畀個驚喜佢。
當日郭嘉文原本約林凱恩去中環文華酒店high tea為佢慶生，食完之後就呃佢陪去中環四季酒店，點知江嘉敏同鄺潔楹已一早佈局，從視頻可見，林凱恩事前真係完全唔知情，鄺潔楹仲同郭嘉文say hello話係第一次見，江嘉敏就匿埋放波波製造驚喜，就係咁，四個女仔就嘈喧巴閉咁玩足一晚，話晒一次生兩次熟，江嘉敏有林凱恩做中間人，今次順利埋到郭嘉文身。姊妹堆愈玩愈富貴，江嘉敏目標明確，向上爬。
選港姐攞唔到冠軍唔緊要，最緊要好似15年季軍郭嘉文咁條命生得好，入行後在無綫《東張西望》做個主持仔，一個唔覺意畀李澤楷睇中，時來運到唔使捱，生活無憂乖乖做小小超女友。郭嘉文升呢後依舊貼地，與她相識於港姐時的林凱恩仲友誼長存，兩姊妹keep住密密見，郭嘉文更為林凱恩終身幸福著緊，經常帶住閨密在身邊，躋身上流社會，搵機會介紹筍盤畀林凱恩識。李澤楷身邊友人非富則貴，有郭嘉文出力拉紅線，林凱恩要釣金龜就要把握機會喇！
林凱恩為李澤楷女友郭嘉文好閨密
由平凡的《東張西望》主持變身李澤楷女友，郭嘉文當然有其過人之處，聽教聽話為人純樸低調就是她的優點，身為其閨密的林凱恩，當年選港姐奪得《友誼小姐》，從此與郭嘉文有影皆雙，二人同年加入無綫互相扶持，即使郭嘉文華麗轉身成為李澤楷身邊人，亦無損她們的感情，日見夜見情如姊妹，去年李澤楷拖郭嘉文現身馬場首次確認關係，林凱恩亦陪伴左右。
擴大社交圈子郭嘉文幫手拉紅線
林凱恩在無綫機會不斷，17年加入處境劇《愛‧回家之開心速遞》飾演「譚育英（Bonnie）」一角漸為人所認識，同年於台慶劇集《降魔的》內飾演「張佩玲」也獲網民讚賞，去年更於《她她她的少女時代》中飾演要角「張晴」，表現再次受到注目，更憑此角色提名《萬千星輝頒獎典禮2019 》「最佳女配角」及「飛躍進步女藝員」。默默耕耘向上爬的同時，其實林凱恩亦等緊她的Mr.Right出現，據知情者透露，「 Iris(林凱恩 )事業心較重，佢好鍾意演戲，不過眼見 Karmen(郭嘉文 )做咗小小超女友好幸福，佢都想搵個膊頭挨吓。Karmen見好姊妹同阮政峰甩拖後一直冇拖拍，dry成咁，成日搵機會介紹啲朋友佢識，每逢小小超有咩社交聚會，如果可以帶埋 Iris都會預埋佢，主要都係想擴大佢個社交圈，等佢識多啲筍盤睇吓有冇機會發展。」
早前本刊記者於銅鑼灣時代廣場見到郭嘉文與林凱恩行完街，由司機接送直抵李澤楷位於石澳的大宅，當日林凱恩身穿黑色上衣碎花裙，與好姊妹郭嘉文一樣薄施脂粉，看來想有樣學樣，走清純乖巧路線，希望能遇上一段童話般的姻緣。正所謂近朱者赤，林凱恩有郭嘉文射住，隨時釣到金龜。
