講你都唔信｜失戀江嘉敏獲高層珍姐點醒 孖野外達人方紹聰做壓軸主持
廣告
曾志偉出山孖住「大師兄」錢嘉樂主持《講你都唔信》，再加多一Pair新力軍主持，一度被網民以為《獎門人》返嚟啦﹗繼馮盈盈全靠曾志偉出馬令她得以解凍亮相幕前做主持；畀仔撇受情傷的江嘉敏亦獲高層珍姐點醒，委以重任拍住野外達人奶仔方紹聰做壓軸主持。
江嘉敏失戀後閉關多月
27歲的江嘉敏早前宣布與拍拖3年的電競高層男友Anthony分手，仲出po唱通街，意指剪短髮被嫌棄，男方疑似出軌令她徹底死心，已經唔係首次畀仔飛的江嘉敏似乎傷得甚重，連日在社交網繼續盡訴心中鬱結，透露閉關唔出街，失眠個幾月要睇中醫，仲上載舊MV暗示與男友對結婚意見有分歧。
江嘉敏出關接受新挑戰
回復單身的江嘉敏終於出關接受新任務，除了正等待另一套劇集開拍，她又被公司安排擔任節目《講你都唔信》的「壓軸主持」。性格坦率江嘉敏近年主要拍劇，今次要做節目主持絕對是新挑戰，她坦言做節目主持同做嘉賓感覺好唔同，是兩回事，準備的功課可能比較多，而且好考急才，做演員都有劇本，但主持就好考臨場發揮，所以她都要去偷師。
獲高層珍姐指點
江嘉敏透露事前已向高層珍姐（曾勵珍）請教，再加上有曾志偉同錢嘉樂睇住，佢話會冇咁緊張。江嘉敏又指起初都覺得好奇怪為何會找她做主持，今次她將會拍住奶仔方紹聰，二人合作無間有晒默契，不過江嘉敏就覺得自己的主持經驗最少，希望到時會盡量放鬆。
《講你都唔信》做多3集煞停
被於獲珍姐親自教導畀貼士被封是「珍姐新寵」，江嘉敏直言因為自己冇經驗，珍姐一心為她好、想她有好表現，才會出手教導。江嘉敏大讚珍姐好好人，有時看完playback都會給她意見。《講你都唔信》播出至今雖然時有爆笑場面，不過據知做埋江嘉敏、方紹聰主持的3集後便會煞停，節目監製陳志球受訪時被問到會否「添食」時，坦言覺得可以繼續做落去，但要同老闆（曾志偉）商量，仲話曾志偉冇期係煞停的其中一個原因。有冇得添食，就真係要睇收視同反應喇！
馮盈盈解凍後首亮相《講你都唔信》
曾志偉聯同錢嘉樂帶領馮盈盈及鄭衍峰為第二輪比賽擔任主持，兩晚節目嘉賓分別為肥媽、薛家燕、陸浩明、阮兆祥、鄧兆尊、何遠東、曹永廉、車婉婉及商天娥，三隊人馬將分別圍繞「第一次」及「講你都唔信」兩大主題進行講故仔技巧大比併。
撰文：東方新地圖片來源：無綫提供、IG@kaman_kong
