公開65歲李德成與方東昇關係 原來佢大有來頭！
撰文：東方新地｜圖片：電視截圖、微博
公開65歲李德成與方東昇關係
若然大家有睇開《長命百二歲》呢個節目，相信都對節目中一位留有長鬍鬚嘅老人家有印象，皆因佢不時都會穿插喺節目中出現！鏡頭前，方東昇稱呢位老人家做「八叔」，而節目就介紹佢個名叫李德成，大家未必了解佢係邊位，但原來佢本身大有來頭！
今年65歲嘅李德成其實係TVB一位資深新聞新採訪主任，人稱八叔。打滾新聞界多年，採訪過大大小小唔同新聞之外，重大嘅國際新聞就緊係唔少得。有次採訪泰國政變，當時採訪隊於曼谷街頭被軍隊用槍指住，多得八叔機靈，教攝影記者一齊瞓喺地扮死，先逃過一劫！
而人緣唔錯嘅八叔更喺2014年60大壽之際亦同時光榮退休，當時新聞部同事更為佢設宴，歡送呢位資深新聞新採訪主任，足足開咗18圍！
另外，八叔更喺TVB新聞部負責帶新人，唔少主播都跟佢學習過，難怪方東昇都叫佢做「師傅」！而且方東昇嘅爛Gag金句或者都係師承自八叔，皆因八叔間唔時都會喺節目中同方東昇嘅金句帶呼應，例如方東昇曾話：「慢慢嚟唔好急，我哋唔會催人，歲月先有資格催人」，李德成就話：「不單歲月催人，飛機都催人」
而喺《長命百二歲II》嘅美國之旅中，八叔再度加入大家跟住大家一齊四圍去，仲獻出幕前第一次參與競步比賽、啦啦隊、匹克球體驗等，相信亦會仲會有爛gag金句出現，所以觀眾就要留意埋今晚嘅最後一集啦！
同場加映：
《長命百二歲 》第二輯出街
方東昇繼續同李德成、黃曉瑩及李曉欣主持新一輯《長命百二歲 》，再度添食更帶大家走出亞洲，到世界各地探討人口老化問題，第一站就去到養老體系及長期護理水平被譽為全歐洲第一嘅荷蘭。
噚晚嗰集，方東昇就孖住兩位主持走入當地一間最受歡迎嘅電視台一MAX TV，並參與電視台其中一個為各位老友記預防認知障礙、專製作俾老人家睇嘅皇牌長壽節目《記憶訓練所》做嘉賓。
三位主持人大玩配對遊戲，十一題題目只係答錯兩題，但都俾遠在香港嘅李德成睇到忍唔住話佢哋三人都記唔到12個圖案嘅正確位置，笑三位年輕人記性差！
之後方東昇等人就去參觀荷蘭「回憶博物館」，帶觀眾睇睇上世紀荷蘭人用嘅物品甚至室內裝修係點，之不過最有共鳴嘅就緊係當地嘅荷蘭人啦！
方東昇大晒流利荷蘭文
然而，噚晚嗰集最把炮嘅唔係去博物館，更唔係上荷蘭電視節目，而係同荷蘭首相做訪問！
荷蘭首相馬克•呂特今年51歲，方東昇見到首相就即刻以流利荷蘭話問首相怕唔怕老，對方隨即亦以自己母語回答：「我唔怕老！」，唔知首相係咪聽到方東昇用荷蘭話問問題覺得好有親切感，所以特別開心，表現相當興奮！
之後，方東昇緊係唔會咁易錯過同首相傾偈嘅機會，繼續大晒荷蘭話，再問首相有冇諗過退休後嚟香港，但就被一口拒絕。
唔少觀眾睇到方東昇以一口流利荷蘭話同首相溝通，都感到好驚訝！但其實早喺另一個同為方東昇主持嘅節目《世界零距離》，亦曾大晒俄文！而且據知方東昇除咗荷蘭文、俄文，原來仲識德文，睇嚟佢嘅語言天份相當高！
「GAG王」方東昇新一集好笑金句合集
無綫節目《長命百二歲》來到第二季，同樣都有精警金句，一齊睇下啦！
1.世界最大的空間，就是進步空間
和80多歲的長者打網球的方東昇，展現出笨拙的身手，此時他就爆出一句「世界最大的空間，就是進步空間」，自嘲功力一流！
2.西洋味，不離地
除了有含意的金句外，方東昇亦相當擅長押韻，一句「西洋味，不離地」直頭可以做今季的副題！
3.再鋒利的刀都有生鏽的一天，再厲害的風車都有停下來的一天
有「中大才子」之稱的方東昇遇著不轉動的風車，當然不會放過講金句的機會！
4.忘記或許有忘記的好，他的世界不再有煩惱，在雨中也可翩翩起舞
談到失智的長者，他發人深省的金句不但令悲哀的感覺沖淡，更予人一種安慰的感覺，好句好句！
5.失智事小，失蹤事大
6.翹埋雙手，就是幫手
7.有想像力就有生命力
延伸閱讀：方東昇《長命百二歲》爆笑金句回顧
方東昇有新拍檔
《長命百二歲》節目主持人由方東昇、李德成同黃曉瑩嚟主持，以新思維探討人口老化，零距離接觸各地耆英。依家就趁機會嚟回顧吓GAG王第一季嘅金句啦！
唔好以為淨係得方東昇識講金句，就連八叔李德成都識搞Gag！
1.「按照世衞標準，45歲或以上先係中年，所以我仲係大好青年。」
2.「慢慢嚟唔好急，我哋唔會催人，歲月先有資格催人。」
3. 黃曉瑩對李德成講：「你人生經驗咁豐富，食鹽多過我哋食米。」
李德成就答：「食得鹽多就要食藥㗎喇！」
4.「未必人人可以做明星，但只要努力，就有機會做精英。」
5.「見到你（李德成）就好似以前馬王『步步友』咁，『步步有力』呀。」
6.「室雅何需大，不過如果室又雅又大，可能仲好。」
7.「香港人講求唔好急，最緊要快，而台灣人就係「慢慢來，比較快（國語）。」
8.「人生七十古來稀，八叔一百都OK。」
9.「想食乜可以自己揀，所以食嘅都係開心樂園餐。」
10.「有髮不能不「執」，有請執「髮」部門。」
作為主持人就咁搞下Gag都未夠，反應力都好重要，轉數快人都醒目啲，就好似方東昇咁，有一集佢去探訪老人院時，負責人表示要老人家唔駛再用約束帶，俾佢地培養自主權，所以過去已燒毀幾千條約束帶。
方東昇第一個反應就係：「好像林則徐燒鴉片一樣。」
節目由三月開始播，一集只係得三分鐘左右，真係唔夠喉！好彩依家線上就有30分鐘版嘅合輯可以睇番～如果想重溫《長命百二歲》咁多集嘅內容，可以去無線新聞專頁度睇返。
