梅媽登報與梅啟明脫離母子關係 梅啟明公開表示要靠「二奶」資助生活

98歲梅媽的起心肝行動

98歲已故天后梅艷芳的母親梅媽梅覃美金與長子梅啟明多年來相依為命，感情要好，不過最後都係講錢失感情，去年二人因電影《梅艷芳》涉侵權的訴訟而鬧不和，關係急轉直下。以往盲目支持兒子的梅媽，因為梅啟明入稟高院，控告製作電影《梅艷芳》的安樂影片涉嫌侵權，自爆半年前已對兒子「閂水喉」，鬧他是「打壞」、「躝癱」，甚至不讓兒子探望身在醫院的她，仲畀埋最後通牒會同佢脫離母子關係。

登報正式脫離母子關係

估唔到梅媽講得出做得到，正式登報與梅啟明脫離關係，詳文如下：「本人梅覃美金與兒子梅啟明脫離母子關係，此後梅啟明在外一切華洋轇轕均與本人無關。」有傳媒為此致電梅媽，仍在醫院休養的梅媽承認與梅啟明斷絕母子關係，因他逼到梅媽無路可走，爭人周身債，不過梅媽表示不知道為何爭人錢以及爭幾多錢。」梅媽的4名兒女先後因癌病離世，只剩長子梅啟明，今次與他脫離關係，連唯一的兒子都冇埋。

梅啟明開記者會平反

於梅媽與他脫離關係，梅啟明對已經向傳媒表示「佢老人家鍾意點就點！」亦承認經濟有困難，有欠債幾萬元，欠債是因為梅媽要求孫兒由馬來西亞返港過年需要用錢，又斥梅媽身邊人及親戚挑撥，更勞氣表示梅媽當佢係仇人，不過他會撐到底，寧願出去乞錢，仲話有尋死念頭，冇生存希望， 反指梅媽鐵石心腸，最後更話自己嗰頭近，一定走得快過梅媽。及後，2月15日梅啟明再次主動聯絡傳媒為自己平反，提到他每個月有從基金中領錢，他即激動回應：「唔感恩，我一啲都唔感恩。（佢每月都有俾錢你！）你哋知唔知佢一個月收幾多錢？係一個月25萬，而我只係攞2萬蚊。（你係咪嫌少？）唔係少嘅問題，而家咁嘅情況都過咗咁耐，我都唔想講。（梅媽話你好貪財！）我貪財，我就一早貪咗啦！個個月貪佢一兩萬蚊，係咪咁講呀！仲話要養我一家大細，你估我真係殘廢㗎！我喺出面做過好多份工，做過地盤，裝修，廚房做到褲都濕埋，而我一路都做緊，係散工嚟嘅。」

澄清是女朋友而非二奶，正受對方恩惠

及後梅啟明又被問到有關未離婚包二奶一事，他直認自己冇本事去包，但亦承認自己真係有女朋友：「包二奶呢你哋太過敏感喇，根本冇呢回事，而家人哋幫緊我，因為我唔夠開支，我唔係包二奶，講真我有咩本事包啫。（你背老婆有女朋友，你覺得冇唔啱嘅！）女朋友個個都有喇，（你冇離婚，但有女朋友！）係呀，我未離婚，我係有女朋友，佢係有叫過我過離婚，但我都無所謂。（但你未離婚有女朋友，咁樣對小朋友係咪唔係咁好！）我覺得冇樣，完全冇影響，根本我唔係去包。」

關於告《梅艷芳》侵權

就他早前告電影《梅艷芳》侵權一事，梅啟明在記者會上亦再次闡明，亦否認梅媽早前稱梅啟明收錢去告電影公司一事，更透露入紙去告侵權是梅媽指使：「當初係佢叫我入紙，我先行呢步棋，到我行咗之後，佢又要我撤銷，唔係話鍾意食就食，唔鍾意食就吐番出嚟。導火線就喺呢度，佢就要同我脫離關係。如果佢冇受咗人哋利益，佢就唔使驚打官司，就算告上法庭都係我嘅問題，同佢冇關㗎。係落我個名，又冇落佢嘅名，佢係冇法律責任。佢老人家就唔好怪佢，正式係眼又矇 ，耳又聾，佢而家可能俾人擺佈。咁所以我好想搞清楚呢樣嘢。如果電影公司想傾嘅話，就應該知會我。」其後又表示揣測梅媽有收錢叫自己唔好告《梅艷芳》：「如果佢冇收咗人錢，佢點解會叫我唔好告？呢個係一個點。」

梅啟明每月拎梅媽幾多錢？

梅啟明因財失義，阿媽都冇情講，翻查資料，梅媽每月從梅艷芳遺產獲取的生活費，已由12萬升至20萬（梅啟明親口更正為25萬），根據08年的傳媒報道，梅媽當時每月獲12萬元生活費，扣除屋租及生活開支等，每月會用1萬元供養梅啟明一家三口（及後更正為2萬元）。正所謂長貧難顧，現在梅啟明債台高築，梅媽無奈斷親情。

梅媽竟然大唱反調

電影《梅艷芳》自去年11月中上映後叫好叫座，大收旺場。不過已故天后梅艷芳的胞兄梅啟明突然入稟高院，控告製作電影《梅艷芳》的安樂影片涉侵犯其持有的「梅艷芳」商標，並要求電影公司作出賠償，事件越鬧越大！而一向與梅啟明感情甚佳的梅媽受訪時竟然同兒子大唱反調，指自己對梅啟明入稟告電影公司全不知情，只是日透過朋友才得知兒子行動。

