【BB來了】楊卓娜係「開明後母」對三個女一視同仁
而現實中，作為「三女之母」的楊卓娜當年嫁畀「廣告燈箱大王」楊志翹後，一夜間，成了兩個女兒舒婷和舒雅的後母，因為丈夫因早年喪妻，遺下兩名女兒，雖然並非親生，但楊卓娜這位後母把兩名繼女視如己出，即使在09年5月11日母親節翌日，細女楊舒然(豹豹)出世後，這位媽媽丁點沒有偏心，難怪繼女舒婷和舒雅也大讚這位後母，有如親生媽媽般愛錫自己！
編輯：:東方新地| 原文:東方新地、Sunday Kiss | 圖片：新傳媒資料庫、《BB來了》截圖、楊卓娜IG、楊卓娜微博、部分相片由受訪者提供
楊卓娜演金牌陪月演出前重新學習湊仔
近年陪月員成為搶手貨，對於每一位產後媽媽來說，一個好的「陪月員」絕對是湊仔的好幫手。在TVB熱播劇集《BB來了》中飾演「金牌陪月員」王佳妙的楊卓娜表示自己因為要飾演「陪月員」，所以在公司安排下報讀了相關課程。
「陪月員」是一門學問
佢表示雖然自己有湊小朋友嘅經驗，但好多細節嘅嘢每個媽媽處理方法都唔同，時代不斷變化進步，好多嘢要從頭再學，到拍攝時候，自己都怕做錯陪月要做嘅嘢，所以今次做呢個角色，能讓自己加深了解做「陪月員」原來都係一門學問。
楊卓娜在劇中飾演一名被爛賭老公拋妻棄子的單親媽媽，演技爆發讓不少觀眾都能感受到單親媽媽獨自將小孩拉扯長大的辛酸。而現實中楊卓娜於09年下嫁「廣告燈箱大王」楊志翹後，成了兩個女兒舒婷和舒雅的後母。不過，卓娜是一位「開明後母」對兩個繼女視如己出，即使誕下三女兒楊舒然後，對三個女始終一視同仁。
楊卓娜與繼女關係極好
楊卓娜同「廣告燈箱大王」楊志翹結婚後，更成了兩個女兒舒婷和舒雅的後母 ，丈夫因早年喪妻，遺下兩名女兒，後來卓娜成了她們的手工藝老師，繼而認識丈夫，舒婷和舒雅既是父母的女兒，更是父母的紅娘。舒婷覺得媽咪雖並非親生，但一樣好偉大，從未為人母仍能接受另一半有兩個女兒。「媽咪一直視我為己出，唔會只對親生好，我同二妹都覺得好warm，有番媽咪愛錫。」一下子成為三女之母，卓娜湊BB的同時亦面對大女的青少年反叛期，她覺得青少年問題比湊BB更困難，青少年有自己思想，會質疑父母，她要邊湊邊學，見招拆招。「最重要係喺三個小朋友身上，我都得到好多愛。」
後母絕不偏心
《灰姑娘》的故事耳熟能詳，大多人以為後母比較奸，只會對親生女兒好，舒婷指自己絕非灰姑娘，後母待她如至親，給予滿滿的愛，絕不偏心。「媽咪去到邊都會帶埋我哋去，唔會因為我哋唔係親生，就淨係帶個細嘅出去，好多人都問後母係咪冇咁好，可能睇得《灰姑娘》太多，其實完全冇，媽咪好公平。」
卓娜視繼女如己出，丁點偏心也沒有，與她自己的背景亦有關，她與妹妹楊怡自小爸爸早逝，在單親家庭成長，後來繼父的出現填補了她們的遺憾， 卓娜也希望把愛傳給下一代。「我一開始係認識兩個小朋友先，同先生一齊嘅時候冇諗咁多嘢，我好鍾意呢兩個小朋友同熱鬧大家庭嘅感覺，反而男女之間嘅浪漫我唔係咁着重，最重要係喺呢兩個小朋友身上，我都得到好多愛。」
三姊妹相處融洽
