杜汶澤向陳奐仁挑「肌」 誓要以體脂定輸贏
廣告
有謂「只要有恆心 鐵柱磨成針」，肥佬都可以變大隻佬！早前陳奐仁上載自己喺健身室的相片及短片，無見一排竟然變咗爆肌大隻佬！而藝人杜汶澤一向鍾意健身操肌，可能受到陳奐仁的刺激後，近日阿澤上載一張自己的體脂含量表出嚟，更揚言打敗陳奐仁是必然的，睇落係想下戰書咁喎！
撰文：東方新地｜圖片：instagram
杜汶澤為肌下戰書
杜汶澤一向鍾意健身操肌，就連佢之前去日本都無偷懶，喺當地都繼續密密操。近日，杜汶澤就喺社交網上載一張自己的體脂含量表出嚟，提到自己23.3% 的體脂比率確實係肥滿度較高，所以目標訂立喺10至15之間，並指想在6月去美國閉關前達成目標。
杜汶澤決心要贏陳奐仁
熱愛健身的人都知，要保持一副健美體態，就必需持之以恆。杜汶澤深明呢個道理，所以就大力表示健身是一輩子的事，同時更提起陳奐仁，指出打敗對方是必然的！睇落杜汶澤暫時依家的決心，係要贏硬陳奐仁啲肌！
陳奐仁地獄式減肥成功
42歲的陳奐仁早前上載一段自己喺健身室赤膊玩戰繩的短片，見佢滿身健碩肌肉，大晒麒麟臂！真係睇到網民O晒嘴，佢自己都不禁留言：「我都認唔到自己。I don’t even recognise myself!」
其實睇番陳奐仁FB，佢去年已不時上載自己去健身的相片或影片，但初時成果並唔明顯，所以無引來關注。不過去到今年初，陳奐仁FB上健身的相及片愈來愈多，見到佢的確瘦咗唔少，但估唔到衣服下已經係一身健碩肌肉！
坐「陷」椅子 決心減肥？
陳奐仁向來都實力派，賣歌藝唔賣樣，一直都係肥嘟嘟好可愛。但話說佢去年喺馬來西亞接受訪問時曾講過，佢喺當地一個音樂比賽中任導師，點知將導師椅子坐「陷」，但其他人的椅子無事… 即係佢太重…可能就成為佢決心減肥的原因，點都好啦，陳奐仁依家真係man好多！
