12對夫妻藝人求婚過程逐個睇 抱得美人歸都有蝦碌場面！
撰文：東方新地 圖片：何超盈Instagram Thomas XinIG、微博、IG、東星娛樂、影片截圖
何超盈 去年同男友訂婚
現年28歲的賭王何鴻燊四房千金何超盈自上年宣布與Thomas Xin 拍拖，近日傳出超盈訂婚及有喜的消息！今日超盈媽咪四太梁安琪證實呢個消息，佢向傳媒表示自己都唔係知道好耐，又透露女兒之前去左美國一段時間，返咗嚟後見她肥咗，四太叫囡囡減肥，點知超盈話：「我總之會畀個surprise你啦！」四太即時就明都。佢又話因為今年係盲年，而且二人已經訂咗婚，所以明白才搞婚禮！
據知Thomas是哈佛大學出身，性格活躍，曾為哈佛劍道會會長。而四太也好滿意呢個女婿：「佢真係幾好，我替我個女開心，佢係一個上進青年，對我個女好好！」
上年9月生日派對中，男友Thomas送咗鑽戒畀超盈作訂婚之用，由於Thomas比較怕醜唔想上鏡，同埋佢哋希望將戀情低調，先至搵嚴紀雯代勞，難怪當時超盈收到戒指笑得咁開心，仲對住鏡頭講「I Say Yes」！
公開求婚短片
今日超盈喺社交網上載求婚短片，片中超盈接過男友遞上嘅氣球，一邊就問係咩嚟，原來男友準備咗大堆紅色及粉紅色氣球做布置嚟求婚，到超盈去到氣球旁時啲波波就徐徐飄走，男友更加即場下跪，等到超盈Say yes之後，兩個人就喺氣球前甜蜜咀嘴，超盈仲大晒兩隻訂婚同求婚嘅巨鑽，甜蜜又浪漫！
而超盈亦喺社交網表示其實朋友間一早知呢件事，不過就要為佢哋保守秘密，仲話已準備好給一個驚喜畀家人添：「多謝朋友幫我保守呢個秘密咁耐，係朋友圈已係舊聞，依家終於可以同大家分享呢個開心片段，希望畀一點空間我面對人生呢新一頁，我已準備好給一個驚喜畀爹地媽咪 #engaged」
有片睇：
｜陳智燊宋熙年宋爸爸60大壽當日求婚
陳智燊喺接受商業一台訪問時表示，當年同宋熙年一齊主持《娛樂新聞台》而認識，互相深入了解幾年後先正式開始拍拖。陳智燊指當時自己係一個好小心、好慢熱嘅人，但宋熙年就剛好相反，經常「bilibala」、好開朗，二人形成一個強烈對比，可能就係一凹一凸，令佢哋一拍即合！
拍拖9年，係時候要考慮一下人生大事，陳智燊話求婚當時非常驚險，要特意向劇組請假，仲要喺一日之內來回香港同澳洲：「𠴱日我等佢做完節目之後，坐夜機返澳洲慶祝佢爸爸60大壽，我咪扮拍劇一早出門喺街度遊蕩，等佢出門口就即刻拎行李去機場。」行程雖然非常趕，但最後陳智燊都成功製造驚喜，抱得美人歸！
｜陳小春應采兒 經典跪下求婚式
早前，內地真人騷節目《妻子的浪漫旅行》搵了當年陳小春向應采兒求婚的片段，當年著上黑色衫嘅春哥雙膝跪地，手上拎住求婚必須品，而身穿綠色背心嘅應采兒就企近門口掩咀而笑，正當大家認為劇情發展落去梗係問句願唔願意後就禮成，點知春哥竟然只係一直跪兼口噏噏：「er……我不知道該說什麼。」
采兒父母見到未來女婿這個樣，企在後面說：「想哭啦！這麼高興的事情，再不講我幫你講啦！」，之後，春哥於一輪情緒嘅醞釀下，終訴忍唔住流下男兒淚，邊喊邊講：「你知道我在講甚麼（國語），你知我講咩，係囉…嫁比我…」，就這樣成功求婚！
｜孫耀威 陳美詩 求婚爆喊
孫耀威同陳美詩這一對，經歷了八年的愛情長跑，終於在2017年七月結婚了！講到求婚過程，孫耀威就話自己好大懵：「我妹妹住喺瑞士，我每年都會去探佢，嗰度有間甜品店係我老婆好鍾意食嘅，到我想求婚又唔知喺邊度求，就包咗呢間甜品店，買通埋個老闆，當佢叫甜品，送嚟嘅係戒指、花同香檳」。
當我一跪低想講：「嫁畀我好嗎？」都講唔出，太多感觸，自己喺度喊，我太太見到都知發生咩事，亦都好感觸、好感動，兩個人就跪喺度喊，喊咗好耐，先識笑，完全唔識得影相、冇任何鋪排，但呢個就係我哋兩個真實嘅相處。」
｜黎諾懿 李潔瑩餐廳扮求婚