三姊妹年齡相距頗大，分別22、18和9歲，但年齡毋阻三人融洽相處，兩個家姐對同父異母的妹妹亦毫無隔膜，特別是舒婷比較開朗，在維繫三姊妹的關係上成了重要角色。「妹妹比較內向，好多嘢都收收埋埋，我好多時要主動同佢傾偈先知佢諗咩。一家人嘅性格都唔同，要互相體諒。」卓娜覺得一家人最重要有愛，女兒感到愛就自自然然愛對方，毋須刻意提醒要相親相愛。「佢哋三姊妹都好愛對方，大家姐一有時間就帶兩個妹出去玩。佢哋年紀相差好遠，社交生活完全唔同，不過二家姐同細妹仲係學生，返學放學時間差唔多，一齊喺屋企時間耐啲，所以佢哋更加糖黐豆，細妹甚至視佢為榜樣。」
維繫婚姻最重要是緊密溝通
現實中的婚姻，卓娜十分滿足現狀，生活安穩之餘，亦有空間追求自己的興趣。在湊女以外，卓娜喜歡閱讀、做手作，近期就愛上園藝，在小花圃種花種菜，療癒身心；相反老公的興趣大多是戶外運動，如踏單車、潛水。「佢有佢去玩，我就留喺屋企做我想做嘅嘢，我哋會畀空間對方。」維繫婚姻最重要是緊密溝通，有心靈交流，物質只是其次。「我一有唔開心都係同佢傾，佢會細心開解我，互相明白係好重要。我唔會擺物質第一位，有得食有得住就得，或者買樓公一份、婆一份，不過依家樓價咁貴，租到間屋已經好好，再建立自己家庭，大家齊心、安穩就夠。」當然兩人偶有意見不合之時，卓娜不會與丈夫硬碰硬，他責罵時自己保持緘默，時間一過便會沖淡不快。
青少年比BB難湊
卓娜一入門成了三女之母，更是三女的新手媽媽，要湊不同年齡的小朋友。卓娜認為BB不難湊，青少年才是最難，性格硬頸、不信任父母、易受同輩影響，只要教導上稍有差池，就好易讓小朋友誤上歪路。「我都係邊湊邊學，見招拆招。大女試過有段時期唔相信父母，產生咗好多爭執，例如佢拍拖，我哋唔想佢咁早開始，人選亦唔適合，爸爸呢方面好嚴厲，好驚個女學壞，成日唔畀佢同男仔出街，傾又傾過，打罵都試過。」
這邊廂正面對大女的反叛期，另邊廂要照顧初生的細女，相對於青少年，卓娜覺得湊BB只有辛苦，而非困難。「BB時期只係一口舊飯，我話行東佢就行東，行西就行西，我最多係困身啲。小朋友愈大遇到嘅問題愈多，佢哋開始有自己思想，唔會聽你支笛，你要學識點樣同小朋友溝通。」
主張教女從錯誤中學習
訪問當日，楊卓娜表示二女舒雅在學業方面最不用父母操心，或許是她不想父母過問太多，經常說「我搞得掂！」卓娜讚二女最自發讀書，也從不投訴讀書辛苦。「佢全部都係自己搞掂，從來都冇補習，我提議過考DSE 前讀吓『雞精班』，佢都話唔使。」卓娜主張教女從錯誤中學習，例如有次一位大哥哥問借錢，豹豹把身上12元零用錢全借給大哥哥，雖然錢銀不多，但卓娜要教導女兒有借有還，問大哥哥還錢之餘， 更不能隨便借錢， 豹豹現懂得金錢概念，盡量把零用錢儲蓄起來。
楊卓娜在無綫節目《關你家事》分享與家人相處之道時，更一度感觸落淚。談到自己跟兩個繼女關係時，她表示她的情況比較特別，兩位繼女原是她的學生，關係亦較好，像朋友般相處，所以自己能在沒有壓力下跟她們相處，但是她亦非常明白陳小姐（當事人）面對骨肉分離的心情。當要跟自己的親生孩子分別時，她指：「你話唔擔心就假嘅，女人都一定會有JEALOUS（妒忌心），但亦都唔到你擔心。事實上，作為一個媽媽嘅角色，一定係希望小朋友係最幸福、最開心，將所有最好嘅俾晒佢。」
