楊思琦爆隱形老公同女靠whatsapp溝通 被質疑大話冚大話

撰文：東方新地 圖片：楊思琦IG、楊思琦微博

楊思琦扮搵到幸福

42歲的楊思琦當年遇人不淑，錯愛吳帥誕下女兒穎穎，她咬實牙關帶住囡囡由美返港，努力搵錢養家，去年再懷上第二胎，經手人身份不明，她卻對外扮幸福話自己與一位圈外人已婚，老公姓乜名乜隻字不提，由懷孕產檢到入院生仔，老公都冇出現過，最吊詭是阿仔都係跟阿媽姓，咁楊思琦同個男人結婚為乜？

楊思琦出新歌做宣傳

楊思琦產後繼續頻撲工作搵錢，阿媽就幫佢湊仔女，去年轉型做歌手的楊思琦，早前新歌〈仲夏陽光〉面世要做宣傳，她接受訪問時難免會被追問隱形老公究竟是何方神聖，任由楊思琦怎樣有備而來，答案始終有漏洞，甚至完全
解釋不到，不過楊思琦繼續遊花園自圓其說。

楊思琦強調尊重老公

楊思琦被追問老公為何要這樣神秘唔見得人，她笑言老公唔係呢個圈的人，所以唔會習慣這種模式，想他以舒服為主。記者指楊思琦能夠將丈夫的消息做到滴水不漏，保密功夫相當耍家，特意向楊思琦請教當中秘訣，她想了一想話冇特別，都係順其自然，想尊重老公，冇話刻意想去公開，更提到冇得晒恩愛亦不會感到難受。

楊思琦嬲豬拒絕再講

楊思琦口中的老公隱形到底，辛苦生仔無老公陪，生完繼續做家庭經濟支柱，對於老公有冇幫過手湊仔，楊思琦話佢唔需要幫手湊，結完婚仔都生埋，個老公可以對頭家毫無貢獻，真係好爆！講到囡囡穎穎點同後父相處，楊思琦竟然
話個女會同後父用whatsapp傾偈，記者再銳多一銳，叫楊思琦分享一下老公對佢做過最感動的事，她即拉閘放狗拒絕再討論。崩口人忌崩口碗，楊思琦畀人問到口啞啞根本冇得兜，網民插爆佢係大話精，質疑楊思琦老公從來無確實存
在過，甚至猜測她不知道兒子生父是誰。