楊安妮Win Win出首支單曲引網民批評：COLLAR都只係得兩個人出歌

楊安妮Win Win出歌：我無諗過有機會出solo，嗚～

楊安妮Win Win昨日推出首支單曲《SENSEI》，MV同時上架，Win Win在MV中大玩不同色彩繽紛造型，落足本！Win Win在IG留言：「我真係無諗過會有機會出solo 嗚！當初收到公司話今年要出歌嘅時候，我真係嚇一大跳，嚇到以為係講笑，所以所以！（雖然遲了起步）但我一定會努力的。雖然唱歌不是我強項 但我會加一千倍油去學唱歌」

楊安妮Win Win 綜藝節目多多

27歲的Win Win前年參加《全民造星4》 入行，並得到第5名，當時被邀加入COLLAR，但遭Win Win拒絕，其後亦獲簽約成為ViuTV藝人。簽約後Win Win主力綜藝發展，主持《困獸鬥》、《男女自然觀察學》、《今餐有料到》等至今。今年更一人孭飛到日本拍攝15集《日本WinWin企画》。工作量比同期出道藝人多，今年《造星5》 更擔住記者會以及當晚的司儀之一，不避嫌男友KC是參賽者之一，備受ViuTV力捧！

網民：有懶音可以做司儀主持、樣一般可以上位

網民對Win Win出歌又受力捧有不少意見，「唔明點解Viu咁多女，但成日用佢」、「佢上《膠戰》個集發現佢毫無綜藝感，佢只可以照稿讀」、「極度懷疑佢後台好猛料，個樣平凡，唱歌又唔掂」、「ViuTV係咪將佢同KC放埋一齊，好肉酸，好似要話畀人聽明造馬吹咩」、「大佬佢啲懶音點解可以做到司儀？」、「佢個樣成日嘴藐藐咁」、「簽佢返嚟排舞，可以慳番筆」、「佢究竟憑咩可以咁多曝光率已經好奇怪，仲可以拉埋條仔入行呢下更奇，除咗因為有後台，諗唔到咩原因」等。

不少網民指Win Win樣子平凡無星味，卻跟不少藝人撞樣，包括微辣六毫子、馬蹄露、等。

網民撐：Win Win唔入COLLAR，Ivy So先可以入咋

不過亦有不少網民撐Win Win，「佢之前個日本旅遊節目好好睇喎，佢一個人主持都唔會悶，原來日文咁叻」、「Win Win一跳舞就變咗人咁好正」、「Win Win係憑實力」、「保錡肥仔班錯仔都得，佢點解唔得」、「唔係個個靚仔靚女就得，都要有技能，好似Win Win咁」、「我覺得佢好得意喎」、「講真佢唱歌進步咗，應該花咗唔少心機」、「Win Win好有實力，佢唔入COLLAR，Ivy So先可以候補入團咋」