無私的愛能包容所有
講講吓，作為三個孩子母親的她更感觸落淚，「我好希望佢嘅繼母會同佢哋媽媽一樣，俾到同等分量嘅嘢佢哋。雖然我先生嘅前妻已經唔係度，但係我同時都感受到佢做人媽媽嘅心情。每當我見到小朋友唔開心時，更加明白到作為人母嘅感受。」同時，她認為愛能解決一切煩惱，「我覺得愛同包容可以解決所有問題，但係呢種『愛』係一定要好無私、唔可以比較、唔可以拎去爭寵，係要包容。」
對付學業反叛︰命令做練習
舒婷笑言青少年時期比較反叛，不希望媽咪太注意自己，尤其在學業方面，媽咪比較嚴厲。「啲練習多到……做到人都癲，我知媽咪為我哋好，買好多練習畀我哋溫書，一來想我哋成績好啲，二來要環保，買咗唔做好嘥。」卓娜解釋自己並非虎媽，而是另類懲罰，她不要求女兒考好高分，只要求她們做好本份，所以舒婷愈反叛愈要她做練習。「叫親佢做硬係唔做，咁就懲罰性，『一份你唔做，咁做兩份啦！』就算依家都係㗎，佢唔交齊啲嘢畀我，我要佢畀double，再唔交就triple。」舒婷回想做練習的日子好可怕，更覺得父母又惡又煩，長大後才明白父母是一片好心。「畢咗業出嚟做嘢之後，比較番自己和同年紀的人，睇到大家喺待人接物上有分別，可能佢哋被父母縱壞咗，我就知道父母當初咁做係有原因。」
夫妻需有私人空間
在無綫劇集《全職沒女》當中，楊卓娜飾演張兆輝的前妻Lina，縱使有錢有地位，但丈夫忙於工作忽略自己感受，決意離婚去追求另一段能滿足心靈的感情，其實這個角色也是不少女性的寫照。「當你生活安定，就想心靈上得到更多慰藉，慢慢就不安於現狀，開始覺得空虛，希望有更理想嘅人出現，我相信好多女人都出現過呢種現象。」
楊怡謙謙想生女
眼見三個小朋友漸漸長大，舒婷更已投身社會，現職一名秘書，工作穩定；而舒雅亦即將中學畢業，只餘下舒然仍要好好照顧，卓娜笑言開始有「甩難」感覺。「奶奶早兩日先喺（通訊）群組話老爺想我生多個，我話唔好喇啩！我唔想追多個仔，如果要生都係早幾年，唔係依家，生得嚟等佢大個，我先生都60幾歲，唔好喇。」那早幾年為何不行動？「我更加唔想，我嘅注意力喺晒細女身上，而且我鍾意女，慣咗成屋都係女，唔識同仔相處。」
卓娜的媽媽同樣催生仔，現在可以推說交畀妹妹楊怡生，卓娜透露楊怡和老公謙謙有自己計劃，沒有提供甚麼生B貼士，一切都要隨緣。「佢哋有自己諗法同計劃，佢手頭上仲有好多工作，不過離開TVB 後休息得好啲。我覺得生BB 係緣份，所以我唔會畀貼士佢喇，最多佢生完唔識湊我幫佢湊。」
至於想生仔先定生女先，卓娜笑指謙謙是圍村人希望生仔先，但受朋友感染下作出180度轉變，現希望先做女兒奴。「囡囡係前世情人吖嘛！其實生女真係好好，我係一個人辦你睇，如果仔佢今日仲會陪我做訪問？始終女係貼身啲，鍾意黐住父母多啲。」