顧家又錫老婆嘅黎諾懿，原來求婚過程一啲都唔浪漫！黎諾懿接受訪問時話：「我本身篤信玄學，有日，風水師同我講要結婚，唔係就要三年後，太太嗰時瞓喺我側邊，我就叫醒太太話結婚嘞，佢話哦，咁結囉！冇求婚！太太叫我買求婚戒指，幾個鐘後，太太話：『都係唔好，戴一世㗎，我信唔過你啲taste，我去揀完，你去畀錢啦！』
之後仲要去餐廳扮求婚，續說：「同太太講：『你都知嚟做咩，戒指你又見過，你覺得有咩驚喜呢？』佢話：『我唔理，你要做番。』求完，佢話：『都唔浪漫嘅！』我話你都知道晒，係唔會浪漫嘅。到生B，我同太太講：『老婆，我想生猴B！生咯！』佢話：『你可唔可以浪漫啲？」我話：「唔係呀，剩番半年，唔係想生就生到。』雖然最終生唔到猴B生咗雞仔，但我就係咁唔浪漫。」
｜鍾嘉欣 Jeremy喜劇式求婚
鍾嘉欣 (Linda)與老公Jeremy二人的根源自加拿大，但相識於香港，種下不解緣。他們相識結婚不久後便誕下女兒Kelly，Linda形容現在自己擁有一個Wonderful Family！
不過Linda就表示求婚過程不浪漫，但她已經感動到喊了：「因為佢唔係浪漫嘅人，佢用誠意，中間有好多蝦碌嘅嘢，佢又好緊張，又跪地，跟住有人嚟，驚有人影到，起番身，好多蝦碌、好好笑，反而我覺得呢個求婚嘅片段係喜劇形式。」
｜章子怡汪峰航拍機送鑽戒
章子怡36歲生日當日，其音樂人男友汪峰豪花百萬在北京為女友舉行驚喜生日派對！
在醉人花海浪漫氣氛下，汪峰突然以航拍機送上九卡鑽戒跪地求婚表白：「如果我們都老了，我還能照顧你。」章子怡激動得當場落淚，在一眾親友見證下說出：「我願意。」
｜梁詠琪 Sergio砌傢俬求婚
梁詠琪同老公Sergio這一對，拍拖半年，Sergio已密謀求婚，趁Gigi不在港期間，串通梁母讓他進屋，將傢俬雜物砌成「Merry Me」給她驚喜。
Gigi說：「那晚我發高燒，很掃興，一返來就叫他送我入醫院，沒回答他。一個星期後，我安排了一間酒店房，預先在窗口用Post-it貼了一個 『Yes』字，入到房叫他求多次婚，他一說完，我就拉開窗簾，他即時抱住我喊。」
｜楊千嬅 丁子高 賭城閃婚
說到閃婚的代表，一定包括楊千嬅跟丁子高！現在他們一家三口幸福快樂，但當年丁子高其實兩度求婚不果。
他趁兩人到美國旅行第三次浪漫求婚，借千嬅之前曾講「自己過了30歲就要為自己倒數」回應她「如果真的是這樣，是不是應好好珍惜，讓我陪你一齊走下去」。千嬅頓時十分感動，最後兩人決定開車去拉斯維加斯註冊結婚，還婚後才通知雙方父母呢！
｜洪天明 周家蔚馬爾代夫求婚
08年，洪天明和周家蔚到馬爾代夫旅行，慶祝周家蔚生日，同行還有洪天明家人及一班好友。行程的最後一晚，洪天明拿著蛋糕出來，周家蔚感到奇怪，明明之前已經慶祝了，但原來蛋糕上面有只戒指！
此時，洪天明突然跪地求婚，周家蔚感動落淚，然後答應！當天洪天明爸爸洪金寶，繼母高麗虹、曾志偉、湯盈盈、梁靖琪等好友都齊齊見證這樁喜事。
｜王祖藍 李亞男 台慶求婚
王祖藍和李亞男相戀5年。在2014年台慶夜，兩人伙魔術師表演，但於尾段時突爆驚喜，祖藍手執一大束紅玫瑰，一臉嚴肅步出，然後對著李亞男說：「我們是很不同的人，我當時只是兒童節目主持，而你是選美冠軍，我很矮，你很高，我很複雜，你很單純」。
續說：「感謝主讓我們認諳了對方，在愛情路上我們經歷好多風浪，無論追你有多困難，娶到你，我一生都十分幸福！每一日都是恩典的一天。」隨即送上巨型鑽戒，這一番話讓李亞男感動落淚。現場一同見證著這幸福的一刻，並紛紛上前祝賀。
｜郭偉亮 葉佩雯 演唱會求婚
郭偉亮（Eric Kwok）跟葉佩雯的求婚結婚故事亦是轟動一時，Eric Kwok 在自己樂隊Swing的最後一次演唱會，跟女友葉佩雯合唱後，在近萬位樂迷前單膝下跪，送上88支玫瑰霸氣求婚。
當時葉佩雯已經哭成淚人，誰知Eric Kwok更一早安排律師在場簽紙註冊，以及邀請謝霆鋒、陳奕迅、黃偉文、何超儀等一眾兄弟好友見證，結束兩人11年的愛情長跑，成為圈中的模範夫妻。
