東京奧運｜訪問張家朗奪金無綫陳約臨示愛送飛吻被轟好失禮最初唔認錯到跪低寫悔過書

東京奧運｜陳約臨訪問張家朗：我好鍾意你

陳約臨訪問張家朗近乎失控興奮問：「你係香港人嘅驕傲，有咩想同香港人講，所有人都睇住Live，我我…我我真係好鍾意你，點算呀？」，陳約臨講個人感受多過發問：「嘩！你呢一刻攞獎牌呀！好激動！我已經流淚，我直頭喺觀眾席流淚，要喊﹗」令張家朗一臉愕然﹗

東京奧運張家朗陳約臨 — 張家朗為港爭光，在訪問中大談奪金感受表現謙虛﹗（圖片來源：無綫奧運直播截圖）

陳約臨不停插嘴打斷張家朗訪問

對陳約臨的機關槍式發表個人感受，張家朗仍保持禮貌表示多謝：「我唔敢相信，一直打得唔係太好…諗住打好第一場先，全場都係冠軍，我唔係啲咩，所以放開去打…」呢個時候陳約臨插嘴：「你點樣做到㗎？由今朝八點打到依家，中間做過啲乜，食過啲乜，陣間你想做啲乜？」其他記者問問題期間，陳約臨再硬插嘴：「可唔可以喺直播度同屋企人講多謝？」張家朗被突如其來一問，邊抺汗邊婉拒：「吓﹗好尷尬喎﹗」

陳約臨話代表香港市民送飛吻嚇呆張家朗

記者正在問賽事問題，陳約臨再出擊搶問：「我要改口叫你金家朗呀﹗」張家朗滴晒汗話：「唔好呀﹗」陳約臨拉高八度話：「唔得呀，唔得呀，你真係香港人嘅驕傲，真係proud of you﹗頭先做直播香港市民叫我送個飛吻畀你，但因為有social distancing呀﹗所以哈哈哈﹗支持你﹗」張家朗不知所措不停抹汗﹗

網民鬧爆陳約臨唔專業

陳約臨被網民洗版鬧爆，指她霸道搶問方式令整個訪問變得不專業，留言「我以為睇緊東張西望」、「冇人想聽你講感受，想聽張家朗講嘢﹗」、「成個東京奧運被佢搞彎晒」、「開電視李麗珊直播訪問張家朗，呢啲先叫專業」、「把聲好煩好討厭」。

陳約臨死撐自己冇問題

陳約臨被洗版鬧爆問題廢又不專業，她接受傳媒訪問時硬撐自己冇問題，更指唔覺得問題唔夠專業，陳約臨指自己由早上一直在現場睇賽事，張家朗由早打到晚，觀眾會想知佢做過乜，食咩去維持體力，強調自己只係問題比較細膩﹗被網民指欠缺體育主持常識，她指自己在17年主持體育節目主持，當時已好留意張家朗，並指自己採訪完仍然覺得自己的問題好重要﹗不過其後陳約臨把採訪東京奧運劍撃的post刪走﹗

無綫護陳約臨冇做錯

陳約臨刪post仍有海量負評，無綫卻出面力撐，負責奧運節目的無綫製作經理衛世輝回應傳媒時護陳約臨，指她沒有不專業，只是心情興奮，並指她為此事感到唔開心，但公司仍會派她採訪奧運活動﹗公司力撐都不敵網民力量﹗事件發生廿四小時，晚上約九時，陳約臨親撰長文悔過書，終於跪低認錯認不專業，求大家給予機會﹗

陳約臨足本悔過書：對自己欠專業，深感懊悔

陳約臨道歉聲明如下：

「對於昨晚在東京奧運香港選手張家朗先生贏得歷史性金牌一刻，我當下與香港市民的心情一樣，實在很激動和興奮，以致作出不恰當的發問，亦作出了失儀的舉動，影響了大家的觀賞感受，對於自己的不成熟和欠專業的表現，深感懊悔。

我在此謹向所有受影響人士及單位，觀眾朋友，張家朗先生及公司TVB致以最深切的道歉。

希望大家再給予我機會，原諒我今次的失誤。

感謝各方給我寶貴的意見，提點與教導，我會銘記於心，努力好好學習，不再令大家失望，做一位專業主持，回饋觀眾和公司。

請繼續支持香港隊及我們香港優秀的運動員，繼續為港爭光﹗」

陳約臨跪低認錯網民唔收貨

陳約臨就「對7月26日訪問東京奧運香港選手張家朗時失儀舉動的道歉聲明」，張家朗亦有畀like，可惜網民唔收貨，仍然有海量的負評指不會原諒她，繼續鬧爆陳約臨破壞了張家朗奪金的重要時刻，直言不能原諒她，並敦請無綫快換人，群情洶湧，陳約臨其後刪走所有留言並把留言功能關閉冇眼睇﹗

網民：想紅都唔係咁做﹗

網民：等咗25年被你破壞晒，唔會原諒你

網民：有失你大專院校講師身份

選美出身陳約臨新聞系畢業任客席講師

25歲的陳約臨上海出世，在珠海學院新聞與傳播學系畢業，2016年經澳門選美連盟選為2016年度國際小姐選美活動的香港代表，並贏得「亞洲皇后」獎項。2017為無綫電視基本藝人合約藝員，曾主持《丁酉年沙田龍舟競渡》、《體育世界》，2018年曾主持《3日2夜》旅遊節目，不時性感出鏡。陳約臨現正在珠海學院修讀「環球傳播」碩士課程，同時為學院兼職講師，教授主持技巧﹗陳約臨一夜成名，被網民起底後指她「教壞細路」。