母親節買禮送長輩 靚靚袁詠儀嘆做嚴母代價大 係因為⋯⋯

撰文：東方新地｜圖片：新傳媒圖片庫、袁詠儀IG

母親節送禮

明日就係母親節，早前就見到靚靚去咗銅鑼灣一間買電話嘅舖頭，佢喺度睇咗陣，唔使五分鐘就扑搥掃咗三部Iphone X，相信佢係熟客仔，店員仲做埋人肉速遞幫手拎貨，跟住靚靚齊齊去保母車，等靚靚坐穩就將貨交畀佢！睇嚟似係靚靚買嚟送畀長輩嘅母親節禮物！

做嚴母代價大

雖則靚靚重視呢啲禮節，會氹吓長輩開心，之但係原來自己就從來冇收過阿仔魔童嘅母親節禮物，靚靚為咗教好個仔，喺屋企一直擔任嚴母角色，反而老公張智霖 (Chilam) 就係阿仔嘅yes man，所以由細到大魔童都係比較黐爹哋多啲！

平時又要Chilam孭住佢㖭！靚靚都係企埋一邊！

靚靚嘆：屋企只有父親節

靚靚無奈話：「做嚴母真係好慘，屋企只有父親節，冇母親節，待遇好懸殊，囝囝起身只係會搵爹哋，就算我喺正門口引佢注意，佢都只會叫『爹哋』，佢心情好嘅時候都會叫吓我嘅！唔緊要，有朝一日佢就會明白我嘅苦心。」母愛就係咁偉大，好似靚靚咁從來係無條件咁付出！

其實靚靚以往係有收過魔童嘅母親節禮物㗎！有相為証！

仲有魔童自製嘅環保袋，魔童仲喺上面畫上一幅畫，同寫上「I Love U」字句，超sweet！

Chilam 孖魔童放飛機

至於魔童有幾黐老竇Chilam？有片畀你睇：

陳小春靚靚Chilam 化身賭神

展開最強親子旅行團

仲有早前復活節長假，靚靚袁詠儀同Chilam帶住魔童、陳小春應采兒同囝囝Jasper、蔡一智一家以及關心妍一家三口，一行十幾人浩浩蕩蕩去泰國布吉旅行，大家一齊入住一間超豪華resort。此行同時為了慶祝蔡一智太太雪芳嘅生日，大人細路仲要有dresscode，齊齊換上花碌碌衫開party，真係夠晒熱鬧！

呢班明星家長陪仔女游水、飲飲食食就當然走唔甩，亦自行安排大人玩動，就係鋤啤，講到玩啤牌大家都玩得好認真，連對住對手老婆靚靚，一樣唔會鬆手，靚靚亦眼神凌厲啤實，不過之後靚靚搞笑話大家係「賭城瘋人」。

本來大家唔係玩開嗰堆朋友，原來今次咁難得聚，全靠中間嘅好友蔡一智精心安排，令大家聚埋一齊去旅行放鬆吓。應采兒又留言指靚靚係「傳說中比我還凶的女人，幸會幸會」。睇見大家嘅合照玩得好開心，相信呢次旅程令大家都成為咗朋友﹗