楊怡甜晒老婆視覺下的羅仲謙 「愛是這樣XX！」
撰文：東方新地｜圖片：楊怡微博
楊怡甜晒老婆視覺下的羅仲謙
楊怡同羅仲謙唔經唔覺都已經結咗婚3年，婚後楊怡亦開始減產，而老公為俾最好生活楊怡亦好努力搵錢。最近，羅仲謙不忙抽空陪老婆楊怡，見楊怡喺個人社交網上載同老公踩單車短片，坐車尾負責揸機嘅阿怡就留言：「愛是這樣簡單 #老婆視覺#」。
楊怡雖然冇上鏡，但就以老婆私人視覺影低老公為自己踩單車一段甜蜜時刻，仲有工人喺單車上嘅影子，再加片尾楊怡自己嘅心心手指pose，唔洗出聲都知佢有幾冧啦！
就連朱晨麗睇到段片都忍唔住留言：「浪漫到呢」，咁成段片又真係好閃盲眼睛嘅～
即時回顧：
楊怡：我同馬明係最夾
早前，楊怡喺接受港台電台訪問時大談當年老公謙謙係點將佢追到手。楊怡笑指其實當初根本冇特別留意老公羅仲謙，冇諗過自己將會同佢拍拖，冇諗過呢套《On Call36小時》會成為佢嘅人生轉捩點。
佢當時只係專心拍戲，就連大家都完全估唔到，因為呢套戲同楊怡撮合埋一齊嘅居然唔係戲中好拍檔、好情侶馬國明！楊怡話：「真係好奇怪，因為同佢（羅仲謙）係風馬牛不相及嘅人，而且大家都覺得我同馬明係最夾。」
其實，楊怡你唔使奇怪，愛情就係咁，愛情係霎那間嘅火花，愛情本來就係會來得突然，一個本來一直喺你身邊嘅人，你可能會有一日「叮！」一聲，同佢刷出火花。所以，只可以話楊怡你同老公仔羅仲謙係命運中要刷出愛火花嘅一對情侶，係命運將你兩個風馬牛不相及嘅人拉埋一齊。
羅仲謙使出宵夜攻勢
深夜，孤零零一個一個女仔仲要留喺公司做嘢拍戲，咪話唔慘。羅仲謙就識做啦！原來羅仲謙戲拍《On Call》嘅時候，每當女神楊怡要開夜拍劇，羅仲謙都會問楊怡想食咩宵夜，然後每晚準時喺楊怡開夜嘅時候，羅仲謙就以送宵夜嚟嘅名義陪楊怡開夜拍戲喇！
原來羅仲謙呢招宵夜攻勢認真使得架！連楊怡都話雖然當初冇為意到晚晚出動宵夜攻勢嘅羅仲謙其實係追求緊佢，不過楊怡坦言羅仲謙嘅宵夜攻勢的確令佢加咗唔少分，「我好記得有一次。雖然嗰日佢好早收咗工，但我就要開夜。喺開夜嘅時候，佢就專登返返嚟公司請劇組人員食生果同蛋糕。我喺嗰個時候就覺得，佢係個幾唔錯嘅男仔。」
終極一擊：燒豬慶生
各位觀眾，其實楊怡同羅仲謙仲有一樣嘢係證明佢地真係命運中嘅一對，就係原來佢哋兩個嘅生日只係相隔兩日㗎咋！呢個世界邊有咁巧合嘅事，咁都俾佢地遇到，仲唔係天生一對？
講開生日，有暗戀過人嘅你哋都知，第一件事就係要記住人哋幾時生日，到時到候俾啲表示。羅仲謙都係唔例外，佢知道佢同楊怡嘅生日只係相差兩日，仲要大家生日嗰排都一齊拍緊劇，羅仲謙於是就利用先天優勢，同楊怡助手講，不如楊怡同佢同劇組一齊慶生吖！就係咁！成咗事！慶生當日，羅仲謙攞咗隻燒豬出嚟，冇錯！係燒豬！羅仲謙打算用燒豬幫楊怡慶生！真係夠曬特別！就係因為羅仲謙呢隻燒豬，令楊怡同羅仲謙嘅距離拉近咗喇！
楊怡大讚謙謙係好老公
楊怡喺港台個訪問入面仲話雖然羅仲謙份人好懶，去旅行唔到最後都唔執行李，但懶惰嘅羅仲謙，為咗楊怡改變咗，「佢會為咗我而拎背囊，因為我將啲水、旅遊書、遮塞晒比佢拎。」
除此之外，羅仲謙一啲都唔物質主義，唔會特登買花買貴重禮物哄老婆開心。被問到羅仲謙點解咁做，原來因為羅仲謙覺得佢哋兩個嘅感情唔需要用物質去維繫，佢哋兩個過嘅係細水長流嘅愛情。
楊怡 謙謙 晒甜照放閃
二人結婚兩週年紀念時，楊怡晒出她和老公的背影相，二人作狀似互打大耍花槍，非常甜蜜；而另一張相則是羅仲謙抱著老婆依偎並坐，看著前方的美好風景，溫馨無比。
謙謙啜爆楊怡 甜蜜放閃
上年謙謙34歲生日，而兩日後係楊怡39歲生日，日子咁接近，兩夫婦索性一齊搞生日party慶祝，仲請咗好朋友出席！謙謙在社交網貼相晒愛，啜爆老婆放閃，sweet到爆！
