克服他她它｜當林作遇上七仙羽 網民：佢兩個合體好好笑！
文：東方新地｜圖：七仙羽FB圖片、ViuTV節目影片截圖及社交網留言截圖
林作：愈插我愈好！
《克服他她它》的節目主持人火火早在另一節目《鬼同妳上位》熟識七仙羽師傅，憑《鬼同妳上位》而在網上爆紅的七師傅，話因為有好多網民畀負評佢，令佢有啲怕咗網民，因此今次火火就要幫助她克服對網民惡評的恐懼！
火火首先要七師傅讀出網民對佢嘅評論，包括「佢係咪喺譚仔recruit㗎？」、「講好啲廣東話先啦！」、「呢個師傅好X流」等，七師傅開頭唔明白「譚仔員工」呢個Gag嘅意思，火火就解釋：「因為譚仔入面啲人講嘢同你一樣都係口音唔正！」
而節目中最受網民期待的一刻，係林作出場的時候，他今次是作為一個經常面對網民「負皮」的「過來人」，要他「過兩招」給七師傅！林作一到場就揚言：「我就最鍾意人哋插嘅，我覺得愈插我就愈好！」
這時七師傅就問林作：「咁我可唔可以都插你？」林作答歡迎、隨便，七師傅就直言：「我覺得網民鬧你嘅嘢有啲係啱嘅！我覺得人應該要真，我都係好真，不過如果你話我好有錢、好巴閉，唔使自己講㗎！」
出po一定要夠爆
林作就好認真地回應七師傅說：「首先，你對個社交網絡就唔好太認真，如果你要將Social Media當成真實裡面人與人嘅對話，咁就唔係好正確嘅。呢個裡面嘅玩法就係你講嘢要夠爆，如果唔係你唔好出po！所以你喺Social Media講嘅嘢，如果講到好平平淡淡，同你日常待人接物嗰啲一樣，咁就唔好玩Social Media！」
節目組更即場開Live睇網民對林作同七仙羽師傅兩人的「負皮」，其中有網民爆粗直斥林作個髮型「做乜X嘢」，林作就解釋：「生成咁㗎，因為我個頭上面有兩個『轉』（髮旋）！」七師傅隨即指有兩個「轉」的人性格都好任性、好難教。
七師傅又被網民鬧「九唔搭八」，但她表示：「我唔知道『九唔搭八』係咩意思，所以冇嘢好嬲！」林作就讚七師傅：「呢啲先係高手，連攻擊都感受唔到！」
最搞笑係七師傅嘗試解構林作，表示：「佢內心係好孤獨嘅！」火火笑言：「咁每個人都係，我每晚都去看海你又唔知啫！」點知七師傅話：「唔係呀，佢畀人話佢係『譚仔』呀！」火火即反駁：「『譚仔』係話你呀！」
七師傅更自命為林作的代言人，話：「我好了解林作，大家唔了解林作嘅話，問我，我比佢仲了解佢！」講到這句連林作都忍不住開始趴枱狂笑，而七師傅繼續話：「因為由佢自細點樣長大、喺咩環境下長大、內心嘅經歷、情況，我全部都了解！」
七仙羽對林作講：師傅愛你！
最後火火以「不打不相識」形容這次林作和七師傅的相遇，更搞笑說：「我Feel到可能會有個女人離婚同個『四眼仔』一齊，有個『譚仔』可能會鍾意咗個『四眼仔』，亦都可能有個『四眼仔』會拋棄個有少少日本血統嘅女朋友，同個著粉紅色套裝嘅美人一齊！」
事後七師傅話林作教識佢網民係有九成讚佢，剩低一成鬧佢嘅都係「打手」嚟，所以唔需要介意！事實上好多網民都好支持七師傅：