梅啟明因財失義

早前網台節目《D100娛樂小奶媽》主持人潘小文表示曾與梅媽覃美金對話，梅媽因為血壓高與氣促仍身在醫院，當她知道梅啟明最近的動作，感到非常之嬲，她表示約在半年前已閂水喉不再畀錢梅啟明，估唔到梅啟明會如此不擇手段。主持人潘小文說：「梅媽今次想透過我把口警告梅啟明，如果佢唔撤銷訴訟，就會同佢脫離母子關係，呢個係梅媽畀梅啟明嘅最後通牒，希望佢唔好再咬住唔放，以後生性做人。」及後梅媽更「睇死」梅啟明根本沒有本錢去打官司。

梅啟明懶理與梅媽斷絕關係繼續告

雖然梅馬講到要「斷絕母子關係」，但梅啟明就一於少理，日前更接受無綫娛樂新聞節目《娛樂頭條》訪問，直認已經向電影公司發出三封信，惟對方未有回覆，又解釋之前一直未有提告《梅艷芳》的原因：「咁人哋拍嗰時都唔知有乜（內容），都未成事，我點去告人呀？」而對於梅媽「斷絕母子關係」的控訴，梅啟明亦解釋：「我都有買飛入去睇，所有嘢都侵犯晒，阿梅就係阿梅，所以點解『梅艷芳』就係『梅艷芳』。」

梅啟明反擊網民指控：我做嘢使唔使要同人交代？

而對於近幾年，每逢梅啟明現身總會被掛上「遺產界KOL」的代號，暗諷他終日游手好閒不務正業，原來梅啟明一直都很介意，更霸氣反擊網民：「我喺香港乜嘢都有做，你啲人話我行行企企，我做嘢使唔使要同人交代？」惟「乜嘢都有做」到底所指何事，他卻未有詳細說明。

四子女只剩梅啟明

另一方面，對於有傳聞指梅艷芳與梅啟明沒有血緣關係，主持人潘小文引述梅媽的回應：「4個都係我生，不過走剩呢隻唔知係『打壞』定『躝癱』！」講到梅啟明經常指梅艷芳欠佢好多，梅媽解釋說梅啟明的意思是指阿梅走後，一蚊遺產都冇留畀佢，佢覺得好唔公道，有怨恨，其實阿梅咁多年給梅媽的生活費，梅媽都有用來照顧梅啟明，不過梅媽覺得佢攞得太多搞唔掂！經過今次事件，梅媽表示不會再姑息養奸，而令她最安慰的事，就是令內外孫仔相認並保持關係。

去片！《D100娛樂小奶媽》獨家電話訪問梅媽內容

直斥梅啟明：財迷心竅！

今年就99歲的梅媽，今次一反常態與70歲的梅啟明「割席」，她表示自己不同意入稟告電影公司，更指梅啟明「自把自為」。梅媽接受傳媒訪問時更勞氣地大鬧對方：「財迷心竅！」不過梅啟明回覆傳媒查詢時，卻表示自己有將決定告訴過梅媽，更為「財迷心竅」四字反問：「有咩問題呢？」梅啟明又稱仍然與梅媽同住，只是梅媽因老人病要住院兩星期。

電影開拍前曾接觸 梅媽列開拍三大條件

據早前的報導，安樂電影在2018年決定開拍電影一刻，為希望故事更具「真實性」，曾接洽了梅媽做顧問，表示希望她能提供資料。當時有媒體致電梅媽查詢這件事，她表示曾開出三大條件：「我開出條件，就是不可以有侮辱、核突和負面成份；錢是其次，最重要是不能抹黑女兒，梅艷芳三個字我已經註冊。」梅媽當時強調錢係其次，「最緊要唔可以影衰我個女」，並曾表示收到合約，但當時表示正在考慮中。電影公司對梅啟明的提告，回覆表示「由籌備至開拍到現在，我們一直有法律團隊跟進處理有關法律問題，並在合法的基礎下進行電影《梅艷芳》電影的製作。現這事件已交由我們法律團隊處理，現階段我們不作任何回應。」

被封「遺產界KOL」

梅媽覃美金及梅哥梅啓明一直爲爭奪梅姐遺產打官司，梅媽現時每個月有20萬生活費，全由梅姐的遺產基金中支出，供她和大仔梅啟明一家使用，梅啟明曾因此被網民封為「遺產界KOL」。

梅啟明 激到梅媽入醫院

梅啟明控告安樂影片製作的電影《梅艷芳》侵犯版權，並要求賠償損失。原來梅啟明除了愛錢之外，也愛女人，再被爆背妻出軌消息！繼聲稱被兒子激到入院的梅媽日前高調「割席」後，梅啟明再被爆出偷食消息，連現任馬來西亞籍太太Joey亦炮轟他是「躝癱」！

太太怒斥梅啟明「躝癱」唔係人！

其實梅啟明先後有過兩段婚姻，第二任的馬來西亞籍老婆Joey細他16年，並育有一名13歲兒子。但今年8月梅啟明被拍得在銅鑼灣與一名金髮女子十指緊扣行街，更暗指太太Joey默許他可享齊人之福。不過原來Joey近日已秘密返港與對方攤牌，接受傳媒訪問時大爆對梅啟明另有新歡不知情，更激動怒斥他是「躝癱」，問到老公近年有否向她及兒子提供生活費時， Joey就嬲到叫梅啟明自己對住良心講。更不屑他入稟告電影公司侵權，鬧爆對方「係咪人嚟㗎」！