果撻霸一個巴士座位險被坐爛 女乘客發文大鬧對方反被公審

撰文：東方新地、Anna ｜圖片：Tai Po大埔@Facebook

果撻霸一個巴士座位險被坐爛 女乘客發文大鬧對方反被公審

一位陳姓女子喺社交網站Facebook群組「Tai Po大埔」開post話，自己買咗兩件生果撻上咗巴士，坐喺雙人位，聲稱冇咩人，又冇整污糟車廂，所以將生果撻放喺隔離個位度，而有名內地婦帶兩位小朋友上車，兩位小朋友一齊坐咗雙人座，內地婦正打算坐喺陳姓女子隔離（擺咗生果撻嘅位）。

女事主當場喝止內地婦，並指責內地婦無睇到張櫈有嘢，形容自己迅速將個盒攞走先無俾人坐爛，只不過撻上生果移咗位。由女事主上載嘅相片可見，生果撻冇明顯損壞，只不過有幾粒生果跌咗落盒入面。

不過女事主得唔到佢想要嘅迴響啦，網民反而認為佢先係成件事嘅問題製造者，係咎由自取，女事主接收到網民意見後都承認錯誤，知道自己有問題，無好好保護個餅，並承諾唔會刪post，求網民手下留情。

雖然女事主承諾唔刪post，不過就因為post含有仇恨言論，所以被封鎖，女事主亦聲稱畀人檢舉；而網民更另開post討論事件，笑指女事主「取暖失敗」。