林嘉欣搞展覽 群星捧場 子華神朝聖：你好有眼光！
廣告
一向熱愛藝術林嘉欣，最近為日本著名藝術家渡部真由美（Watanabe Mayumi）擔任策展人在尖沙嘴K11搞展覽，吸引勁多圈中人捧場，包括男神黃子華、黃耀明、雷頌德、林海峰、葛民輝、林德信等到場參觀，還有仲有同嘉欣亦師亦友的張艾嘉、經理人林珊珊、小師妹蘇麗珊和西瓜等，而老公袁劍偉當然亦在場打氣。Karena 為配合馬戲團主題，精心佈置場館，又將畫作吊在半空中展出，別出心裁，連子華神都大讚佢有眼光㖭！
撰文：東方新地
林嘉欣 以馬戲團做主題
林嘉欣根據馬戲團為主題，為渡部真由美舉行名為「Send In The Clowns 」的首次海外作品展覽，除了用馬戲團的帳幕布簾布置展覽場入口，場內的畫作都吊在半空中，以及玻璃櫃展出雕塑，另一邊則以音樂和影像表達渡部真由美的作品。嘉欣介紹話：「渡部真由美想表達馬戲團中嘅種種感受，舞台上華麗又歡樂，但背後就完全相反。就好似光線同影子、白天同夜晚。而我就以直覺去設計布置，馬戲團表演例如空中飛人、踩鋼線、企波波都好似懸浮半空，所以我將畫作吊喺半空，營造浮下浮下嘅感覺！」
第二次搞展覽
前年嘉欣首次擔任策展人，為日本書法大師井上有一舉行名為「花」的展覽，今次第二次舉辦展覽，現身捧場嘅男神黃子華笑言：「坦白講，佢上次做策展介紹嗰位唔係普通藝術家，要好識藝術先得，今次呢位啱我呢啲道行唔係咁高嘅人。」仲賣口乖大讚：「你好有眼光，睇咗幾幅畫，好有趣！呀，展覽到幾時？吓，剩返3個月？好快賣晒，大家快啲嚟啦！」嘉欣笑話：「今日已經賣咗好多！」
「離地又貼地的工作」
林嘉欣前年曾為日本書法大師井上有一舉辦「花」展覽，大獲成功，今次再做策展人嘉欣花咗好多心血，佢喺Fb留言話：「再做策展人由遇見作品，惦記著，尋找藝術家，討論再討論，找場地，等…藝術家創作，拍短片，新畫作出現了，很感動，跟畫廊開會，討論時間，空間，設計，又拍短片，討論宣傳，進場地陳置，在順利和不順利之間掙扎，翻譯人員到了，做訪問，最後一晚，我在縫作品資訊，師傅在後面掛帳蓬…我認知的『策展人』，是一份可以離地又貼地的工作。」
培養囡囡藝術細胞
女神林嘉欣除了愛演戲，本身都好鍾意藝術，之前曾經同麥當勞合作推出過多本兒童繪本，深受小朋友喜愛！嘉欣做咗媽咪之後，也積極培養兩名女兒Kayla和Sofie的藝術細胞，帶囡囡學畫畫、玩手作和參觀藝術展等。
