樊少皇被指欠債原來被人出賣 老婆賈曉晨：係傷心嘅事…
賈曉晨原來係慈母一名
出席電影煞科宴嘅賈曉晨喺電影中飾演CID，戲中除咗有開槍鏡頭外，仲有動作戲份，JJ指自己拍之前亦有相約女警朋友見面，稱於朋友身上發現佢哋好有男子氣概，所以對於佢嚟講係個好大挑戰，因為拍完要番屋企湊女就唔可以咁惡，睇嚟JJ都係慈母一名！
JJ就囡囡「小飯兜」話咁快就已經11個月大，JJ就話呀女依家只係識叫『奶、奶』同自己個名『兜兜』，仲大爆呀女好大食、好大隻，身型好似人哋歲幾嘅小朋友咁，仲話呀B骨架好似爸爸樊少皇！
樊少皇被指欠債原來被人出賣
對於之前老公樊少皇被匿名信追債一，JJ今次就終於澄清成件事嘅來龍去脈，直言今次事件係由一個由細玩到大嘅朋友而起，指老公借咗幾百萬俾人，但人哋冇還，反而令到自己被人追債，坦言好無辜之外，更令老公樊少皇名譽同金錢受到損失！
樊少皇再爆出被追債
現時35歲的賈曉晨（JJ）前年與46歲老公「力王」樊少皇結婚，並於上年11月誕下愛女。雖然丈夫一直有不少新聞，例如與JJ拍拖時被爆與前任女友育有一子一女，前年又被財務公司踩上JJ寓所追債200萬等，但JJ仍力撐老公！早前，再爆出樊少皇被匿名信追債一事！
匿名追債信誤寄
據報道指，樊少皇再被追數，爆料人因於信箱發現有一封信件，打開後嚇見追債字條，並指入面有樊少皇的相，及只寫著「欠債還$」的字句，但信件卻誤寄到爆料人的郵箱，才得悉此事。
另外，據知由於信件寫的是一個雙連單位，但冇寫幾樓，可能才引致誤寄一事。同時，有指之該住處亦有時會遇見過樊少皇，但最近就好少見到他，令事件更撲朔迷離。
JJ發聲力撐老公
對於樊少皇再次被指欠債，JJ則透過經理人回應，表示一直都知道有人周圍寄此追債信，有公司亦有收到，反指若然係追債，為何沒有留下聯絡方法？
同時，續指樊少皇之前幫一個品牌做代言，及後中間的公司收唔到客人錢，所以去追對方還錢，因此若然真要追債按道理會留聯絡方法，所以唔知發信人有何動機！
JJ亦發聲明撐老公，並在微博發文，留言：「我先生樊少皇沒有欠任何人債務，希望不法分子尊重法律，在此我向因不法分子對無辜受滋擾的朋友，還有我之前所代言合約早已到期的美容院道歉🙏🙏🙏！！！受滋擾的公司與人士已報警，相信警方已在處理，我先生也已將此事分別交給北京和香港律師處理，謝謝大家！」
即使再有追債事件爆出，但依然冇阻JJ心情，早前七夕，JJ亦有於個人社交網上載與老公的合照，相中還有愛女及家中愛犬，可見心情依然靚靚，並未因老公被匿名信追債所影響！
潛水避債
近年轉戰內地的樊少皇，除接拍劇集，更不時參與電影，密密賺經濟應不成問題！不過，2016年時有傳樊少皇去年尾向朋友借下二百萬應急，更要簽文件及於身份證文件上打下指模，以確認借貸之事！16年三月，有收數公司受委託，向樊少皇追討餘下欠款，有指樊少皇卻一直潛水唔接電話，令收數佬要四出尋人，最終直接去JJ將軍澳寓所拍門追數！
婚後先知欠債
有指JJ跟樊少皇於今年元旦結婚後，新婚不久先知老公欠下巨債，JJ得悉後晴天霹靂爆喊！據知樊少皇曾跟JJ解釋根本冇借人錢，只係為義氣幫朋友，點知後來對方反轉豬肚，結果樊少皇就咁搞到一身蟻！
JJ撐老公：佢先係受害者
對於老公樊少皇因欠債要簽文件，又要於身份證文件上打下指模一事，JJ表示：「據我所知，有人呃咗佢三百萬係真嘅，但我哋之前一路冇時間處理呢件事，但如果係咁，我哋會選擇報警。(要還錢？)冇人爭錢，仲要有人呃咗佢錢呀！(香港定內地發生)呢個唔講喇，我搵咗律師。(你一直知情？)我知有人呃咗佢，但你講嗰件事我唔知！」
