買扒心大心細！林子善做食物檢察官
撰文：東方新地 圖片：新傳媒圖片，Instagram-Kt Kary，Facebook-林子善
林子善 食物檢察官
平時做開飲食又開茶餐廳，專業人士買食材畀自己落肚係唔同一般人，入場淨係揀塊扒，林子善全用咗將近半粒鐘，其中大半時間都係企喺個冰櫃前，目測完再拎上手慢慢揀，再細心望清楚手上個pack，又再望番個冰櫃嗰幾pack，左望右望無非要揀最靚嘅畀老婆食啫﹗
搞完一大輪終於去咗畀錢，但係排住隊，子善又望住個扒心大心細。睇足子善揀扒全程，覺得佢揀得落手、呢兩舊扒絕對唔簡單，唔知林太呢晚食落肚感唔感受到份心意呢？
林子善 為老婆搞驚喜生日飯聚
林子善老婆於日前生日，而作為結婚後首個生日，老公當然識做啦！林子善就約哂成班老婆嘅好友搞咗個生日飯局，同埋老婆熱熱鬧鬧食住生蠔同刺身壽司過生日！林子善更甜蜜留言：「BABY 希望你一班好朋友可以給你驚喜! BABY K HAPPY BIRTHDAY I LOVE YOU F」，認真冧爆！
大食生蠔為「造人」鋪路
生日氹到老婆開開心心，Kary都喺個人社交網留言特別感謝老公，並多謝一班好友俾佢嘅生日驚喜。
生日就唔少得有個生日蛋糕，好友更為壽星女特登整咗個邪留丸造型蛋糕，勁靚！
難得Kary可以趁生日同一班好友共聚，林子善亦非常識做，拎起手機做揸機人，齊齊影番張大合照，手機遮哂自己成塊面都唔緊要，最緊要老婆開心！
林子善補擺喜酒
林子善與去年已註冊的太太董佩欣(Kary) 舉行婚宴，晚上兩人會見傳媒，子善表示原本只擺50圍，但因為太多親朋戚友俾面出席，所以加到63圍，預計婚禮支出約7位數！子善同太太同好識做，嘴對嘴錫足一分鐘俾大家影相！
新郎子善好眼淺
提到會與太太共度餘生，子善都忍唔住講到眼濕濕，佢表示唔想空口講白話，行動最實際，首先會照顧好自己身體、做好自己工作，咁先可以好好照顧太太，一齊走埋下半生。子善提到較早時未講愛的宣言已經喊晒，斟茶俾外父外母又好感動，自己好眼淺！
林子善與老婆一度分手
雖然兩人終成眷屬，不過林子善與老婆Kary曾經歷不少波折，子善自爆兩人曾一度分手，原因係女方家人催婚，令自己壓力爆煲；加上當時事業發展未如理想，唔想拖累Kary，希望對方可以搵一個更好的另一半。
曾力追圈中人L小姐
早前有報道指，林子善喺同Kary分手到復合的個幾月真空期，曾力追一位圈中女藝人L小姐，發動肉麻短訊和錄音攻勢，甚至帶埋對方去見鄭嘉穎等一眾《鐵馬尋橋》的好兄弟。據知鄭嘉穎等人仲叫L小姐做「阿嫂」，令其非常受落。
情慾對話流出
報道更公開林子善與L小姐的錄音和短訊，如「經過昨晚0.01接觸，令我更加掛住你呢隻寶貝！」、「我正在床上，聞你殘餘的氣味。」等說話，令人嘩然。不過據知兩人拍拖個幾月後，子善認為與L小姐性格不合，加上好友唐詩詠力勸佢應該珍惜Kary，最終浪子回頭，與Kary復合。
林子善獲老婆信任
林子善回覆傳媒時，對此事直認不諱，更稱老婆Kary亦一早知道呢個女仔的存在，因為坦白的子善在跟Kary復合後，已將L小姐整件事和盤托出。早喺兩人婚前兩個月，呢位L小姐更透過facebook將子善與自己的對話內容send俾Kary，故子善對今次對話流出並唔意外。
唔打算開名
林子善又指，當時自己絕對唔係因為鍾意L小姐而同Kary分手，當時自己係單身，單身拍拖好正常，又唔係偷食。對於兩人拍拖個幾月就分手，子善就話最大的原因，係佢太掛住Kary！子善最後強調，佢同老婆的關係唔會因此變差，佢亦唔打算公開L小姐身份，唔想傷害對方，因為對方亦係圈中人，而且又未嫁人。
林子善同老婆睇完得啖笑
林子善好快在社交網站回應，表示同太太睇完單新聞都係得啖笑，心情並沒有受影響，而且事件其實已經係兩年半前發生，所以唔會再回應咁多。子善貫徹其鬼馬本色，貼上一段電影片段，正正係黃秋生講「我攞咗啲預防愛滋病嘅避孕套。」的電影片段！
正印林太勸女方放低
林子善回應後，正印林太Kary亦在網上發聲，貼上與子善的甜蜜合照之餘，亦表示唔會受到呢件事影響，多謝大家關心，仲叫該位L小姐早日放低…
