楊證樺為愛妻沈可欣送驚喜 直升機補求婚
原文：Sunday Kiss｜圖片：《1+1的深情》截圖
「綠葉夫婦」 楊證樺沈可欣
楊證樺及沈可欣同為無綫綠葉演員，演出劇集無數，有睇電視的大家未必叫得出真名，但一定認得兩人！佢哋早已認識十多年，但真正走在一起只是近幾年的事，對於戀情十分低調，很多藝員同事直至兩人結婚才得悉，仲以為拍緊戲！兩人現時育有一個就快2歲嘅兒子楊宏志 (Eugene)。
囝囝抽筋暈倒 楊證樺：人生去到嗰一刻，原來所有嘢都可以唔要
楊證樺同沈可欣擔任《1+1的深情》嘅嘉賓，分享兩人嘅愛情故事，當中佢哋提及囝囝楊宏志 (Eugene)上年突然發燒，睇醫生後久久未退燒，之後楊證樺揸車去醫院途中，囝囝更突然抽筋，然後暈倒、失去知覺。
當時沈可欣已經喊到死去活來，以為囝囝咁就走咗… 幸好十多秒後囝囝有返喊聲，楊證樺個心先定落嚟少少。
人生最深刻一次
去到醫院，囝囝再度失去知覺，醫生馬上為Eugene進行急救，好彩最後平安無事。沈可欣憶述當時有人同佢講「頭先你個仔個嘴變咗紫色」，佢話佢寧願唔知道，嚇死佢哋。佢哋話，依一次係佢哋人生之中最深刻嘅一次。
楊證樺講述當時嘅心情：「去到嗰一刻，我原來所有嘢都可以唔要，我只要個仔。」
楊證樺 鍾意沈可欣夠師奶
另外講到楊證樺同沈可欣嘅愛情故事，其實兩人喺拍拖前已經相識十幾年，一直只係朋友，亦無真正合作過。直至有段時間二人恰巧住喺同一區，住得近咗又開始合作拍劇，楊證樺開始追求沈可欣。
後來世界盃期間，楊證樺約沈可欣去佢屋企睇波，兩人慢慢就開始拍拖。
雖然話楊證樺唔係咩知名藝人，又唔算好靚仔，但原來佢以前都幾唔定性，拍過成三十幾次拖！直至遇上沈可欣後，佢話鍾意沈可欣性格「夠師奶」，精打細算、心思細密，更會拉著成日唔理後果「橫衝直撞」嘅自己。
驚喜補求婚
楊證樺同沈可欣由朋友、到拍拖、到結婚嘅過程非常快，因為係有咗小朋友先至結婚，決定結婚嘅過程非常倉促，所以並無浪漫嘅求婚。為此，楊證樺決定要聯同朋友俾個驚喜沈可欣，向佢補求婚。節目中佢呃沈可欣要去香港沙頭角嘅城堡拍攝，偷偷哋準備直升機，送老婆一個驚喜。喺沈可欣去直升機場嘅途中，沈可欣都透露話當時求婚係喺佢睇緊電視嘅時候發生，好唔浪漫。
沈可欣去到現場見到楊證樺準備嘅驚喜，個嘴O到合唔埋，之後感動流淚。楊證樺求婚嘅時候仲話：「喺嚟緊嘅日子我會用盡我嘅能力，守謢你、保護你、愛護你。」
