樊少皇再被揭遭匿名信追債 老婆JJ嬲爆出聲護夫！
撰文：東方新地｜圖片：微博、新傅媒圖片庫
樊少皇再爆出被追債
現時35歲的賈曉晨（JJ）前年與46歲老公「力王」樊少皇結婚，並於上年11月誕下愛女。雖然丈夫一直有不少新聞，例如與JJ拍拖時被爆與前任女友育有一子一女，前年又被財務公司踩上JJ寓所追債200萬等，但JJ仍力撐老公！近日，再爆出樊少皇被匿名信追債一事！
匿名追債信誤寄
據報道指，樊少皇近日再被追數，爆料人因於信箱發現有一封信件，打開後嚇見追債字條，並指入面有樊少皇的相，及只寫著「欠債還$」的字句，但信件卻誤寄到爆料人的郵箱，才得悉此事。
另外，據知由於信件寫的是一個雙連單位，但冇寫幾樓，可能才引致誤寄一事。同時，有指之該住處亦有時會遇見過樊少皇，但最近就好少見到他，令事件更撲朔迷離。
JJ發聲力撐老公
對於樊少皇再次被指欠債，JJ則透過經理人回應，表示一直都知道有人周圍寄此追債信，有公司亦有收到，反指若然係追債，為何沒有留下聯絡方法？
同時，續指樊少皇之前幫一個品牌做代言，及後中間的公司收唔到客人錢，所以去追對方還錢，因此若然真要追債按道理會留聯絡方法，所以唔知發信人有何動機！
即使再有追債事件爆出，但依然冇阻JJ心情，上星期五正值七夕，JJ亦有於個人社交網上載與老公的合照，相中還有愛女及家中愛犬，可見心情依然靚靚，並未因老公被匿名信追債所影響！
潛水避債
近年轉戰內地的樊少皇，除接拍劇集，更不時參與電影，密密賺經濟應不成問題！不過，2016年時有傳樊少皇去年尾向朋友借下二百萬應急，更要簽文件及於身份證文件上打下指模，以確認借貸之事！16年三月，有收數公司受委託，向樊少皇追討餘下欠款，有指樊少皇卻一直潛水唔接電話，令收數佬要四出尋人，最終直接去JJ將軍澳寓所拍門追數！
婚後先知欠債
有指JJ跟樊少皇於今年元旦結婚後，新婚不久先知老公欠下巨債，JJ得悉後晴天霹靂爆喊！據知樊少皇曾跟JJ解釋根本冇借人錢，只係為義氣幫朋友，點知後來對方反轉豬肚，結果樊少皇就咁搞到一身蟻！
JJ撐老公：佢先係受害者
對於老公樊少皇因欠債要簽文件，又要於身份證文件上打下指模一事，JJ表示：「據我所知，有人呃咗佢三百萬係真嘅，但我哋之前一路冇時間處理呢件事，但如果係咁，我哋會選擇報警。(要還錢？)冇人爭錢，仲要有人呃咗佢錢呀！(香港定內地發生)呢個唔講喇，我搵咗律師。(你一直知情？)我知有人呃咗佢，但你講嗰件事我唔知！」
一手食雞 一隻手抱女 賈曉晨：練了一身好本領
賈曉晨(JJ)當媽媽後，不時在網上分享湊女之日常，呢日佢就晒出一張抱住囡囡「小飯兜」食嘢相，相中見JJ一邊食雞翼，另一隻手就抱住囡囡餵佢飲奶，不愧係力王嫂！JJ就話：「練就了一身好本領，又當爹又當媽系列@樊少皇」
賈曉晨 公開全家福
樊少皇與賈曉晨自育有一女「小飯兜」後，一直為愛女嘅容貌保持神秘。但就喺今日，賈曉晨竟然喺個人社交網放咗幾張囡囡嘅正臉相，終於令小飯兜嘅樣曝光！
賈曉晨大方放囡囡正臉相
從賈曉晨擺上網啲相睇得到，小飯兜個樣甚得父母真傳，對眼又圓又大，眼仔碌碌咁，十分精靈！加上下巴尖尖咁，相信第日長大之後都會係一個靚女！
賈曉晨更留言：「親愛的寶貝，我們的小飯兜，從你出生、一周、滿月、百天、到現在半歲，媽咪時時刻刻陪着你，就怕錯過你成長的每一秒鐘，今天你半歲生日了，媽媽要跟大家一起分享這份快樂！希望寶貝身體棒棒的，每天快快樂樂，長大也是個樂觀快樂又聰明的好孩子。」
賈曉晨 羨慕囡囡
事實上，賈曉晨之前都有擺囡囡啲相上網，但就唔係正臉。例如有一次，佢就只影愛女嘅半邊面，仲留言話好羨慕小飯兜長長嘅眼睫毛～
樊少皇與賈曉晨為愛女保持神秘
2016年，樊少皇與賈曉晨結婚。上年11月，賈曉晨就喺香港養和醫院誕下囡囡「小飯兜」，期後兩公婆一直都冇公開女兒嘅正臉，甚為秘密。