壽星仔謙謙留言：「跟阿怡一起開生日會，難忘的一個晚上，多謝各位朋友的祝福，感激感激，希望大家天天都笑口常開。」
送花牌冧楊怡
婚後二人各有各忙，阿怡近日更去到上海演出舞台劇《我和春天有個約會》。雖然兩公婆分隔兩地，但一樣無阻兩人甜蜜晒恩愛！日前阿怡就在微博上載多張照片，見到謙謙向太太越洋送上大禮，氹到阿怡心花怒放，閃死人啦！
結婚周年紀念 楊怡：「Thanks for being in my life！」
原來楊怡和羅仲謙在慶祝結婚一週年時，也曾高調放閃！當時二人到歐洲旅行，相當浪漫，做了羅太一年的阿怡更於紀念日向老公示愛，說「Thanks for being in my life！」一眾網民都留言祝福二人，希望他們繼續甜蜜下去。
楊怡 放輕鬆再衝刺
楊怡16年嫁給細她五年的羅仲謙，同年約滿亦決定離開無綫向外闖，一心結婚生仔退下火線的她，這兩年選擇性地工作，去年只拍了一部無綫劇《再創世紀》，煞科即宣布停工調理身體，作好準備生B，今年不是北上陪老公開工，就是周遊列國好梳乎。每次現身公開場合，楊怡都被追問幾時有好消息宣布，年屆39歲的她口說順其自然，但已是高齡產婦的她怎會不心急，月前謙謙完成手頭上內地所有工作，即急急返港陪老婆。
據知情者透露：「雖然阿怡呢兩年成日飛國內陪謙謙，但始終開緊工會好攰，舟車勞頓再加上有壓力，所以一直都未成功。女人40歲後就更加難成孕，所以阿怡一直有睇中醫調理身體，鍾意飲番兩杯嘅佢依家出嚟食飯仲滴酒不沾，早睡早起又做運動，今年盡量唔接嘢做，想放慢心情同腳步，希望喺冇壓力下成事，而謙謙亦應承阿怡拍完兩部戲就停工，呢幾個月留喺香港，佢哋咁努力，相信好快就有好消息啦！」
謙謙家庭觀念甚重，當日在婚禮上表示想與楊怡生個女，然後再追多個仔湊個「好」字，他深知生兒育女責任甚大，早已有了全盤計劃，現在與楊怡及岳母租住大埔比華利山的謙謙，現時目標是買樓送楊怡。知情人爆料：「謙謙向來都唔會亂使錢，佢將近年賺嘅錢滾大，一有機會就上車買層樓寫老婆名，佢覺得女人生仔其實犧牲好大，所以佢好錫媽咪同老婆。阿怡同佢拍拖初期，謙謙仲未紅亦未賺到錢，但阿怡都肯同佢一齊捱，所以佢話過搵到錢要畀最好嘅嘢老婆同仔女，仲諗定小朋友第時讀書要搵學校，會主攻九龍城41校網附近嘅樓，即係九龍塘附近，喇沙同瑪利諾都喺嗰區，生女生仔都冇問題喎！」
幸福漏口風
婚後有謙謙錫到燶的楊怡，上周二(8月28日)出席新劇宣傳被指因為生日及有劇上而「雙喜臨門」，再加上老公謙謙34歲生日兼生B就會是「大四喜」？她聞言笑說：「承你貴言啦！我依家好fit，順其自然啦！」
問到謙謙送甚麼生日禮物？她笑說：「我成日叫佢儲錢買層樓寫我個名，佢就會話『唔使送啦，唔需要慶祝一剎那，我哋係細水長流！』買樓可以要嚟投資，我唔會嫌多，我都想有驚喜！」幸福滿瀉的楊怡，看來已急不及待想與大家分享開心事。
補身
去年底楊怡拍畢《再創世紀》，宣布停工調理身體，食得健康養尊處優的她，每日都以滴雞精補身。
戒酒
日前楊怡相約一班相識20年的藝訓班同學食飯兼慶生，包括林峯、張美妮、陳少邦、徐榮、楊明、趙永洪、李忠希、傅楚惠等十多人，當日大家包場飲紅酒敍舊，相中見林峯等人飲到面紅紅，但楊怡為生B已戒酒，所以保持清醒靚樣。
開工無期
楊怡離開無綫已經兩年，除了代言品牌活動及商場活動，她只接了前年的舞台劇《我和春天有個約會》及去年與郭晉安合作開拍的劇集《再創世紀》，據知短期內她都未有接新工作，成功陀B亦會暫別幕前一段時間專心養胎。
悠閒生活
楊怡講到明要停工準備生B，閒時生活除了放狗就是做運動，難怪身形keep得甚弗。
